پسندیدہ غزلیات، نظمیات

عکس خوشبو ہوں بکھرنے سے نہ روکے کوئی
اور بکھر جاوں تو مجھ کو نہ سمیٹے کوئی

کانپ اٹھتی ہوں میں یہ سوچ کے تنہائی میں
میرے چہرے پہ ترا نام نہ پڑھ لے کوئی

جس طرح خواب میرے ہو گئے ریزہ ریزہ
اس طرح سے نہ کبھی ٹوٹ کے بکھرے کوئ

میں تو اس دن سے ہراساں ہوں کہ جب حکم ملے
خشک پھولوں کو کتابوں میں نہ رکھے کوئی

اب تو اس راہ سے وہ شخص گزرتا ہی نہیں
اب کس امید پہ دروازے سے جھانکے کوئی

کوئی اہٹ کوئی آواز کوئی چاپ نہیں
دل کی گلیاں بڑی سنسان ہیں آئے کوئی

 

بھڑکائیں میری پیاس کو اکثر تیری آنکھیں
صحرا مرا چہرہ ہے سمندر تیری آنکھیں

پھر کون بھلا دادِ تبسم انہیں دے گا
روئیں گی بہت مجھ سے بچھڑ کر تیری آنکھیں

خالی جو ہوئی شامِ غریباں کی ہتھیلی
کیا کیا نہ لٹاتی رہی گوہر تیری آنکھیں

میں سنگ صفت ایک ہی رستے میں کھڑا ہوں
شاید مجھے دیکھیں گی پلٹ کر تیری آنکھیں

یوں دیکھتے رہنا اسے اچھا نہیں محسن
وہ کانچ کا پیکر ہے تو پتھر تیری آنکھیں

 

حادثے کیا کیا تمہاری بے رخی سے ہوگئے
ساری دنیا کے لیے ہم اجنبی سے ہوگئے

گردشِ دوراں، زمانے کی نظر،آنکھوں کی نیند
کتنے دشمن اک رسمِ دوستی سے ہوگئے

کچھ تمہارے گیسوؤں کی برہمی نے کردیے
کچھ اندھیرے میرے گھر میں روشنی سے ہوگئے

یوں تو ہم آگاہ تھے صیاد کی تدبیر سے
ہم اسیرِدامِ ٌگل اپنی خوشی سے ہوگئے

بندہ پرور کھل گیا ہے آستانوں کا بھرم
آشنا کچھ لوگ رازِ بیخودی سے ہوگئے

ہر قدم ساغر ! آنے لگی ،ہیں منزلیں
مرحلے کچھ طے مری آوارگی سے ہوگئے​

 

گنوائی کس کی تمنا میں زندگی میں نے
وہ کون ہے جسے دیکھا نہیں کبھی میں نے

ترا خیال تو ہے پر ترا وجود نہیں
ترے لئے تو یہ محفل سجائی تھی میں نے

ترے عدم کو گوارا نہ تھا وجود مرا
سو اپنی بیخ کنی میں کمی نہ کی میں نے

ہیں میرے ذات سے منسوب صد فسانہء عشق
اور ایک سطر بھی اب تک نہیں‌لکھی میں نے

میرے حریف مری یکہ تازیوں‌پہ نثار
تمام عمر حلیفوں سے جنگ کی میں نے

خراش نغمہ سے سینہ چھِلا ہوا ہے مرا
فغاں کہ ترک نہ کی نغمہ پروری میں نے

دوا سے فائد مقصود تھا ہی کب کہ فقط
دوا کے شوق میں صحت تباہ کی میں نے

سرورِ مئے پہ بھی غالب رہا شعور مرا
کہ ہر رعایتِ غم ذہن میں رکھی میں نے

غمِ شعور کوئی دم تو مجھ کو مہلت دے
تمام عمر جلایا ہے اپنا جی میں نے

رہا میں شاہدِ تنہا، نشینِ مسندِ غم
اور اپنے کربِ انا سے غرض رکھی میں نے


(جون ایلیا )​

 

سانس لینا بھی کیسی عادت ہے
جئیے جانا بھی کیا روایت ہے
کوئی آہٹ نہیں بدن میں کہیں
کوئی سایہ نہیں ہے آنکھوں میں
پاؤں بےحِس ہیں، چلتے جاتے ہیں
اِک سفر ہے جو بہتا رہتا ہے
کتنے برسوں سے، کتنی صدیوں سے
جیے جاتے ہیں، جیے جاتے ہیں
عادتیں بھی عجیب ہوتی ہیں

گُلزار​

 

میرے دل کی ہے یہی آرزو مجھے تو ہی بس ملا کرے
یونہی چاہے مجھ کو تمام عمر نہ شکائیتں نہ گلہ کرے

میری چاہتیں میری خواہشیں، میری زندگی ہے ترےلیے
میری رب سے یہی دعا ہے بس تجھے کوئی نہ مجھ سے جداکرے

میرے خواب میرے یہ رت جگے میری نیند بھی ہے تیرے لیے
میری زندگی جو بچی ہے اب تیرے نام اس کو خدا کرے

مجھے زندگی سے گلہ نہیں مجھے تجھ سے بس یہی آس ہے
میں بھی چاہوں تجھ کو سدا یونہی تو وفا کرے یا جفا کرے

یہ وہ فاصلے ہیں میرے صنم جنہیں کوئی بھی نہ مٹا سکا
یہ توفیصلے ہیں نصیب کے انہیں کیسے کوئی مٹا کرے

میری زندگی میں خزاں ہے بس نہ بہار ہی کبھی آ سکی
یہی اشک میرا نصیب ہیں کوئی گُل خوشی کا کھِلا کرے

(انجم)​

 

بہت پیارا کلام ہے۔ میری تو آنکھیں نم سی ہو گئیں یہ اشعار پڑھ کر۔

عبدالجبار بھائی ۔ بہت ہی عمدہ انتخابِ کلام ہے۔ بہت خوب

 

بس اکِ ترتیب اک منظر محبت
جو ممکن ہو تو جیون بھر محبت

زمیں اک منہدم بستی کا ملبہ
اور اس ملبے میں بستا گھر محبت

مٹا دیتی ہے سارے خوف دل سے
بسا کر روح میں اک ڈر محبت

کبھی تھک کر نہیں گرتا زمین پر
لگا دیتی ہے جس کو پرَ محبت

محبت میں رہائش کی ہے میں نے
مرا گھر اور میرا دفتر محبت

نہیں بنتا کوئی اس نقش پر نقش
نہیں ممکن محبت پر محبت

ہر اک محبوب میں‘ تو تھا‘ سو ہم نے
بہت اخلاص سے کی ہر محبت ۔

 

بہت خوب اقراء جی ۔ بہت عمدہ کلام ہے۔

کیا آپ شاعر کا نام بتا سکتی ہیں پلیز ؟؟

 

پسندیدگی کا شکریہ ۔۔۔
شاعر کا نام تو مجھے بھی نہیں معلوم ۔۔ ۔۔ کہیں پڑھا پسند آیا تو لکھ دیا ۔۔

 

کیا سماں تھا بہار سے پہلے
غم کہاں تھا بہار سے پہلے

ایک ننھا سا آرزو کا دیا
ضوفشاں تھا بہار سے پہلے

اے مرے دل کے داغ تو ہی بتا
تو کہاں تھا بہار سے پہلے

پچھلی شب میں خزاں کا سناٹا
ہم زباں تھا بہار سے پہلے

اب جنازہ ہے چار تنکوں کا
آشیاں تھا بہار سے پہلے

چاندنی ميں یہ آگ کا دریا
کب رواں تھا بہار سے پہلے

لٹ گئی دل کی زندگی ساغر
دل جواں تھا بہار سے پہلے​

 

اس بات میں سب کچھ ہے مگر کچھ بھی نہیں ہے
اس سمت کو جاتا ہوں جدھر کچھ بھی نہیں ہے۔
درپیش ہے صحرا کا سفر سوئے چمن زار
اور اس پہ ستم زادِ سفر کچھ بھی نہیں ہے۔
کس شے کے تجسس میں ہو تم محوِ نظارہ
افلاک کے اس پار اگر کچھ بھی نہیں ہے۔
اک عمر محبت کی ریاضت میں گزاری
اب چاکِ گریباں کے دگر کچھ بھی نہیں ہے۔
آ جائے میسر جو کبھی علم کا ساغر
پیاسے کے لئے عمرِ خضر کچھ بھی نہیں ہے۔
دشنام طرازی ہے مغل، اس کا وطیرہ
جس شخص کے ہاتھوں میں ہنر کچھ بھی نہیں ہے۔
۔۔۔م-م-مغل

 

آج جانے کی ضد نہ کرو
یونہی پہلو میں بیٹھے رہو
ہم تو مر جائیں گے
ہم تو لٹ جائیں گے
ایسی باتیں کیا نہ کرو
آج جانے کی ضد نہ کرو

تم ہی سوچو ذرا کیوں نہ روکیں تمھیں
جان جاتی ہے جب اٹھ کے جاتے ہو تم
تم کو اپنی قسم جانِ جاں
بات اتنی ہماری مان لو
آج جانے کی ضد نہ کرو
یونہی پہلو میں بیٹھے رہو


کتنا معصوم رنگین ہے یہ سماں
حسن اور عشق کی آج معراج ہے
کل کی کس کو خبر جانِ جاں
روک لو آج کی رات کو
آج جانے کی ضد نہ کرو
یونہی پہلو میں بیٹھے رہو
آج جانے کی ضد نہ کرو

وقت کی قید میں زندگی ہے مگر
چند گھڑیاں یہی تو ہیں جو آزاد ہیں
ان کو کھو کر میری جانِ جاں
عمر بھر نہ ترستے رہو
آج جانے کی ضد نہ کرو
ہائے مر جائیں گے
ہم تو مٹ جائیں گے
ایسی باتیں کیا نہ کرو

 

بات اتنی سی ہے
پر بتانے میں
وقت لگتا ہے

تم میری ہو
یہ سمجھنے میں‌
وقت لگتا ہے

شعر تو کہ دہتے ہے
غزل بنانے میں
وقت لگتا ہے

جھوٹ کے چہرے ہے ہزاروں
سچی کو اینا بناے میں
وقت لگتا ہے

 

مجھے دو حرف لکھ دینا


کہا اس نے رکو اب تم !
بہت مل کر چلے ہم تم
بہت کچھ پا لیا ہم نے
ہمیں اب لوٹنا ہوگا۔۔۔ !!

سنا یہ تو بہت روئے
بہت ترسے بہت تڑپے

بہت ضدی ہو تم لیکن
تمھیں بھی ہو کچھ غم تو
چلو ہم مان لیتے ہیں
تمھیں ہم کھوچکے لیکن
تمہاری یادیں اب تک
ہمیں بے تاب رکھتی ہیں
ہماری سانس اب تک بھی
تمھاری آس رکھتی ہے
تمھاری راہ روشن ہے
تمھیں مل جائیگا کوئی

مگر افسوس ۔۔ہم جیسا ۔۔!
نہ کوئی دوسرا ہوگا
تمھیں کوئی نہ چاہے گا
کہ جیسے ہم نے چاہا ہے

مگر پھر بھی تلاش کر دیکھو
اگر ہم جیسا پاؤ تو
جو ہم جیسا تمھیں چاہے تو

مجھے دو حرف لکھ دینا

 

نعیم صاحب ۔ آپ کی نظم اچھی ہے۔

میری اپنی ایک نظم پیش خدمت ہے

واپسی

تمھیں یاد ہے ؟؟

اک دن بہت لگاوٹ سے
تم نے پوچھا تھا کہ
“ تم واپس کب لوٹ رہی ہو؟“

تو میں نے
چند ساعتیں سوچ کر
یکدم ذرا سا چونک کر
تیری آنکھوں میں جھانک کر
بڑے دھیرج سے کہا تھا
“اُس دن۔۔۔ہاں اُسی دن
کہ جب تمھارے لب
یہ کہنے کو ہلیں گے:

اے نور ! مجھے اب تمھاری ضرورت ہے
مجھے اب تم سے سچی چاہت ہے

تو دیکھ لو آج !
میں لوٹ ہی آئی ہوں

واپس گھپ اندھیروں میں
طوفانوں کے تھپیڑوں میں
مصائب کے بکھیڑوں میں

فقط اس دعا کے ساتھ کہ

“تم سدا رہو سویروں میں“

 

ارے واہ جی واہ ۔ نور جی ۔

آپ تو بہت اچھی شاعرہ ہیں ماشاءاللہ ۔ بہت خوب !!

 

بہت اچھی نظم ہے

 

پھر بھی خوش تھا ،گرچہ میں بے مایا تھا
میرے دل پر تیری یاد کا سایا تھا

بانجھ رتوں میں پھول کھلانے والے دوست !
میں نے کل تجھے کتنا سمجھایا تھا

دل کی دھڑکن روتے میں بھی ہنستی تھی
موسم نے وہ ایک سخن فرمایا تھا

خون کی بہتی ندیا میں بھی خوابوں کا
ہر شب ہم نے اک بجرا ٹھرایا تھا

اب میں اسکے دھیان میں غلطاں پھرتا ہوں
کل میں جسکو خاطر میں نہ لایا تھا

 

دل دھڑکنے کا سبب یاد آیا
وہ تری یاد تھی اب یاد آیا
آج مشکل تھا سنبھلنا اے دوست
تو مصیبت میں عجب یاد آیا
دن گزارا تھا بڑی مشکل سے
پھر ترا وعدۂ شب یاد آیا
تیرا بھولا ہوا پیماِن وفا
مر رہیں گے اگر اب یاد آیا
پھر کئی لوگ نظر سے گزرے
پھر کوئی شہرِ طرب یاد آیا
حاِل دل ہم بھی سُناتے لیکن
جب وہ رُخصت ہوا تب یاد آیا
بیٹھ کر سایۂ گل میں ناصر
ہم بہت روئے وہ جب یاد آیا​

 

کیمیا گر! پرکھ تو سہی
اور پرکھ کر ہمیں بتا
کون سی دھات کے خواب ہیں
جو پگھلتے نہیں اور بکھرتے نہیں خاک پر
کیمیا گر!
ہمارے دکھوں کا مداوا نہ کر
پر ہماری کسی بات پر یوں نہ ہنس
کہ ہماری جگہ ترے آنسو نکل آئیں۔۔۔۔۔۔ہم ہنس پڑیں
کیمیا گر!اگرچہ ہماری مسافت کی گھڑیاں زیادہ نہیں
اور ہمارا بدن بھی تھکن سے نہیں ٹوٹتا
اور آنکھیں بھی زندہ ہیں دل کی طرح
پر ہمیں اس مسافت میں رہنے کے سارے پیچ و خم
کھا گئے۔
دوستوں نے جو ڈالے تھے یہ سوچ کر
کہ ہمیں اپنی منزل سے پہلے تھکن لوٹ لے۔۔۔

کیمیا گر!
ہمارا ھنر دیکھ، ہم نے کٹھن راستوں کے سیہ پتھروں کو
لہو کی اَنی اور نظر کی ہتھوڑی سے کیسے تراشا
کہ اب لوگ ان کو بھی خوابوں کی تعبیر کہنے لگے

کیمیا گر!
زرِ خواب سے آنکھ خالی ہوئی
پاس کچھ بھی نہیں
کچھ پرکھ تو سہی!
کچھ بتا تو سہی!
کون سی دھات کے خوب ہیں
جو پگھلتے نہیں اور بکھرتے نہیں خاک پر۔۔۔

 

حاصلِ عشق ترا حُسنِ پشیماں ہی سہی
میری حسرت تری صورت سے نمایاں ہی سہی
حُسن بھی حُسن ہے محتاضِ نظر ہے جب تک
شعلۂ عشق چراغِ تہِ داماں ہی سہی
کیا خبر خاک ہی سے کوئ کرن پھوٹ پڑے
ذوقِ آوارگئ دشت و بیاباں ہی سہی
پردۂ گُل ہی سے شاید کوئ آواز آۓ
فرصتِ سیر و تماشاۓ بہاراں ہی سہی​

 

نور، اقراء ، صارم مغل صاحبات و صاحبین

آپ سب کی ارسال کردہ غزلیں بہت عمدہ ہیں۔ ماشاءاللہ بہت اچھا ذوق پایا ہے آپ نے!!

 

دل کے دریا کو کسی روز اُتر جانا ہے
اتنا بے سمت نہ چل، لوٹ کے گھر جانا ہے

اُس تک آتی ہے تو ہر چیز ٹھر جاتی ہے
جیسے پانا ہی اسے، اصل میں مر جانا ہے

بول اے شامِ سفر، رنگِ رہائی کیا ہے؟
دل کو رکنا ہے کہ تاروں کو ٹھہر جانا ہے

کون اُبھرتے ہوئے مہتاب کا رستہ روکے
اس کو ہر طور سوئے دشتِ سحر جانا ہے

میں کِھلا ہوں تو اسی خاک میں ملنا ہے مجھے
وہ تو خوشبو ہے، اسے اگلے نگر جانا ہے

وہ ترے حُسن کا جادو ہو کہ میرا غمِ دل
ہر مسافر کو کسی گھاٹ اُتر جانا ہے

(امجد اسلام امجد)​

 

اے ماں​

اے ماں ! تیرے قدموں کی کیا بات ہے
کہ جنت بھی تلووں کی سوغات ہے
خدا بھی مہرباں، اگر تو ہو راضی
وہ نا خوش، خفاگر ، تری ذات ہے

شبنم کبھی تو ہے ،شعلہ کبھی
ترا پیار طوفاں بھی ہے ، دیپ بھی
یہ گنگا، یہ جمنا، یہ راوی کی ٹھنڈک
ترے ہی تبسم کی خیرات ہے

ترا چاند سا چہرا ، تکتے رہیں
ترا جلوہ، ہر روز، کرتے رہیں
ابد تک رہے، ہم پہ سایہ فگن
عجب تیری الفت کی برسات ہے

یہ جتنے بھی، سیپوں سے، موتی بنے
بہاروں کے آنگن میں، تارے کھلے
فلک کی چمک، زندگی کی دھنک
یہ ماں ہی کی واللہ طلسمات ہیں​

( ماخوذ از “نقشِ اول“ صاحبزادہ حسین محی الدین قادری فرزندِارجمند شیخ الاسلام
پروفیسر ڈاکٹر مُحمّد طاہرالقادری مدظلہ العالی)

 

بہت خوب ۔ ماشاءاللہ

 

اے ماں ! تیرے قدموں کی کیا بات ہے
کہ جنت بھی تلووں کی سوغات ہے
خدا بھی مہرباں، اگر تو ہو راضی
وہ نا خوش، خفاگر ، تری ذات ہے

شبنم کبھی تو ہے ،شعلہ کبھی
ترا پیار طوفاں بھی ہے ، دیپ بھی
یہ گنگا، یہ جمنا، یہ راوی کی ٹھنڈک
ترے ہی تبسم کی خیرات ہے

ترا چاند سا چہرا ، تکتے رہیں
ترا جلوہ، ہر روز، کرتے رہیں
ابد تک رہے، ہم پہ سایہ فگن
عجب تیری الفت کی برسات ہے

یہ جتنے بھی، سیپوں سے، موتی بنے
بہاروں کے آنگن میں، تارے کھلے
فلک کی چمک، زندگی کی دھنک
یہ ماں ہی کی واللہ طلسمات ہیں



( ماخوذ از “نقشِ اول“ صاحبزادہ حسین محی الدین قادری فرزندِارجمند شیخ الاسلام
پروفیسر ڈاکٹر مُحمّد طاہرالقادری مدظلہ العالی)
_________________

بہت اعلٰٰی، بہت خوب۔

 

اجمل بھائ بہت شکریہ۔ آپ نے بہت اچھی نظم پوسٹ کی۔