پسندیدہ غزلیات، نظمیات

بہت خوب محبوب صاحب اور عبدالجبار صاحب۔۔۔بہت خوب۔۔

 

شام ڈھلنے والی ہے سوچتے ہیں گھر جائیں
پھر خیال آتا ہے، کس طرف، کدھر جائیں
ہجرتی پرندوں کا کچھ یقیں نہیں‌ ہوتا
کب ہوا کا رخ بدلے کب یہ کوچ کر جائیں
دھوپ کے مسافر بھی کیا عجب مسافر ہیں
سائے میں ٹھہر کر یہ سائے سے ہی ڈر جائیں
دوسرے کنارے پر تیسرا نہ ہو کوئی
پھر تو ہم بھی دریا میں بے خطر اتر جائیں
کون بچ کے نکلا ہے ڈوب کر اُن آنکھوں‌میں
کاش ایسا ہو جائے کاش ہم بھی مر جائیں
سوچئے تو ہم سب اک خاکداں میں رہتے ہیں
خاک میں نمو پائیں خاک میں‌بکھر جائیں
گر سعید کھل جائے بند ایک دریچہ پھر
اس اداس بستی کے لوگ بھی سنور جائیں

(معظم سعید۔۔۔کراچی)​

 

سوندھی مٹی کی یہ صراحی
قطرہ قطرہ گونج رہی ہے
بھیگی بھیگی شبنم کی رم جھم کرتی جھنکاروں سے
جب بھی کوئی پیاس بجھانے
اوک میں پانی بھرتا ہے
جانے کیسے چوری چوری
پار سمندر کرتا ہے
سوندھی سوندھی خوشبو
اس کی روح کے پار اُترتی ہے
دور بہت ہی دور جزیروں میں جو تارے گرتے ہیں
ان کی یاد میں پگڈنڈی پر
سبک روی سے چلتی ہے
دھوپ چھاؤں میں سال مہینے
پنچھی بن کر اڑتے ہیں
آنکھ پرونے لگتی ہے کچھ نتھرے لمحے صراحی سے
پینے والے میں تتلی کے پر
خود سے اگ آتے ہیں
نیلے پانی کی ٹھنڈک سے
آنکھیں مندنے لگتی ہیں
دل کہتا ہے قطروں کی ان لاوارث آوازوں کو
کانچ کے دریا کی تہہ میں
اک ڈوبنے والی کشتی پر
پھر سے بٹھا کر دوراسی ساحل تک جا کر پہنچائیں
جس کی ریت کی سوندھی خوشبو
سب کو پاگل کرتی ہے۔

(فرزانہ نیناں)

 

بہت خوب
عائشہ جاوید صاحبہ

 

کوئی ظالم جو چھُپ کر گا رہا ہے
دلِ بے تاب کو برما رہا ہے
مجھے کیا چاہئے اس سے زیادہ
میں روتا ہوں کوئی شرما رہا ہے
فرشتے ڈھونڈھتے پھرتے ہیں شعلے
کوئی عاشق بنایا جا رہا ہے
خمیر اک پیکرِ زھرہ جبیں کا
ستاروں سے اٹھایا جا رہا ہے
یہ آنسو؟۔۔کون جانے ان کا مطلب!
پرانا واقعہ یاد آرہا ہے
مجھے یاد آرہا ہے اک حسیں خواب
دلِ مجبور بیٹھا جا رہا ہے
کسی نے لطف کی نظروں سے دیکھا
گیا وقت آج واپس آرہا ہے
مرے مقصد کو بھی کوئی سمجھتا!
مجھے سارا جہاں سمجھا رہا ہے​

(احمد ندیم قاسمی)​

 

سنتا ہے کون حال پریشاں تِرے بغیر
سُونی پڑی ہے انجمن جان تِرے بغیر

تیرے بغیر کچھ بھی نہیں لذتِ حیات
منزل ہے مجھ کو شامِ غریباں تِرے بغیر

کس سے کریں سوال کسے دیں دعائے خیر
ویراں ہے آج محفلِ رنداں تِرے بغیر

ڈر ہے کہیں‌فضا میں نہ رہ جائے گونج کر
تھرا رہا ہے نعرہء مستاں تِرے بغیر

تیرے بغیر جان بھی کس طرح دے سعید
دشوار ہے یہ مشکل آساں تِرے بغیر

(سعید الہ آبادی)​

 

وقت کے ہاتھوں حکایاتِ انا بھول گئے
ہم وفا بھول گئے، آپ جفا بھول گئے

کس کو سمجھائیں یہ سمجھانے کی باتیں کب ہیں
وصل کب یاد رہا، ہجر میں کیا بھول گئے

کیا چمن چھوڑا، پلٹ کر نہیں دیکھا اس کو
رنگِ گل، بوئے سمن، بادِ صبا، بھول گئے

ایسا ویران ہوا کعبۂ ہستی یارب
رہ گئے ہاتھ اٹھے، حرفِ دعا بھول گئے

بجھ گئی شمعِ جنوں، لٹ گئی بزمِ یاراں
اہل دل، سوزشِ جاں، ہوتی ہے کیا، بھول گئے

شہرِ جاناں میں نہیں پوچھنے والا کوئی
کون ہو، آئے ہو کیوں، تم یہاں کیا بھول گئے

خوب سرور تمھیں امید کرم یاد رہی
کیا ستم ہے کہ گناہوں کی سزا بھول گئے

(سرور عالم)

 

بہت خوب محبوب خان صاحب اور بہت ہی خوب عائشہ جاوید صاحبہ۔۔۔

 

مجھے تنہائیوں کی دھوپ میں چلنے کی عادت ہے
کوئی بھی کیفیت دل میں زیادہ دیر کب اترے
وہی تو جانتا ہے منتظر تھی کب سے میں اس کی
سوال خامشی کے گرم میلوں کی دوپہروں میں
وہ آنکھیں جانتی ہیں دیر تک اس بند مٹھی میں
میں اس بہتے ہوئے پانی کو روکے رہ نہیں سکتی
خراشیں دکھ رہی ہیں پانی پڑتے ہی جلن کچھ اور بھی ہوگی
جنوں کےحرف یکدم آنسوؤں کا اوڑھ کر چہرہ
ٹپک کر چیختی چنگھاڑتی لہریں بہاتے ہیں
خدا جانے میں اپنی دھوپ کی پگڈنڈیوں کےموڑ
اندھیروں کےتعاقب میں کیوں ایسے دوڑ کر اتری
کہ ٹھاٹھیں مارتا پانی
مری آنکھوں کی ساری سرخ اینٹیں توڑ کر نکلا
یہ آنکھیں جانتی تھیں پانی پڑتےہی جلن
کچھ اور بھی ہوگی
وہی یہ جانتا تھا
منتظر اس کی تھی میں کب سے
وہی اک پیاس تھی جو خشک ہونٹوں پر بنی سسکی
اسی پانی کی اس کو بھی بہت دن سےضرورت تھی
کسی سائے بنا اس نے کبھی چلنا نہیں سیکھا
کسی بھیگی اداسی کا بھی کوئی پل نہیں چکھا
سو میں نے بخش دی وہ بھی
جو گھر میں ٹین کی چھت تھی
مجھے تنہائیوں کی دھوپ میں جلنے کی عادت تھی
مجھے تنہائیوں کی دھوپ میں چلنے کی عادت ہے

(فرزانہ نیناں)

 

بہت خوب عائشہ جی ! بہت عمدہ کلام ہے
بہت پسند آیا ۔ :a180:

 

بہت خؤب

 

بہت خوب عائشہ جی۔ :a180:

 

رات کے خواب سنائیں کس کو، رات کے خواب سہانے تھے
دھندلے دھندلے چہرے تھے پر سب جانے پہچانے تھے

ضدی، وحشی، الہڑ، چنچل، میٹھے لوگ، رسیلے لوگ
ہونٹ ان کے غزلوں کے مصرے، آنکھوں میں افسانے تھے

یہ لڑکی تو ان گلیوں میں روز ہی گھوما کرتی تھی
اس سے ان کو ملنا تھا، تو اس کے لاکھ بہانے تھے

ہم کو ساری رات جگایا جلتے بجھتے تاروں نے
ہم کیوں ان کے در پر اترے کتنے اور ٹھکانے تھے

وحشت کا عنوان ہماری ان میں سے جو نار بنی
دیکھیں گے تو لوگ کہیں گے انشاء جی دیوانے تھے



(انشاء جی)​

 

مجھے یاد کوئی دعا نہیں میرے ہمسفر ابھی سوچ لے
تو میری جبیں پہ لکھا نہیں میرے ہمسفر ابھی سوچ لے

ابھی راستہ بھی ہے دھول میں ابھی فائدہ بھی ہے بھول میں
ابھی مجھ کو تجھ سےگلہ نہیں‌میرے ہمسفر ابھی سوچ لے

میں جنم جنم سے ناراض ہوں میں جنم جنم سے اداس ہوں
میں کبھی بھی کھل کے ہنسا نہیں میرے ہمسفر ابھی سوچ لے

تو ہے خواب خواب پکارتا میری آنکھ میں نہیں اشک بھی
میں مدتوں سے جیا نہیں میرے ہمسفر ابھی سوچ لے

تجھے خوشبوؤں کی ہے آرزو تجھے روشنی کی ہے جستجو
میں ہوا نہیں، دیا نہیں، میرے ہمسفر ابھی سوچ لے

تجھے آنسوؤں کا پتہ نہیں، تجھے رتجگوں کا گماں نہیں
تجھے اس سے آگے پتہ نہیں، میرے ہمسفر ابھی سوچ لے

کہیں چھوٹ سکتا ہے درمیاں، زمیں ملے گی نہ آسماں
تجھے راستے کا پتہ نہیں، میرے ہمسفر ابھی سوچ لے

مجھے ڈھونڈتا ہی پھرے گا تو، نہ جئے گا، روز مرے گا تو
میں کبھی بھی گھر پہ ملا نہیں میرے ہمسفر ابھی سوچ لے

کہو لوٹنا ہے کسے یہاں، میرے درد سن میرے مہرباں
میرے پاس وقت ذرا نہیں، میرے ہمسفر ابھی سوچ لے​

 

کوئی ایسا شخص ہوا کرے

مجھ ہی سے باتیں‌ کیا کرے
جو میرے لیے ہی سجا کرے
کسی اور کو نہ تکا کرے
نہ شکایتیں ، نہ گلہ کرے

کبھی روئے جائے وہ بےپناہ
کبھی بےتحاشا اداس ہو
کبھی چپکے چپکے دبے قدم
میرے پیچھے آ کے ہنسا کرے

کوئی ایسا شخص ہوا کرے

میری قربتیں میری چاہتیں
کوئی یاد کر کے قدم قدم
میں طویل سفر میں ہوں اگر
میری واپسی کی دعا کرے

کوئی ایسا شخص ہوا کرے

 

بہت خوب

 

وہ میری ذات میں جب تک رہا، لکھنا نہیں بھولی
کوئی بھی درد جو میں نے سہا، لکھنا نہیں بھولی

وہ جو محور تھا لکھنے کا، جدا ہو کر ملا اک دن
ملا تو یہ کہا اس نے سنا، لکھنا نہیں بھولی

سنا ہے اب بھی چاہت میں تمہارا نام سائل ہے
سنا ہے ابھی تم مجھ کو خدا، لکھنا نہیں بھولی

سنا ہے اب بھی تم مجھ کو میرے ساحر بلاتی ہو
سنا ہے مجھ کو رگ رگ میں بسا، لکھنا نہیں بھولی

کہا کہ بھول بیٹھی ہوں ہتھیلی پر حنا لکھنا
مگر میں آسمانوں پر دعا، لکھنا نہیں بھولی

سمے کے اٹھتے ماتھے پر تجھے ڈھونڈا، بہت ڈھونڈا
سمے کے جھکتے شانوں پر سدا، لکھنا نہیں بھولی

مجھے اک دن میرے کاتب نے لکھا تھا جدا تجھ سے
میں تجھ کو آج بھی خود سے جدا، لکھنا نہیں بھولی

چھپانے کےلئے سب دکھ ابھی بھی مسکراتی ہوں
میں اب بھی چہرے پر چہرہ نیا ، لکھنا نہیں بھولی

میں اب بھی اس جدائی کے کئی دکھ درد سہتی ہوں
میں اب بھی تیری آنکھوں کو شفا، لکھنا نہیں بھولی

کیا تھا ترکِ تعلق کا ارادہ ایک پل میں نے
میں اب بھی اس ارادے کو سزا، لکھنا نہیں بھولی

بتاؤ تم مجھے جاناں! میں کیسے بھول سکتی ہوں
ابھی قدرت میرا جیون نما، لکھنا نہیں بھولی

جدائی کاٹ لی میں نے مگر مرنے سے کچھ پہلے
میں زنداں کے دریچے پر صبا، لکھنا نہیں بھولی​

 

چھپانے کےلئے سب دکھ ابھی بھی مسکراتی ہوں
میں اب بھی چہرے پر چہرہ نیا ، لکھنا نہیں بھولی


بہت خوب جناب۔۔۔

 

واہ بھئی بہت خوبصورت دعا ہے۔ اسے تو کنواروں کی پارلیمنٹ کا قومی ترانہ ہونا چاہئے :hasna:

 

جو ساری کتابیں سمیٹ کر
پھر ان کو دھیان سے پڑھا کرے

پھر کسی دن کمرہ امتحان میں
وہ میری جگہ پہ لکھا کرے


کوئی ایسا شخص ھوا کرے
آئے اول وہ امتحان میں
تو اپنی ڈگری مجھے وہ دیا کرے
کوئی ایسا شخص ھوا کرے

 

محبوب بھائی اتنی خوبصورت غزل شئیر کرنے پر شکریہ

 

:201: واہ بھئی بہت خوب۔ "طالب علم کی فریاد" عنوان ہونا چاہئے۔

 

میری زندگی تو فراق ہے، وہ ازل سے دل میں مکیں سہی
وہ نگاہِ شوق سے دور ہیں، رگِ جاں سے لاکھ قریں سہی

ہمیں جان دینی ہے ایک دن، وہ کسی طرح وہ کہیں سہی
ہمیں آپ کھینچیے دار پر، جو نہیں کوئی تو ہمِیں سہی

سرِ طور ہو،سرِ حشر ہو،ہمیں انتظار قبول ہے
وہ کبھی ملیں،وہ کہیں ملیں،وہ کبھی سہی،وہ کہیں سہی

جو ہو فیصلہ وہ سنائیے، اسے حشر پر نہ اٹھائیے
جو کریں گے آپ ستم وہاں،وہ ابھی سہی وہ یہیں سہی

اسے دیکھنے کی جو لو لگی تو نصیر دیکھ ہی لیں گے ہم
وہ ہزار آنکھ سے دور ہو، وہ ہزار پردہ نشیں سہی!!!​