پسندیدہ غزلیات، نظمیات

کبھی یوں بھی تو ہو
دریا کا ساحل ہو
پورے چاند کی رات ہو
اور تم آؤ

کبھی یوں بھی تو ہو
پریوں کی محفل ہو
کوئی تمہاری بات ہو
اور تم آؤ

کبھی یوں بھی تو ہو
یہ نرم ملائم ٹھنڈی ہوائیں
جب گھر سے تمہارے گزریں
تمہاری خوشبو چرائیں
میرے گھر لے آئیں

کبھی یوں بھی تو ہو
سونی ہر منزل ہو
کوئی نہ میرے ساتھ ہو
اور تم آؤ

کبھی یوں بھی تو ہو
یہ بادل ایسا ٹوٹ کے برسے
میرے دل کی طرح ملنے کو تمہارا دل بھی ترسے
تم نکلو گھر سے

کبھی یوں بھی تو ہو
تنہائی ہو ،دل ہو
بوندیں ہوں برسات ہو
اور تم آؤ
کبھی تو یوں بھی ہو
(جاوید اختر)

 

بہت خوب عبدالجبار بھائی ۔ آپکی اور آپکے شاعرانہ ذوق کی کمی بہت زیادہ محسوس ہوتی تھی۔

صارم مغل صاحب ۔۔ بہت خوب کلام ہے۔

 

پھول

کھلتے رہیں گے صحنِ چمن میں ہزار پھول
لیکن کہاں نصیبِ تمنّا میں چار پھول

شاید یہیں کہیں ہو ترا نقشِ پائے ناز
ہم نے گِرا دئیے ہیں سرراہ گزار پھول

بھونروں کو جستجو ہے تری کنج کنج میں
شاخوں پہ کر رہے ہیں‌ ترا انتظار پھول

آورگانِ شوق چلو ہم کریں تلاش
وہ کارواں جو چھوڑ گیا ہے غبار پھول

کانٹوں پہ جی لئے کبھی پھولوں پہ مر لئے
اپنی نظر میں ایک ہیں گلشن میں‌ خار پھول

کھولے ہیں اس نے گیسوئے عنبر فشاں ضرور
کچھ حد سے ہو گئے ہیں سو اشکبار پھول

ساغر بہار میں نہ رہی مئے کی جستجو
شیشے میں بھر کے پی گیا اک بادہ خوار پھول

(ساغر صدیقی)​

 

دُکھ دے گا

صندل خوشبو اور نہ گہنا دکھ دے گا
اک جیسا دکھ سہتے رہنا دکھ دے گا

ڈرتی کیوں ہیں آنکھیں تیری اچھی ہیں
لیکن ان کا چپ چپ بہنا دکھ دے گا

جو ہم دونوں نے مل جل کر جھیلے تھے
وہ دکھ تیرا تنہا سہنا دکھ دے گا

جس نے ہم کو آنگن آنگن بانٹ دیا
اب تو اُس دیوار کا ڈِہنا دکھ دے گا

 

سب نے بہے اچھی شاعری پوسٹ کی
میں کل کروں گی

 

عشق ایسا عجیب دریا ہے
جو بنا ساحلوں کے بہتا ہے

ہیں غنیمت یہ چار لمحے
پھر نہ ہم ہیں، نہ یہ تماشا ہے

زندگی اک دکان کھلونوں کی
وقت بگڑا ہوا سا بچہ ہے

اے سرابوں میں گھومنے والے
دل کے اندر بھی ایک رستہ ہے

اس بھری کائنات کے ہوتے
آدمی کس قدر اکیلا ہے

آئنے میں جو عکس ہے امجد
کیوں کسی دوسرے کا لگتا ہے

امجد اسلام امجد​

 

کسی کی آنکھ جو پر نم نہیں ہے
نہ سمجھو یہ کہ اس کو غم نہیں ہے

سوادِ درد میں تنہا کھڑا ہوں
پلٹ جاؤں مگر موسم نہیں ہے

سمجھ میں کچھ نہیں آتا کسی کی
اگرچہ گفتگو مبہم نہیں ہے

سلگتا کیوں نہیں تاریک جنگل
طلب کی لو اگر مدھم نہیں ہے

یہ بستی ہے ستم پرور دگاں کی
یہاں کوئی کسی سے کم نہیں ہے

کنارا دوسرا دریا کا جیسے
وہ ساتھی ہے مگر محرم نہیں ہے

دلوں کی روشنی بجھنے نہ دینا
وجودِ تیرگی محکم نہیں ہے

میں تم کو چاہ کر پچھتا رہا ہوں
کوئی اس زخم کا مرہم نہیں ہے

جو کوئی سن سکے امجد تو دنیا
بجز اک باز گشتِ غم نہیں ہے

امجد اسلام امجد​

 

سو بار چمن مہکا سو بار بہار آئی
دنیا کی وہی رونق دل کی وہی تنہائی

اک لحظ بہے آنسو اک لحظ ہنسی آئی
سیکھے ہیں نئے دل نے انداز شکیبائی

جلوؤن کے تمنائی جلوؤں کو ترستےہیں
تسکین کو روئیں گے جلوؤں کے تمنائی

دیکھے ہیں بہت ہم نے ہنگامے محبت کے
آغاز بھی رسوائی انجام بھی رسوائی

یہ بزم محبت ہے اس بزم محبت میں
دیوانے بھی شیدائی فرزانے بھی شیدائی
(صوفی مصطفی تبسم)

 

خواب
جو خواب ابھی ادھورے ہیں
وہ خواب تو زندہ رہتے ہیں
تعبیر انہیں پر ملتی نہیں
جو عکس بنے ہیں تصور میں
تصویر انہیں کو ملتی نہیں
پر خواب تو خواب ہی ہوتے ہیں
جس آنکھ میں پیدا ہوتے ہین
اس آنکھ میں‌ہی رہ جاتے ہیں
شاید تو کبھی وہ پورے ہوں
اس آس پہ زندہ رہتے ہیں

 

گئے دنوں کا سراغ لے کر کدھر سے آیا کدھر گیا وہ
عجیب مانوس اجنبی تھا مجھے تو حیران کر گیا وہ

وہ ہجر کی رات کا ستارہ وہ ہم نفس وہ ہم سخن ہمارا
سدا رہے اسکا نام پیارا سنا ہے کل رات مر گیا وہ

وہ رات کا بے نوا مسافر وہ تیرا شاعر وہ تیرا ناصر
تیری گلی تک تو ہم نے دیکھا پھر نجانے کدھر گیا وہ

ناصر کاظمی​

 

سب نے بہت اچھی شاعری ارسال کی ہے

 

اپنی پسند کی پہلی غزل عرض ہے

اب کے احسان جتانے بھی نہیں آیا کوئی
میں جو روٹھا تو منانے بھی نہیں آیا کوئی

ایک وہ دور کہ سونے بھی نہ دیتے تھے مجھے
ایک یہ وقت کہ جگانے بھی نہیں آیا کوئی

ڈگمگاتا تھا تو سو ہاتھ لپکتے تھے مجھے
گر گیا ہوں‌ تو اٹھانے بھی نہیں آیا کوئی

جانے احباب پہ کیا گزری، خدا خیر کرے
عرصے سے نیا زخم لگانے بھی نہیں آیا کوئی

ایسے اُترا ہوں دلوں سے کہ ہنسانا تو کُجا
ایک مدت سے رُلانے بھی نہیں آیا کوئی

کیا سبھی عہد فقط سانس کے چلنے تک تھے؟
قبر پہ دیپ جلا نے بھی نہیں آیا کوئی

یوں تو سو بار جُڑا، ٹوٹا، مگر اب کے امین
ایسے ٹوٹا کہ بنانے بھی نہیں آیا کوئی

(شیخ امین)​

 

بہت خوب نور جی۔ آپ کا انتخاب بہت عمدہ ہے

 

بہت خوبصورت اشعار ہیں۔

 

آج روٹھے ہوئے ساجن کو بہت یاد کیا
اپنے اجڑے ہوئے گلشن کو بہت یاد کیا

جب کبھی گردش تقدیر نے گھیراہے ہمیں
گیسوئے یار کی الجھن کو بہت یاد کیا

شمع کی جوت پہ جلتے ہوئے پروانوں نے
اک ترے شعلہ دامن کو بہت یاد کیا

آج ٹوٹے ہوئے سپنوں کی بہت یاد آئی
آج بیتے ہوئے ساون کو بہت یاد کیا

ہم سر طور بھی مایوس تجلی ہی رہے
اس در یار کی چلمن کو بہت یاد کیا

مطمئن ہو ہی گئے دام و قفس میں ‎ساغر
ہم اسیروں نے نشیمن کو بہت یاد کیا
[align=center](ساغر صدیقی)[/align]

 

کون آئے گا یہاں کوئی نہ آیا ہوگا
میرا دروازہ ہواؤں نے ہلايا ہوگا

دل ناداں نہ دھڑک اے دل نادان نہ دھڑک
کوئی خط لے کے پڑوسی کے گھر آیا ہوگا

گل سے لیپٹی ہوئی تتلی کو ہلا کر دیکھو
آندھیو تم ہی نے درختوں کو گرایا ہوگا

کیف پردیس میں مت یاد کر اپنے مکاں کو
کہ اب کے برس بارش نے اسے توڑ گرایا ہوگا

 

نظم اُلجھی ہوئی ہے سینے میں
مصرعے عطا ہوئے ہیں ہونٹوں پر
اُڑتے پھرتے ہیں تتلیوں کی طرح
لفظ کاغذ پہ بیٹھتے ہی نہیں
کب سے بیٹھا ہوں میں جانم
سادے کاغذ پہ لکھ کے تیرا نام
بس تیرا نام ہی مکمل ہے
اس سے بہتر بھی نظم کیا ہوگی

گُلزار​

 

بہت ہی خوب صارم صاحب
بہت پیاری شاعری پوسٹ کی ہے آپ نے

 

شکریا باجی جی۔
۔۔۔۔۔۔۔۔۔۔۔۔۔۔۔۔۔

رات کے خواب سنائیں کس کو، رات کے خواب سہانےتھے
دھندلے دھندلے چہرے تھے، پر سب جانے پہچانے تھے

ضدّی، وحشی، الہڑ، چنچل، میٹھے لوگ رسیلے لوگ
ہونٹ ان کے غزلوں کے مصرعے، آنکھوں میں افسانے تھے

وحشت کا عنوان ہماری، ان میں سے جو نام بنی
دیکھیں گے تو لوگ کہیں گے، انشاء جی دیوانے تھے

یہ لڑکی تو ان گلیوں میں روز ہی گھوما کرتی تھی
اس سے ان کو ملنا تھا تو اس کے لاکھ بہانے تھے

ہم کو ساری رات جگایا، جلتے بُجھتے تاروں نے
ہم کیوں ان کے در پر اُترے، کتنے اور ٹھکانے تھے

ابنِ انشاء​

 

بہت اچھی غزل ہے لیکن مقطع درمیان کی بجائے آخر میں‌ہوتا ہے

 

چلو شاید کہ منزل کا نشاں ہے
نہیں تو یہ مسافت رائگاں ہے

نہ ہی تم میں سکت طوفاں سے لڑلو
نہ اپنے پاس کوئی بادباں ہے

فقط ہم نام دینے سے ہیں قاصر
تعلق تو ہمارے درمیاں ہے

میں باسی ہوں کسی بنجر زمیں کا
مقابل میرے پیاسا آسماں ہے

نہیں‌ہوتی اسیرِ وقت اشعر
محبت دائمی ہے، جاوداں‌ہے

(مرتضیٰ اشعر)​

 

واہ واہ واہ بہت خوب بہت ہی خوب!

 

یہ انشاء جی کی مرضی ہے وہ تو پہلے شعر میں بھی تخلص کو استعمال کرتے ہیں جیسے

انشا جی اٹھو اب کوچ کرو اس دیار سے جی کو لگانا کیا
وحشی کا سکوں سے کیا مطلب جوگی کا نگر میں ٹھکاناکیا

 

دن کچھ ایسے گزارتا ہے کوئی
جیسے احساں اتارتا ہے کوئی

آئینہ دیکھ کر تسّلی ہوئی
ہم کو اس کے گھر میں جانتا ہے کوئی

پَک گیا ہے شجر پہ پھل شاید
پھر سے پتھر اچھالتا ہے کوئی

پھر نظر میں لہو کے چھینٹے ہیں
تم کو شاید مغالطہ ہے کوئی

دیر سے گونجتے ہیں سناٹے
جیسے ہم کو پکارتا ہے کوئی

گُلزار​

 

واہ صارم مغل بھائی ۔ بہت خوب کلام ہے۔

 

بجھ گیا دیپ بھی جلتا جلتا
اِس قدر خوف تھا لمحہ لمحہ

میں‌ترے شہر سے یوں لوٹ آیا
درد بکھرے ملے چہرہ چہرہ

دور ہوتی گئی منزل مجھ سے
اور میں تھک گیا چلتا چلتا

میں اگر سائے طلب کرنے لگوں
دھوپ بچھ جائے گی رستہ رستہ

وقت کی دھول سے یادوں کے سبھی
نقش مٹ جائیں گے رفتہ رفتہ

خود پہ تھا زعم جسے حد درجے
ہو گیا ٹوٹ کے ریزہ ریزہ

اُسکی چاہت بھی تھی‌پہلی پہلی
پیار میرا بھی وہ تھاپہلا پہلا

پھول کھلنے لگے میرے اطراف
ہنس پڑا تھا کوئی روتا روتا

(مرتضیٰ اشعر)​

 

سب کی پوسٹ بہت اچھی ہے
مجھے اپنی ڈائری کے لئے کافی کچھ ملا
شکریہ