عاطف حسین کی ڈائری

اپنی پلکوں پہ جمی گرد کا حاصل مانگے
وہ مسافر ہوں جو ہر موڑ پہ منزل مانگے

میری وسعت کی طلب نے مجھے محدود کیا
میں وہ دریا ہوں جو موجوں سے بھی ساحل مانگے

خواہش وصل کو سو رنگ کے مفہوم دئیے
بات آساں تھی مگر لفظ تو مشکل مانگے

دل کی ضد پر نہ خفا ہو میرے افلاک نشیں
دل تو پانی سے بھی عکس ماہ کامل مانگے

سانس میری تھی مگر اس سے طلب کی "محسن"
جیسے خیرات سخی سے کوئی سائل مانگے​

 

Re: کچھ میری ڈائری سے!

رات ہو جائے گی تو چاند دکھائی دے گا
تیرا چہرا میرے خوابوں کی گواہی دے گا

یہ محبت ہے ذرا احتیاط سے کرنا
ایک آنسو بھی گرے گا تو سنائی دے گا
​

 

Re: کچھ میری ڈائری سے!

غم دل سنانے کو جی چاہتا ہے
تمہیں آذمانے کو جی چاہتا ہے

سنا ہے یہ جب سے بہت دور ہو تم
بہت دور جانے کو جی چاہتا ہے

ہمیں ان سے کوئی شکایت نہیں ہے
یونہی روٹھ جانے کو جی چاہتا ہے

دعا ہے کہ وہ ہم سے سو بار روٹھیں
ہمارا منانے کو جی چاہتا ہے​

 

داو پیچ

سمجھ جاتا ہوں لیکن دیر سے میں داؤ پیچ اُسکے
وہ بازی جیت جاتا یے میرے چالاک ہونے تک

 

Re: داو پیچ

عاطف بھائی! کبھی استقامت یہ رنگ بھی تو لاتی ہے:

وہ ملا تو صدیوں‌کے بعد بھی مرے لب پہ کوئی گلہ نہ تھا
اسے میری چپ نے رلا دیا جسے گفتگو میں کمال تھا​

کیا خیال ہے؟

 

Re: کچھ میری ڈائری سے!

عاطف جی کی ڈائری اچھی معلوم ہوتی ہے

 

ماں

مخالف وقت اور ہر بدگماں کو روک رکھا ہے
ہر اک حاسد کی ذہریلی ذباں کو روک رکھا ہے

اترتی ہی نہیں اسلئے مجھ پر کوئی بھی آفت
میری ماں کی دعا نے آسماں کو روک رکھا ہے​

 

Re: کچھ میری ڈائری سے!

تم سے منزل کا نہیں رشتہ، سفر کا ہے میرا
دھیان جاتا ہی نہیں ہے تمہیں پانے کی طرف​

 

Re: کچھ میری ڈائری سے!

اچھا انتخاب

 

Re: کچھ میری ڈائری سے!

عبد الجبار بھائی آپ نے عاطف بھائی کو پرچہ کے ایسا ڈراوا دیا کہ وہ لوٹ کو ہی نہیں آئے۔

بہرحال انکی ڈائری سے یہ شعر بہت پسند آیا۔

 

Re: کچھ میری ڈائری سے!

میری بےلوث محبت نے ڈبویا ھے مجھے
اتنا مخلص ہوں کہ ہر دل میں اتر جاتا ہوں

 

Re: کچھ میری ڈائری سے!

واہ بھئی بہت خوب۔
اتنا مخلص ہوں کہ ہر دل میں اتر جاتا ہوں۔

کیا خوب کہا

 

Re: کچھ میری ڈائری سے!

مجھے تو یوں لگتا ہے جیسے شاعر مخلص نہیں بلکہ خاصا دل پھینک واقع ہوا ہے جو ہر کسی کے دل میں اترنے کو بے تاب رہتا ہے۔

آپ کا کیا خیال ہے؟

 

Re: کچھ میری ڈائری سے!

میرے خیال میں یہاں شاعر کی حیثیت مفعولی (Subjective) ہے۔ فاعلی نہیں

 

Re: کچھ میری ڈائری سے!

عرض ہے:

تنہائیوں میں بھی دلِ تنہا نہیں لگتا
اور بھیڑ میں چہرہ بھی شناسا نہیں لگتا
وہ جانتا ہے رسم و رہِ دنیا نبھانا بھی
اک ہم سے ملنا ہی اسے اچھا نہیں لگتا​

 

Re: کچھ میری ڈائری سے!

ناصر کاظمی کی غزل


اپنی دُھن میں رہتا ہوں
میں بھی تیرے جیسا ہوں

او پچھلی رت کے ساتھی
اب کے برس میں تنہا ہوں

اپنی لہر ہے اپنا روگ
دریا ہوں اور پیاسا ہوں

تیری گلی میں سارا دن
دکھ کے کنکر چنتا ہوں

مجھ سے آنکھ ملائے کون
میں تیرا آئینہ ہوں

تو جیون کی بھری گلی
میں جنگل کا رستہ ہوں

آتی رت مجھ روئے گی
جاتی رت کا جھونکا ہوں
(ناصر کاظمی)​

 

Re: کچھ میری ڈائری سے!

گنگناتی ہوئی آتی ہیں فلک سے بوندیں
کوئی بدلی تیری پازیب سے ٹکرائی ہے​

 

ماں

مخالف وقت اور ہر بدگماں کو روک رکھا ہے
ہر اِک حاسد کی زہریلی زباں کو روک رکھا ہے

اترتی ہی نہیں اس لئے مجھ پر کوئی بھی آفت
میری ماں کی دعا نے آسماں کو روک رکھا ہے​

 

Re: کچھ میری ڈائری سے!

جب سے تو نے مجھے دیوانہ بنا رکھا ہے
سنگ ہر شخص نے ہاتھوں میں اٹھا رکھا ہے

پتھرو ! آج میرے سر پہ برستے کیوں ہو
میں نے تم کو بھی کبھی اپنا خدا رکھا ہے

اسکے دل پہ بھی کڑی عشق میں گذری ہو گی
نام جس نے بھی محبت کا سزا رکھا ہے

پی جا ایام کی تلخی کو بھی ہنس کر ناصر
غم کے سہنے میں بھی قدرت نے مزہ رکھا ہے

(ناصر کاظمی)​

 

Re: کچھ میری ڈائری سے!

ہندی زبان کے چند پسندیدہ اشعار حاضر ہیں

ندی کنارے میں کھڑی اور پانی جھلمل ہوئے
جکرے کارن میں جلی کہیں وہی نہ جلتا ہوئے

ندی کنارے دھواں اٹھت ہے میں سمجھی کچھ ہوئے
میں میلی پیا اجلے رے مورا کس بد مِل نہ ہوئے

پیتم گر میں جانتی کہ پریت کرے دکھ ہوئے
نگر ڈھنڈورا پیٹتی اجی پریت نہ کرے کوئے​

 

Re: کچھ میری ڈائری سے!

قمر جلالوی کی غزل :

کہتے ہیں مجھے عشق کا افسانہ چاہیے
رسوائی ہو گئی تمھیں شرمانا چاہیئے

خوددار اتنی فطرتِ رندانہ چاہیئے
ساقی یہ خود کہے تجھے پیمانہ چاہیئے

عاشق بغیر حسن و جوانی فضول ہے
جب شمع جل رہی ہو تو پروانہ چاہیئے

آنکھوں‌میں دم رُکا ہے کسی کے لیے ضرور
ورنہ مریضِ ہجر کو مر جانا چاہیئے

وعدہ تھا انکا رات کے آنے کا اے قمر
اب چاند چھپ گیا انہیں آ جانا چاہیئے

(قمر جلالوی)​

 

اک بھکارن!

اک بھکارن!
شہر کے مصروف چوراہے کی اندھی بھیڑ میں
اپنے فاقوں سے اٹی خواہش کی ضد پر
بیچنے آئی ہے
اپنی نوجوانی کا غرور ۔۔ !
توڑنے آئی ہے بے صورت انا کے آئینے
بے حنا ہاتھوں میں پھیلائے ہوئے
بس “چند لمحے“ زندہ رہنے کا سوال!
“چند لمحے“ جن کا ماضی ہے نہ حال ۔۔!
آنکھ میں بجھتی ہوئی اک موج نور
تن پہ لپٹے چیتھڑوں کی سلوٹوں میں
سانس لیتے واہمے ۔۔ !
دم توڑتا احساس، لو دیتا شعور !
زندگی کے دو کنارے ۔۔ چار سو
اک طرف ہنگامہ اہلِ ہوس ۔۔ اک سمت ھو !!
کس قدر مہنگی ہیں “باسی روٹیاں“
کتنی سستی ہے “متاع آبرو“
اے خدائے کاخ و کو ۔۔۔ !!​

 

Re: کچھ میری ڈائری سے!

حیثیت !

یہ خوبرو لوگ جنکی آنکھیں
تمہارے اجلے بدن پہ چسپاں

تمہارے نقشِ قدم کی خوشبو میں ثبت ایسے
بھنور میں جیسے حنا کے پتے !

میں سوچتا ہوں !
کہ اتنی آنکھوں کے دائروں میں

میری اکیلی اُداس آنکھوں کی حثیت کیا؟
میری وفا کا مقام کیا ہے؟ میری محبت کا نام کیا ہے؟​

 

Re: کچھ میری ڈائری سے!

“پاگل لڑکی“

پہلے میرے خط کے اُس نے
اک انجانے خوف سے ڈر کر
ٹکڑے ٹکڑے کر ڈالے

“اب“

ایک حسیں احساس کے تابع
جسکا کوئی نام نہیں ہے
پچھلے کتنے ہی گھنٹوں سے
دروازے کی اوٹ میں چھپ کر
ٹکڑے جوڑ رہی ہے ۔۔ پاگل

(وصی شاہ - آنکھیں بھیگ جاتی ہیں)​

 

جیون !

کس کو پیارا نہیں جیون لیکن
آپ کہتے ہیں تو مر جاتے ہیں​

 

Re: کچھ میری ڈائری سے!

تجھے بھلا کے جیوں، ایسی بددعا بھی نہ دے
خدا مجھے یہ تحمل، یہ حوصلہ بھی نہ دے

مرے بیانِ صفائی کے درمیان نہ بول
سنے بغیر مجھے اپنا فیصلہ بھی نہ دے

یہ عمر میں نے تیرے نام بے طلب لکھ دی
بھلے سے دامنِ دل میں کہیں جگہ بھی نہ دے

یہ دن بھی آئیں کے ایسا کبھی سوچا بھی نہ تھا
وہ مجھ کو دیکھ بھی لے اور مسکرا بھی نہ دے

یہ رنجشیں تو محبت کے پھول ہیں ‘ساجد‘
ٌتعلقات کو اِس بات پہ گنواہ بھی نہ دے​

 

Re: کچھ میری ڈائری سے!

واہ بھئی عاطف بھائی ۔ بہت خوب کلام ہے۔

ایک غزل آپ کی نذر

وقت کے ٹھکرائے کو گردانتا کوئی نہیں
جانتے ہیں سب مجھے، پہچانتا کوئی نہیں

آج بھی ہر خواب کی تعبیر ممکن ہے مگر
یہ سنہرا عزم دل میں‌ٹھانتا کوئی نہیں

جب سے میں‌نے گفتگو میں جھوٹ شامل کر لیا
میری باتوں کا برا اب مانتا کوئی نہیں

کچھ تو ہوگا حال سے ماضی میں‌ہجرت کا سبب
یونہی بس یادوں کی چادر تانتا کوئی نہیں

میں جو کچھ بھی کہا سچ کے سوا کچھ نہ کہا
پھر بھی آزر بات میری مانتا کوئی نہیں

(ڈاکٹر فریاد آزر)​