فیض احمد فیض کی شاعری

واہ بھئی واہ۔۔۔ کیا لفّاظی اور کیا روانی ہے ۔ الفاظ گویا پانی پر تیر رہے ہوں۔ واہ

 

نثار میں تری گلیوں کے اے وطن کہ جہاں
چلی ہے رسم کہ کوئی نہ سر اُٹھا کے چلے
جو کوئی چاہنے والا طواف کو نکلے
نظر چرا کے چلے، جسم و جاں بچا کے چلے
ہے اہل دل کے لیے اب یہ نظمِ بست و کشاد
کہ سنگ و خشت مقید ہیں اور سگ آزاد

بہت ہے ظلم کہ دستِ بہانہ جو کے لیے
جو چند اہل جنوں تیرے نام لیوا ہیں
بنے ہیں اہلِ ہوس، مدعی بھی منصف بھی
کسیے وکیل کریں، کس سے منصفی چاہیں
مگر گزارنے والوں کے دن گزرتے ہیں
ترے فراق میں یوں صبح شام کرتے ہیں

بجھا جو روزنِ زنداں تو دل یہ سمجھا ہے
کہ تیری مانگ ستاروں سے بھر گئی ہوگی
چمک اُٹھے ہیں سلاسل تو ہم نے جانا ہے
کہ اب سحر ترے رخ پر بکھر گئی ہوگی
غرض تصورِ شام و سحر میں جیتے ہیں
گرفتِ سایۂ دیوار و در میں جیتے ہیں

یونہی ہمیشہ الجھتی رہی ہے ظلم سے خلق
نہ اُن کی رسم نئی ہے، نہ اپنی ریت نئی
یونہی ہمیشہ کھلائے ہیں ہم نے آگ میں پھول
نہ اُن کی ہار نئی ہے نہ اپنی جیت نئی
اسی سبب سے فلک کا گلہ نہیں کرتے
ترے فراق میں ہم دل بُرا نہیں کرتے

گر آج تجھ سے جدا ہیں تو کل بہم ہوں گے
یہ رات بھر کی جدائی تو کوئی بات نہیں
گر آج اَوج پہ ہے طالعِ رقیب تو کیا
یہ چار دن کی خدائی تو کوئی بات نہیں
جو تجھ سے عہدِ وفا استوار رکھتے ہیں
علاجِ گردشِ لیل و نہار رکھتے ہیں

فیض احمد فیض

 

بہت عمدہ کلام اور بہت خوب حسنِ ترتیب ہے

 

فیض کے چند اشعار

تم آئے ہو نہ شبِ انتظار گذری ہے
تلاش میں ہے سحر بار بار گذری ہے

وہ بات سارے فسانے میں جسکا ذکر نہیں
وہ بات ان کو بہت نا گوار گذری ہے

نہ گل کھِلے ، نہ اُن سے ملے، نہ مئے پی ہے
عجیب رنگ میں اب کے بہار گذری ہے

(فیض)​

 

نہ گنواؤ ناوک نیم کش دل ریزہ ریزہ گنوا دیا
جو بچے ہیں‌سنگ سمیٹ لو تن داغ‌داغ لٹا دیا

میرے چارہ گر کو نوید ہو صفِ دشمناں کو خبر کرو
جو وہ قرض رکھتے تھے جان پر وہ حساب آج چکا دیا

ادھر ایک حرف کی کشتنی یہاں لاکھ عذر تھا گفتنی
جو کہا تو سن کے اڑا دیا جو لکھا تو پڑھ کے مٹا دیا

جورکےتوکوہ گراں تھےہم جوچلےتوجاں سےگزرگئے
رہ یار ہم نے قدم قدم ، تجھے یادگار بنا دیا


(فیض احمد فیض)

 

اس خوبصورت لڑی کو چلتے رہنا چاہیے۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آج فیض صاحب کی ایک خوبصورت نظم بعنوان “تمہارے حسن کے نام“ پیش خدمت ہے

میری طرف سے یہ اس بزم کے تمام حسینوں کے نام


سلام لکھتا ہے شاعر تمہارے حسن کے نام

بکھر گیا ہے جو کبھی رنگِ پیرہن سرِ بام
نکھر گئی ہے کبھی صبح، دوپہر کبھی شام
کہیں‌جو قامت زیبا پہ سج گئی ہے قبا
چمن میں‌سرو صنوبر سنور گئے ہیں تمام
بنی بساطِ غزل جب ڈبو لئے دل نے
تمہارے سایہ رخسار و لب میں‌ساغر وجام

سلام لکھتا ہے شاعر تمہارے حسن کے نام

تمہارے ہاتھ پہ ہے تابشِ حنا جب تک
جہاں‌میں‌باقی ہے دلداری عروسِ سخن
تمہارا حسن جواں ہے تو مہراں‌ہے فلک
تمہار دم ہے تو دم ساز ہے ہوائے وطن
اگرچہ تنگ ہیں‌اوقات، سخت ہیں‌آلام
تمہاری یاد سے شیریں‌ہے تلخی ایام

سلام لکھتا ہے شاعر تمہارے حسن کے نام

 

واہ ساگراج جی۔ واہ۔ ۔ فیض کے الفاظ تو موتیوں کی لڑیوں جیسے ہوتے ہیں۔ :a180:

 

قرضِ نگاہ یار ادا کرچکے ہیں ہم
سب کچھ نثار راہ وفا کر چکے ہیں‌ہم

کچھ امتحانِ دستِ جفا کر چکے ہیں ہم
کچھ ان کی دسترس کا پتا کر چکے ہیں‌ہم

اب احتیاط کی کوئی صورت نہیں‌رہی
قاتل سےرسم و راہ سوا کر چکے ہیں ہم

دیکھیں ہے کون کون ضرورت نہیں رہی
کوئے ستم میں سب کو خفا کر چکے ہیں ہم

آپ اپنا اختیار ہے چاہیں جہاں چلیں
رہبر سے اپنی راہ جدا کر چکے ہیں‌ہم

ان کی نظر میں‌، کیا کریں، پھیکا ہے اب بھی رنگ
جتنا لہو تھا صرفِ قبا کر چکے ہیں ہم

کچھ اپنے دل کی خو کا بھی شکرانہ چاہیے
سوبار ان کی خو کا گلا کر چکے ہیں ہم

 

سارا کلام ہی اچھا ہے۔۔ لیکن یہ 3 اشعار تو آسمان کی بلندیوں کو چھوتے نظر آتے ہیں۔
اور آخری شعر بہت سبق آموز ہے۔۔۔ بہت خوب !

 

بہت خوب
ساگراج صاحب

 

آج کی رات


آج کی رات سازِ درد نہ چھیڑ

دکھ سے بھرپور دن تمام ہوئے
اور کل کی خبر کسے معلوم؟
دوش و فردا کی مٹ چکی ہیں حدود
ہو نہ ہو اب سحر، کسے معلوم؟
زندگی ہیچ! لیکن آج کی رات
ایز دیت ہے ممکن آج کی رات

آج کی کی رات سازِ درد نہ چھیڑ

اب نہ دہرا فسانہ ہائے الم
اپنی قسمت پہ سوگوار نہ ہو
فکرِ فردا اتاردے دل سے
عمرِ رفتہ پہ اشکبار نہ ہو
عہدِ غم کی حکائیتیں‌ مت پوچھ
ہوچکیں سب شکائیتیں مت پوچھ

آج کی رات سازِ درد نہ چھیڑ

 

واہ ساگراج جی۔ بہت اچھی نظم لگی۔
ایک ایک لفظ دل میں اتر سا گیا۔۔۔ بہت ہی خوب نظم !!!

 

چشم میگوں ذرا ادھر کردے
دست قدرت کو بے اثر کردے
تیز ہے آج دردِ دل ساقی
تلخی مے کو تیز تر کردے
جوش وحشت ہے تشنہ کام ابھی
چاکِ دامن کو تا جاگر کردے
میری قسمت سے کھیلنے والے
مجھ کو قسمت سے بے خبر کردے
لٹ رہی ہے مری متاعِ نیاز
کاش وہ اس طرف نظر کردے
فیض تکمیل آرزو معلوم
ہوسکے تو یونہی بسر کردے

 

بہت اچھے ساگراج جی۔ آپکا ذوق سخن بہت عمدہ ہے

 

شکریہ نور جی ۔۔۔۔۔۔۔۔۔۔۔ مجھے تو جو اچھا لگتا ہے لکھ دیتا ہوں۔۔۔۔ اسی لیئے تو دوسری لڑی بعنوان “شعروں کے انتخاب نے رسوا کیامجھے“ شروع کی تھی۔۔۔۔۔

ویسے اللہ کا شکر ہے کہ اس بزم میں تمام دوست ہی بہت باذوق ہیں۔۔۔۔۔۔۔۔ یہ بڑا سرمایہ ہے

 

مجھ سے پہلی سی محبت مری محبوب نہ مانگ

میں نے سمجھا تھا کہ تو ہے تو درخشاں ہے حیات
تیرا غم ہے تو غمِ دہر کا جھگڑا کیا ہے
تیری صورت سے ہے عالم میں بہاروں کو ثبات
تیری آنکھوں کے سوا دنیا میں رکھا کیا ہے؟
تو جو مل جائے تو تقدیر نگوں ہو جائے
یوں نہ تھا، میں نے فقط چاہا تھا یوں ہو جائے
اور بھی دکھ ہیں زمانے میں محبت کے سوا
راحتیں اور بھی ہیں وصل کی راحت کے سوا

ان گنت صدیوں کے تاریک بہیمانہ طلسم
ریشم و اطلس و کمخاب میں بُنوائے ہوئے
جابجا بکتے ہوئے کوچہ و بازار میں جسم
خاک میں لتھڑے ہوئے خون میں نہلائے ہوئے

لوٹ جاتی ہے ادھر کو بھی نظر کیا کیجے
اب بھی دلکش ہے ترا حسن مگر کیا کیجے
اور بھی دکھ ہیں زمانے میں میں محبت کے سوا
راحتیں او ربھی ہیں وصل کی راحت کے سوا

مجھ سے پہلی سے محبت مری محبوب نہ مانگ​

 

بہت خوب چیٹر ۔۔ بہت اچھا کلام

 

بے دم ہوئے بیمار، دوا کیوں‌نہیں‌دیتے
تم اچھے مسیحا ہو شفا کیوں‌نہیں‌دیتے

درد شب ہجراں کی جزا کیوں نہیں دیتے
خوں دل وحشی کا صلا کیوں‌ نہیں‌ دیتے

مٹ جائے گی مخلوق خدا تو انصاف کرو گے
منصف ہوتو حشر اٹھا کیوں‌ نہیں‌ دیتے

ہاں نکتہ ورو لاؤ لب و دل کی گواہی
ہاں نغمہ گرو ساز صدا کیوں‌ نہں‌دیتے

پیمانِ جنوں ہاتھوں کو شرمائے گا کب تک
دل والو، گریباں کا پتا کیوں نہیں‌ دیتے

بربادی دل جبر نہیں‌فیض کسی کا
وہ دشمن جاں‌ہے تو بھلا کیوں‌نہیں‌دیتے

 

بہت اچھی شاعری ہے ساگراج بھائی ۔
لیکن میری یادداشت کے مطابق لفظ “خدا“ اس مصرعے میں نہیں آتا۔ اور یہ لفظ شامل کرنے سے شعر کا وزن بھی بگڑتا ہے۔ اس لیے پھر سے دیکھ لیجئے۔
شکریہ

 

ٹھیک ہے نعیم بھائی آپ کہتے ہیں‌تو یقینا ایسا ہی ہو گا۔۔۔۔۔۔۔۔۔۔۔۔۔۔۔
میں نے یہ غزل فیض صاحب کی کتاب سے نہیں لی، بلکہ کسی اور جگہ لکھی پڑھی تھی اس لیئے غلطی کے چانسز موجود ہیں۔۔۔۔۔

 

بہت خوب چیٹر صاحب اور بہت خوب ساگراج صاحب بہت اچھی شاعری شئیر کی ہے آپ دونوں‌نے بہت خوب۔۔۔

 

اب وہی حرفِ جنوں سب کی زباں ٹھہری ہے
جو بھی چل نکلی ہے وہ بات کہاں ٹھہری ہے

آج تک شیخ کے اکرام میں‌جو شے تھی حرام
اب وہی دشمنِ دیں، راحت جاں ٹھہری ہے

ہے خبر گرم کہ پھرتا ہے گریزاں ناصح
گفتگو آج سرِ کوئے بتاں ٹھہری ہے

ہے وہی عارضِ لیلی، وہی شیریں کا دہن
نگہ شوق گھڑی بھر کو جہاں ٹھہری ہے

وصل کی شب تھی تو کس درجہ سبک گزری تھی
ہجر کی شب ہے تو کیا سخت گراں گزری ہے

بکھری اک بار تو ہاتھ آئی ہے کب موجِ شمیم
دل سے نکلتی ہے تو کب لب پہ فغاں ٹھہری ہے

دستِ صیاد بھی عاجز ہے، کفِ گلچیں بھی
بوئے گل ٹھہری نہ بلبل کی زباں ٹھہری ہے

آتے آتے یونہی دم بھر کو رکی ہوگی بہار
جاتےجاتے یونہی‌پل بھر کو خزاں ٹھہری ہے

ہم نے جو طرزِ فغاں کی ہے قفس میں‌ایجاد
فیض گلشن میں وہی طرزِ بیاں ٹھہری ہے

 

واہ بھئی واہ۔۔۔ کیا کہنے فیض کے ۔۔۔ بہت خوب شاعری ہے :a180:

 

رات یوں دل میں تری کھوئی ہوئی یار آئی
جیسے ویرانے میں چپکے سے بہار آجائے
جیسے صحراؤں میں ہولےسے چلے باد نسیم
جیسے بیمار کو بے وجہ قرار آجائے


دل رہین غم جہاں ہے آج
ہر نفس تشنہ فغاں ہے آج
سخت ویراں ہے محفل ہستی
اے غم دوست! توکہاں ہے آج

 

صبا کے ہاتھ میں نرمی ہے ان کے ہاتھوں کی
ٹھہر ٹھہر کے یہ ہوتا ہے آج دل کو گماں
وہ ہاتھ ڈھونڈ رہے ہیں بساطِ محفل میں
کہ دل کے داغ کہاں ہیں نشستِ درد کہاں
​