سوالیہ بیت بازی

اندازِ بیاں گرچہ مِرا شوخ نہیں ہے
شائد کہ اُتر جائے تِرے دل میں مِری بات

-------------------------------------------------------------------------

یہ سارے لوگ تنہا کیوں نہیں ہیں
میں کیوں بازار میں تنہا کھڑا ہوں؟​

 

زندگی کی راہوں میں‌رنج و غم کے میلے ہیں
بھیڑ ہے قیامت کی اور ہم اکیلے ہیں

گل پہ ہے فدا بلبل اور شمع پہ ہے پروانہ
اس بھری جوانی میں‌آپ کیوں اکیلے ہیں؟

 

دیکھ لے بُلبُل و پروانہ کی بیتابی
ہجر اچھا نہ حسینوں‌ کا وصال اچھا ہے

(تو واصف بھائی! ہم اکیلے ہی اچھے )

---------------------------------------------------------------------

آئینے کو دیکھ کر شرمائے کیوں؟
کیا کوئی مدِ مقابل ، اور ہے؟​

 

آئینہ دیکھ اپنا سا منہ لے کے رہ گئے
صاحب کو دل نہ دینے پہ کتنا غرور تھا

آج کیوں پروا نہیں اپنے اسیروں کی تجھے؟
کل تلک تیرا بھی دل مہر و وفا کا باب تھا

 

گلہ تو گھونٹ دیا اہلِ مدرسہ نے ترا
کہاں سے آئے صدا ، لا الٰہ الا للہ؟​

 

بت چیز کیا ہے جس کو خدا مانتے ہیں سب
خوش اعتقاد کتنے ہیں ہندوستاں کے لوگ

پتھرو آج میرے سر پہ برستے کیوں ہو؟
میں نے تم کو بھی کبھی اپنا خدا رکھا ہے

 

اپنے ہاتھوں سے تراشے ہُوئے پتھر کے صنم
آج بُت خانے میں بھگوان بنے بیٹھے ہیں

-----------------------------------------------------------------

تاروں کا گو شمار میں آنا محال ہے
لیکن کسی کو نیند نہ آئے تو کیا کرے؟

 

موت کا ایک دن معین ہے
نیند کیوں رات بھر نہیں آتی؟

 

یہ نیند کی دیوی بھی عجب دشمنِ جاں ہے
آنکھوں سے سدا دور رہے رات گئے تک

------------------------------------------------------------------

یہاں‌رہوں گا تو پھر تیرے تذکرے ہوں گے
اگر کہو تو تِرا شہر چھوڑ جاؤں میں ؟ ؟​

 

ترک تعلقات کو اک لمحہ چاہیے
لیکن تمام عمر مجھے سوچنا پڑا

شب بیتی چاند بھی ڈوب چلا زنجیر پڑی دروازے پے
کیوں دیر گئے گھر آئے ہو، سجنی سے کرو گے بہانہ کیا؟

 

روٹھ جانا تو محبت کی علامت ہے مگر
کیا خبر تھی مجھ سے وہ اتنا خفا ہو جائے گا

---------------------------------------------------------------

ترکِ تعلقات پہ ، رویا نہ تُو نہ میں
لیکن یہ کیا؟ کہ چین سے سویا نہ تُو نہ میں​

 

واصف بھائی! میرے جواب سے پہلے ہی آپ کا پیغام آ گیا۔ خیر آپ کے شعر کا جواب ذرا سوچ کر دیتا ہوں۔

 

ابھی تو آئے ہو ٹھہرو ذرا چلے جانا
لگے گی دیر ذرا حالِ دل سُنانے میں

--------------------------------------------------------

تم بھول گئے مجھ کو تو کیا اِس میں تعجب
اِس دور میں کرتا ہے، کسے کون، کہاں یاد؟​

 

مری وہ باتیں تُو جن بے اختیار ہنستا تھا کِھلکھلا کے
بچھڑنے والے مری وہ باتیں کبھی رُلائیں تو لوٹ آنا

------------------------------------------------------------------------------------

کیا یاد ہیں تم کو وہ راتیں؟ ‌جب پیار سے کرتے تھے باتیں
ہم آج تلک اُن راتوں‌کے بے تاب بُلایا کرتے ہیں​

 

اگرچہ ہم جا رہے ہیں محفل سے نالہ دلفگار بن کر
مگر یقیں ہے کہ لوٹ آئیں گے نغمہ نو بہار بن کر

جو ہم نے داستاں اپنی سنائی، آپ کیوں روئے؟
تباہی تو ہمارے دل پہ آئی، آپ کیوں روئے؟

 

وقت خوش خوش کاٹنے کا مشورہ دیتے ہُوئے
رو پڑے وہ آپ مجھ کو حوصلہ دیتے ہُوئے

------------------------------------------------------------------------

توڑ کی دیکھ لیا آئنیہءِ دل تُو نے؟
تیری صورت کے سِوا اور بھلا کیا نکلا؟​

 

آئینے کے سو ٹکڑ ے کر کے ہم نے دیکھے ہیں
ایک میں‌بھی تنہا تھے سو میں بھی اکیلے ہیں

ستارہ کیا میری تقدیر کی خبر دے گا؟
وہ خود فراخئ افلاک میں ہے خوار و زبوں

 

خدا تجھے کسی طوفاں سے آشنا کر دے
کہ تیرے بحر کی موجوں میں‌اضطراب نہیں

عبث ہے شکوہ تقدیرِ یزداں
تو خود تقدیر یزداں کیوں نہیں‌ہے؟

 

صرف تقدیر پہ انسان بھروسہ نہ کرے
حسنِ نیت بھی ہو کوشش بھی ہو تدبیر بھی ہو

---------------------------------------------------------------------------

کیسے اب رہ پاؤں گی میں‌تیرے بن؟
میں ‌تو اکیلے مر جاؤں گی تیرے بن
مجھ کو اکیلا چھوڑ کے جانے والے بتا
کس کس سے ٹکراؤں گی اب تیرے بن؟​

 

گزر تو جائے گی تیرے بغیر بھی لیکن
بہت اداس بہت بیقرار گزرے گی

چھین کر لے گیا کون آج تیرا صبر و قرار؟
بیقراری کبھی اے دل تجھے ایسی تو نہ تھی

 

صبر و قرار جانے ہمیں آتا کیوں نہیں
شاید کہ ہو گیا ہے ہمیں‌ پیار آپ سے

---------------------------------------------------------------

کیا اسی لئے تقدیر نے چنوائے تھی تنکے
بن جائے نشیمن تو کوئی آگ لگا دے ؟​

 

کسی سرنگوں سی ڈالی پہ رکھیں گے چار تنکے
نہ بلند شاخ ہو گی نہ گِرے گا آشیانہ

یہ کہہ سکتے ہو ہم دل میں نہیں پر یہ تو بتلاو
کہ جب دل میں تمہی تم ہو تو آنکھوں سے نہاں کیوں ہو؟

 

وہ ایک سجدہ جسے تو گراں سمجھتا ہے
ہزار سجدوں سے دیتا ہے آدمی کو نجات

ہے اب اس معمورے میں قحط غم الفت اسد
ہم نے یہ مانا کہ دھلی میں‌رہیں کھائیں گے کیا؟