فیض احمد فیض کی شاعری

میری پسندیدہ ترین نظموں میں سے ایک۔

بعنوان: ہم جو تاریک راہوں میں مارے گئے

تیرے ہونٹوں کے پھولوں کی چاہت میں ہم
دار کی خشک ٹہنی پہ وارے گئے
تیرے ہاتھوں کی شمعوں کی حسرت میں ہم
نیم تاریک راہوں‌ میں مارے گئے

سولیوں پر ہمارے لبوں سے پرے
تیرے ہونٹوں کی لالی لپکتی رہی
تیری زلفوں کی مستی برستی رہی
تیرے ہاتھوں کی چاندی دمکتی رہی

جب گھلی تیری راہوں میں شامِ ستم
ہم چلے آئے، لائے جہاں تک قدم
لب پہ حرفِ غزل، دل میں قندیل غم
اپنا غم تھا گواہی تیرے حسن کی
دیکھ قائم رہے اس گواہی پہ ہم
ہم جو تاریک راہوں‌ میں‌ مارے گئے

نار سائی اگر اپنی تقدیر تھی
تیری الفت تو اپنی ہی تدبیر تھی
کس کو شکوہ ہے گر شوق کے سلسلے
ہجر کی قتل گاہوں سے سب جا ملے

قتل گاہوں سے چن کر ہمارے عَلم
اور نکلیں گے عشاق کے قافلے
جن کی راہ طلب سے ہمارے قدم
مختصر کر چلے درد کے فاصلے

کر چلے جن کی خاطر جہاں‌گیر ہم
جاں گنوا کر تری دلبری کا بھرم
ہم جو تاریک راہوں‌میں‌مارے گئے​

 

​

واہ واہ ۔ ساگراج جی ۔ اتنی عمدہ شاعری ارسال کرنے پر شکریہ :a180:

 

تیرے غم کو جاں کی تلاش تھی تیرے جاں نثار چلے گئے
تیری راہ میں کرتے تھے سرطلب، سرِ رہگزار چلے گئے

تیری کج ادائی سے ہار کے شبِ انتظار چلی گئی
میرے ضبطِ حال سے روٹھ کر میرے غم گسار چلے گئے

نہ سوالِ وصل، نہ عرضِ غم،نہ حکایتیں، نہ شکایتیں
تیرے عہد میں‌ دلِ زار کے سبھی اختیار چلے گئے

یہ ہمیں‌تھے جن کے لباس پر سرِ راہ سیاہی لکھی گئی
یہی داغ تھے جو سجا کے ہم سرِ بزم یار چلے گئے

نہ رہا جنونِ رخِ وفا، یہ رسن یہ دار کرو گے کیا
جنہیں‌جرمِ عشق پہ ناز تھا وہ گناہ گار چلے گئے

 

نہ سوالِ وصل، نہ عرضِ غم،نہ حکایتیں، نہ شکایتیں
تیرے عہد میں‌ دلِ زار کے سبھی اختیار چلے گئے


واہ واہ واہ ساگراج جی ۔ کیا کہنے
یہ شعر پڑھ کر تو مزہ آگیا ۔ بہت خوب

 

نصیب آزمانے کے دن آ رہے ہیں
قریب ان کے آنے کے دن آرہے ہیں

جو دل سے کہا ہے،جو دل سے سنا ہے
سب ان کو سنانے کے دن آ رہے ہیں

ابھی سے دل و جاں‌ سرِ راہ رکھ دو
کہ لٹنے لٹانے کے دن آ رہے ہیں

ٹپکنے لگی ان نگاہوں سے مستی
نگاہیں چرانے کے دن آ رہے ہیں

صبا پھر ہمیں پوچھتی پھر رہی ہے
چمن کو سجانے کے دن آ رہے ہیں

چلو فیض پھر سے کہیں دل لگائیں
سنا ہے ٹھکانے کے دن آ رہے ہیں​

 

میری پسندیدہ غزلوں میں سے ایک ۔۔۔۔۔
فیض صاحب اپنی تمام خوبصورتیوں کے ساتھ۔

کب یاد میں تیرا ساتھ نہیں،کب ہاتھ میں تیرا ہاتھ نہیں
صد شکر کہ اپنی راتوں میں اب ہجر کی کوئی رات نہیں

مشکل ہیں اگر حالات وہاں ، دل بیچ آئیں جاں دے آئیں
دل والو کوچئہ جاناں میں کیا ایسے بھی حالات نہیں

جس دھج سے کوئی مقتل میں گیا، وہ شان سلامت رہتی ہے
یہ جان تو آنی جانی ہے، اس جان کی کوئی بات نہیں

میدان وفا دربار نہیں، یاں نام و نسب کی پوچھ کہاں
عاشق تو کسی کا نام نہیں، کچھ عشق کسی کی ذات نہیں

گر بازی عشق کی بازی ہے جو چاہو لگا دو ڈر کیسا
گر جیت گئے تو کیا کہنا، ہارے بھی تو بازی مات نہیں​

 

تم آئے ہو، نہ شبِ انتظار گزری ہے
تلاش میں ہے سحر، باربار گزری ہے
جنوں میں‌ جتنی بھی گزری، بکار گزری ہے
اگرچہ دل پہ خرابی ہزار گزری ہے
ہوئی ہے حضرتِ ناصح سے گفتگو جس شب
وہ شب ضرور سرِ کوئے یار گزری ہے
وہ بات سارے فسانے میں‌ جس کا ذکر نہ تھا
وہ بات ان کو بہت ناگوار گزری ہے
نہ گل کھلے ہیں،نہ ان سے ملے، نہ مے پی
عجیب رنگ میں اب کے بہار گزری ہے
چمن پہ غارتِ گلچیں سے جانے کیا گزری
قفس سے آج صبا بے قرار گزری ہے​

 

اسلام علیکم
واہ بہت زبردست جناب واقعی ہی بہت عمدہ کلیکشن ہے
:a180:

 

شکریہ راجہ وقاص صاحب،
اس بزم میں‌پہلا پیغام لکھنے پر مبارک باد وصول کریں۔

امید ہے کہ آپ بھی اپنی کلیکشن ہم سے شئیر کریں گے۔

 

اسلام علیکم
بہت :a165: کلیکشن ہے بھائی جان

:a180:

 

پھر حریفِ بہار ہو بیٹھے
جانے کس کس کو آج رو بیٹھے

تھی، مگر اتنی رائیگاں بھی نہ تھی
آج کچھ زندگی سے کھو بیٹھے

تیرے در تک پہنچ کے لوٹ آئے
عشق کی آبرو ڈبو بیٹھے

ساری دنیا سے دور ہو جائے
جو ذرا تیرے پاس ہو بیٹھے

نہ گئی تیری بے رخی نہ گئی
ہم تیری آرزو بھی کھو بیٹھے

فیض ہوتا رہے جو ہونا ہے
شعر لکھتے رہا کرو بیٹھے​

 

واہ جی واہ۔ لگتا ہے فیض کے بعد یہی نصیحت آپ نے بھی اپنا لی ہے :mashallah:

 

فیض صاحب کا تو پتہ نہیں۔
لیکن مجھ کو پڑھنے والے ہی ایسے ملے ہیں‌کہ دل چاہتا لکھتا ہی رہوں۔

 

دونوں جہان تیری محبت میں‌ ہار کے
وہ جارہا ہے کوئی شبِ غم گزار کے

ویراں ہے میکدہ، خم و ساغر اداس ہیں
تم کیا گئے کہ روٹھ گئے دن بہار کے

اک فرصت گناہ ملی، وہ بھی چار دن
دیکھے ہیں‌ہم نے حوصلے پروردگار کے

دنیا نے تیری یاد سے بیگانہ کر دیا
تجھ سے بھی دلفریب ہیں‌ غم روزگار کے

بھولے سے مسکرا تو دئے تھے وہ آج فیض
مت پوچھ ولولے دلِ ناکردہ کار کے​

 

کیوں نہیں ساگراج بھاٰئی قدر شناسوں کی کمی نہیں یہاں

 

زبردست غزل ہے۔ یہ شعر مجھے بہت پسند ہے۔
ساگراج جی ۔ اتنا عمدہ کلام شئیر کرنے پر بہت شکریہ

 

اسلام علیکم
کیسی ہو نور آپ

دوستو میں اب شاید کم ہی آیا کروں کیونکہ کام ہیں کہ پہیچھا نہیں چھوڑتے

یادیں تیرے خلوص کی ڈستی ہیں آج بھی
ملنے کی آرزو میں ترستی ہیں آج بھی
آنکھیں ہزار ضبط کی کوشش کے باوجود
رک رک کے بار بار برستی ہیں آج بھی
:titli:

 

راجہ وقاص جی
یہ قطعہ کیا فیض کا ہے ؟ :139:

 

اے شام مہربان ہو (فیض)

اے شام مہرباں ہو

اے شام مہرباں ہو
اے شامِ شہرِ یاراں
ہم پہ مہرباں ہو
دوزخی دوپہر ستم کی
بے سبب ستم کی
دوپہر درد و غیظ و غم کی
بے زباں درد و غیظ و غم کی
اس دوزخی دوپہر کے تازیانے
آج تن پر دھنک کی صورت
قوس در قوس بٹ گئے ہیں
زخم سب کھُل گئے ہیں
داغ جانا تھا چھٹ گئے ہیں
ترے توشے میں کچھ تو ہو گا
مرہمِ درد کا دوشالہ
تن کے اُس انگ پر اُڑھا دے
درد سب سے سوا جہاں ہو
اے شام مہرباں ہو
اے شامِ شہرِ یاراں
ہم پہ مہرباں ہو

دوزخی دشت نفرتوں کے
بے درد نفرتوں کے
کرچیاں دیدۂ حسد کی
خس و خاشاک رنجشوں کے
اتنی سنسان شاہراہیں
اتنی گنجان قتل گاہیں
جن سے آئے ہیں ہم گزر کر
آبلہ بن کے ہر قدم پر
یوں پاؤں کٹ گئے ہیں
رستے سمٹ گئے ہیں
مخملیں اپنے بادلوں کی
آج پاؤں تلے بچھا دے
شافیِ کربِ رہرواں ہو
اے شام مہرباں ہو

اے مہِ شبِ نگاراں
اے رفیقِ دلفگاراں
اس شام ہمزباں ہو
اے شام مہرباں ہو
اے شام مہرباں ہو
اے شامِ شہریاراں
ہم پہ مہرباں ہو

 

بہت خوب بہت اچھے۔۔۔زبردست شاعری ہے۔۔

دوزخی دشت نفرتوں کے
بے درد نفرتوں کے
کرچیاں دیدۂ حسد کی
خس و خاشاک رنجشوں کے
اتنی سنسان شاہراہیں
اتنی گنجان قتل گاہیں
جن سے آئے ہیں ہم گزر کر
آبلہ بن کے ہر قدم پر
یوں پاؤں کٹ گئے ہیں
رستے سمٹ گئے ہیں
مخملیں اپنے بادلوں کی
آج پاؤں تلے بچھا دے
شافیِ کربِ رہرواں ہو
اے شام مہرباں ہو

 

لاؤ تو قتل نامہ میرا

لاؤ تو قتل نامہ میرا
سننے کو بھیڑ ہے سر محشر لگی ہوئی
تہمت تمہارے عشق کی ہم پر لگی ہوئی

رندوں کے دم سے آتشِ مے کہ بیغر بھی
ہے مے کدے میں آگ برابر لگی ہوئی


آباد کر کے شہرِ خاموشاں ہر اک سو
کس کھوج میں ہے تیغِ ستمگر لگی ہوئی

جیتے تھے یوں تو پہلے بھی ہم جان پہ کھیل کر
بازی ہے اب کہ جان سے بڑھ کر لگی ہوئی

آخر کو آج اپنے لہوں پر ہوئی تمام
بازی میانِ قاتل و خنجر لگی ہوئی

لاؤ تو قتل نامہ میرا، میں بھی دیکھ لوں
کس کس کی مُہر ہے سرِ مہزر لگی ہوئی

(فیض احمد فیض)​

 

:a180: کیا کہنے فیض کی شاعری کے ۔ بہت خوب کلام ہے :101:

 

واقعی، بہت خوبصورت کلام۔

 

نعیم صاحب اور کاشفی صاحب
دونوں کا انتخاب کلام بہت اچھا ہے۔ پسند آیا۔

 

شکریہ سب کا۔