خوشگوار یادیں

عمر خیام بھائی ۔ آپکی یادداشتیں اور اندازِ تحریر بہت شاندار ہے۔ جیتے رہیں ۔ خوش رہیں

 

ھارون رشید بھائی میں نے بھی آپ کی ہی طرح ملک بلال کی اس بات پہ یہی کچھ لکھنا تھا۔ لیکن یہ بھی ایک مزاح کی ایک قسم ہے جو ملک بلال نے لکھی ہے ۔ کہ ایک بات جو بظاہر مزاحیہ نہ لگے، لیکن وہ بات ذہانت کے ساتھ مزاح سے ایسے ہی بھرپور ہو جیسے ڈالڈا بناسپتی گھی ممتا کے ساتھ ساتھ وٹامن اے اور ڈی سے بھرپور ہوتا ہے۔

 

خوشگوار یادوں میں صرف بچپن کے دن تھے بس۔۔تب ہنستے تھے کھیلتے تھے ۔۔ضد کرنا۔۔اگر مار یا ڈانٹ بھی پڑ جاتی تھی تب بھی دل پر نہیں لینا کسی بات کو ۔۔یہی عادت تھی۔۔سب سے اچھی یادوں میں گاوں جایا کرتے تھے عید کرنے دادی اماں کے پاس۔۔وہاں سب کزنز ہوتے۔۔چاند رات پوری جاگنا مہندی لگانا۔۔باتیں کرنا۔۔۔اب صرف یادیں ہیں کچھ بھی پہلے جیسا نہیں ہے۔۔نہ ہی ہو سکتا ہے۔۔

 

اب آپ کی عمر اللہ اللہ کرنے کی ہے کیا ؟

 

آہو۔۔ہاہاہا

 

اللہ اللہ کرنے کی ہر عمر ہوتی ہے کوئی فکس عمر نہیں ہوتی ۔۔

 

خوشگوار یادوں کے حوالے سے ہی لکھا ہے بھائی۔۔۔بچپن کی یادیں سب سے اچھی ہوتی ہیں۔۔جب بڑے ہوجایئں کچھ بھی پہلے جیسا نہیں ہوتا۔۔کھیلا بہت زیادہ ہے بچپن میں خاص کر گڑیا کے ساتھ۔۔پھر ریڈی یس۔۔پھر نیلی پری آنا۔۔ہاہاہا اور لڈو بھی بہت کھیلی ہے۔۔بچپن کا ہر دن ہی مزے کا ہوتا ہے۔۔

 

بچپن میں امی تازہ تازہ روٹیاں پکا کرگڈوی میں سے دیسی گھی لگا لگا ہمارے سامنے رکھتی تو ہم سب بہن بھائی صبح ناشتہ کرتے، کبھی چینی کے ساتھ کبھی سالن کے ساتھ اور کبھی دہی کے ساتھ۔ اور ان دنوں ہم پٹ سن کی بوریوں پر بیٹھ کر ناشتہ کرتے تھے۔۔۔۔۔۔۔۔

 

اس زمانے میں( لاہور کی سیر والے دور میں) لاہور سے ایک طنزومزاح کا ماہنامہ چاند باقاعدگی سے شائع ہوا کرتا تھا۔ ہم سکول کے زمانے سے اس میں چھوٹے موٹے چٹکلے یا اشعار اور غزلوں کی اوٹ پٹانگ سی پیروڈی لکھا کرتے تھے ۔جو کہ یقین جانیے یا نہ مانیے پسند بھی کی جاتی تھی ۔ کالج میں جاکے اس میں زیادہ شدومد سے لکھنے لگ گئے ۔کوئی فین میل میں خط بھی آجاتاجس کو پڑھ کر ہمارا حوصلہ اور خون بہت بڑھ جاتا۔ ہماری دیکھا دیکھی ہمارے گروپ کے سبھی لڑکے اس میں لکھنے لگ گئے ۔ اب ہم لاہور کی سیر کررہے تھے تو یہ ایک سنہرا موقعہ تھا کہ چاند کے دفتر جو کہ نسبت روڈ پر واقعہ تھا کا بنفس نفیس دورہ کیا جائے اورر" چاند" کے روح رواں کردار پیر جنگلی سے بالمشافہ ملا جائے اور ان کو بھی دیدار سے فیضیاب کرایا جائے ۔ شام کے دھندلے میں ڈھونڈتے ڈھنڈاتے اور پوچھتے پچھاتے نسبت روڈ پر اس دفتر کو تلاش کرنے میں کامیاب ہوگئے جو کہ ایک مدقوق سی بلڈنگ کی دوسری منزل پر تھا۔ اندھیری سیڑیوں پرسے ہوتے ہوئے ہم آدھا درجن سے زاید سرپھرے دگڑ دگڑ کرتے ایک کمرے میں آن پہنچے ۔ وہاں پر ایک چالیس واٹ کے بلب کی روشنی میں ایک منشی نما کاتب کاغذوں کے پلندے میں سر دیے بیٹھا تھا۔ ہماری یلغار سے بوکھلا گیا۔ لیکن ہم نے اس کو دلاسہ دیا کہ ہم اس پرچے کے بہت بڑے فین ہیں اور بہت دور سے اور بڑی مشکل سے یہاں آئے ہیں ۔ اور پیر جنگلی مدظلہ عالی سے ملاقات کے متمنی ہیں۔ اس نے کہا کہ اس وقت تو یہاں کوئی بھی نہیں۔ سب گھر چلے گئے ہیں ۔ کل آیئے گا ۔ اگلے دن کا ہم کو یارا نہ تھا ۔کیونکہ ہمارے شیڈول میں کوئی دن خالی نہ تھا ۔ اور دن اس لیے خالی نہ تھا جیب خالی ہونے سے پہلے ہم گھر لوٹ جانا چاہتے تھے ۔
ہماری یہ احتیاط کہ سب کشتیاں کبھی نہیں جلانی چاہیں اور آخری کشتی کے دوبنے سے پہلے پتوار موڑ دینے چاہیں ، کام آگئی ۔ واپسی ہماری ٹرین سے ہوئی ۔ یہ ہمارا ٹرین کا پہلا تجربہ تھا۔ اور بہت خوشگوار تجربہ تھا ۔ سارے راستے ہم نے ڈبے میں شغل میلہ لگائے رکھا ۔ ڈبے کے مسافر ہم سے بہت خوش تھے اور ہمارے چٹکلوں اور ہنسی مذاق سے خوب خوب لطف اندوز ہوتے رہے ۔یہ ہم لطف اندوز ہونے کا اس اعتماد سے اس لیے کہہ رہے ہیں کہ جس جس سٹیشن پہ جو بھی مسافر اترا، وہ "جیوندے رہو" کی دعا دیئے بغیر نہ اترا۔ وزیرآباد کے قریب گدھا ٹرین کے نیچے آگیا۔ وہاں ایک گھنٹا لگ گیا۔ اور پھر سرائے عالمگیر کے قریب ، پولیس سٹیشن کے پیچھے ٹرین پھر رک گئی ۔ کافی دیر وہاں لگ گئی ۔اور شام ہوگئی ۔ایک لڑکے کی امی کی خالہ سرائے عالمگیر میں رہتی تھی ، اب بھی رہتی ہے ۔ وہ وہیں اتر گیا۔ ایک جہلم جاکے اترا گیا کہ اس کی پھوپی جہلم کینٹ میں تھی ۔ ہمارا لیڈر کزن اپنے دو دوستوں کو لے کے جہلم میں کالاگوجراں اپنے کسی رشتہ داروں کے گھر روانہ ہوگیا ۔کزن نے ہمیں بھی بہت زور مارا کہ تم بھی ساتھ چلو۔ظاہر ہے وہ ہمارے بھی رشتہ دار تھے لیکن اتنی رات گئے اتنی دور کے رشتہ داروں کے ہاں اتنے جواں جہاں لڑکوں کا جانا ہم نے مناسب نہ سمجھا۔
ہم تین پیچھے رہ گئے ۔ میں نے ان کو کہا کہ جہلم میرا دیکھا بھالا شہر ہے ۔ یہاں ایک ایسی جگہ ہے جہاں بہت سستے داموں رات گذارے کے لیے کمرہ مل جائے گا۔ ریلوے روڈ جو شاندار چوک کی طرف جاتی ہے پر ناز سینما کے پاس ایک گلشن سرائے ہوا کرتی تھی ۔ وہاں پر ہم نے 15 روپے فی کس کے حساب سے تین چارپائیاں حاصل کیں ۔ میں نے45 روپے ادا کرکے چارپائیوں پر قبضہ جمایا۔ صحن میں لگے ہینڈ پمپ سے ہاتھ منہ دھو کر اور سامان مینیجر کے پاس جمع کرا کے کھانے پینے کی تلاش میں شہر کو نکل گئے ۔ عین شاندار چوک کے مرکز پر واقع بٹ کباب ہاؤس سے ایک کلو مرغ کڑاہی سیر ہوکے کھائی ۔ اس کا بل بھی 45 روپے ہی آیا ۔ جس کی ادائیگی میرے کزن نے کی ۔ یہ کزن کم اور دوست زیادہ تھا۔ اب بھی ہے ، اور الحمدللہ اسی طرح دوستی برقرار ہے ۔ اصولی طور پر اب ہم کو واپس سرائے کی طرف لوٹ جانا چاہیے تھا ، لیکن ہمارا تیسرا ساتھی ضد میں آگیا کہ تم دونوں نے خرچا کیا ہے اور میری گنجائش نہیں چھوڑی ۔ اس لیے میں بھی ضرور کہیں نہ کہیں خرچوں گا ۔ بہت سمجھایا کہ پھر کبھی سہی ، کسی اور جگہ سہی۔ لیکن وہ جاٹ تھا ، نہ مانا۔ اور سنیما میں فلم دکھانے لے گیا ۔ کوئی ڈھنگ کی فلم نہ لگی تھی ۔ کوئی فرینکنسٹائین قسم کی تھی ۔ اتنی ڈراؤنی بھی نہ تھی۔ اور نہ دیگر مصالحے تھے کہ 45 روپے کے ٹکٹوں کو " منی ویل سپینٹ" سمجھتے ۔

 

بہت زبردست عمر بھائی بہت روانی اور سادگی ہے آپ کی تحریر میں ایسا لگتا ہے کہ ہم بھی آپ کے ساتھ ہی گھوم پھر رہے ہیں ۔

 

" جوان جہان" اس لیئے کہ اس زمانے میں ہم واقعی جوان تھے، یعنی پسینہ گلاب ہوا کرتا تھا ، اور ساتھ ساتھ خلیل خان کی طرح فاختہ بھی اڑایا کرتے تھے ۔ یعنی پڑھنے اور کھیلنے کے علاوہ سوائے گھومنے کے اور کوئی کام نہ تھا۔
مصالحہ یعنی نہ انتقام کے شعلے ، نہ بدلے کی آگ ۔ نہ جذباتی ڈائیلاگ ، نہ معرکہ حسن و عشق، نہ رقیب روسیاہ کی چالیں ، نہسرسوں کے کھیتوں میں ہیجان خیز رقص ۔۔۔۔۔۔۔۔۔۔۔۔ بہت پھسپھسی فلم تھی ۔

 

پسندیدگی کا شکریہ ۔ آپ باقی کے سفروں میں بھی ساتھ گھوم پھر سکتی ہیں ۔۔۔۔۔۔۔۔۔۔ لیکن اپنے خرچے پر ۔۔۔۔ ٹکٹ آپ خود لیں، طعام ہمارے ذمے ۔

 

شکریہ عمر بھائی تو یہ آفر صرف میرے لیے ہے یا باقی سب بھی اس سے استفادہ کر سکتے ہیں اور اگر ایسا ہے تو میں یہ خوش خبری ہارون بھائی کو بتاتی ہوں آپ اپنی خیر منا لیں

 

ست بسم اللہ ۔ ھارون رشید بھائی نے کبھی موقعہ دیا تو ہم کو کھلا کھلا کے تھکا دیں گے ۔ کھلانے پلانے میں ہم اتنے ماڑے نہیں ہیں ۔ بلکہ خوشگوار یادیں میں ہم ایک دو واقعات بھی شئیر کریں گے جن میں میری تو نہیں لیکن میرے کچھ کزنز کی خوش خوراکی کی داستان رقم کی جائے گی ۔

 

ہم نئے نئے کوئٹہ آئے تو گھر میں پینٹ کا کام چل رہا تھا ابھی کچن بھی پیک ہی تھا جو مزدور کام کر رہے تھے ان کے لیے کھانا منگوانے کے لیے اپنے ملازم کو بھیجا کہ بازار سے ہی کھانا لے آئے دیکھا تو دس منٹ بعد ہی ملازم واپس آیا اور آتے ہی کہنے لگا توبہ توبہ باجی کوئٹہ تو بہت ہی مہنگا ہے میں کھانا لینے ہوٹل گیا تو وہ کہتے ہیں کہ یہاں تو چائے کا کپ بھی تین سو روپے کا ہے میں نے حیران ہو کر پوچھا تم کہاں گئے تھے کہنے لگا باجی یہ جو گھر سے باہر مین روڈ پر ہوٹل ہے پھر اس کے بعد ہمارے قہقے سن کر وہ حیران ہوا کہ باجی کو کیا ہوا ہے اصل میں ہماری گھر کے ساتھ ہی کوئٹہ کا 5سٹارسرینہ ہوٹل ہے اور ملازم وہاں کھانا لینے چلا گیا تھا ۔خیر بعد میں وہ خود بھی اپنی سادگی پر ہنستا رہا