لفظِ “یوں“ پر شعر کہیں

یہاں ایک نیا سلسلہ شروع کیا جا رہا ہے۔ یہاں آپ ایسے اشعار دیں گے جس میں لفظِ یوں استعمال ہو۔

لفظِ یوں پر ایک پیاری سی غزل حاضر ہے۔

پھر یوں‌ہوا کہ دکھ ہی اُٹھائے تمام عُمر
پھر یوں ہوا کہ آنسو بہائے تمام عُمر

پھر یوں ہوا کہ نِکلے کسی کی تلاش میں
پھر یوں ہوا کہ خود کو نہ پائے تمام عُمر

پھر یوں ہوا کہ باتوں میں ہم اُس کی آگئے
پھر یوں ہوا کہ دھوکے ہی کھائے تمام عُمر

پھر یوں ہوا کہ دل میں کسی کو بسا لیا
پھر یوں ہوا کہ خواب سجائے تمام عُمر

پھر یوں ہوا کہ وعدہ وفا کر نہ سکا وہ
پھر یوں‌ہوا دیپ جلائے تمام عُمر

پھر یوں ہوا کہ دامنِ دل داغ داغ تھا
پھر یوں ہوا کہ داغ مٹائے تمام عُمر

پھر یوں ہوا کہ راستے ویران ہو گئے
پھر یوں‌ہوا کہ پھول کِھلائے تمام عُمر

پھر یوں ہوا کہ دکھ ہمیں محبوب ہو گئے
پھر یوں ہوا کہ دل سے لگائے تمام عُمر

پھر یوں ہوا کہ اور کسی کے نہ ہو سکے
پھر یوں ہوا کہ وعدے نبھائے تمام عُمر

پھر یوں ہوا کہ فاصلے بڑھتے چلے گئے
پھر یوں ہوا کہ رنج بُھلائے تمام عُمر

پھر یوں ہوا کہ بیٹھ گئے راہ میں غیاث
پھر یوں ہوا کہ وہ بھی نہ آئے تمام عُمر

(غیاث الدین غیاث)​

 

گر کیا ناصح نے ہم کو قید اچھا یوں سہی
یہ جنونِ عشق کے انداز چھٹ جائیں گے کیا؟

 

یوں اُداس اُداس پِھرنا، یہ کسی سے کچھ نہ کہنا
یوں بے سبب نہیں ہے، کوئی حادثہ تو ہو گا​

 

یوں تو پتھر کی بھی تقدیر بدل سکتی ہے
شرط یہ ہے کہ اُسے دل سے تراشا جائے​

 

دل کیسے توڑ دیتے ہیں سمجھا دیا کہ یوں
پتھر کو اس نے شیشے سے ٹکرا دیا کہ یوں
پوچھا گھٹائیں جھوم کے‌چھاتی ہیں‌کس طرح
اس نے ہوا میں زلفوں کو لہرا دیا کہ یوں

 

یوں بھی ہوتا ہے کہ طوفاں کے تھپیڑے آتش
ڈوبنے والے کو ساحل پہ لگا دیتے ہیں​

 

کبھی یوں بھی آ مِری آنکھ میں، کہ مِری نظر کو خبر نہ ہو
مجھ ایک رات نواز دے ، مگر اُس کے بعد سحر نہ ہو​

 

یوں حسرتوں کے داغ محبت سے دھو لئے
خود دل سے دل کی بات کہی اور رو لئے​

(مجھے شک ہے کہ شائد شعر میں معمولی غلطی ہو، اگر ہو تو پیشگی معذرت، اور درستگی بھی کر دیجیئے گا، شکریہ)

 

ابھی وہ خوش، ابھی نا خوش، کرم یوں بھی ہے اور یوں بھی
تصّرف اُن کا مجھ پر بیش و کم یوں بھی ہے اور یوں بھی​

 

عشق کو شرک کی حد تک نہ بڑھا
یوں نہ مل مجھ سے خُدا ہو جیسے​

 

لوگ یوں دیکھ کے ہنس دیتے ہیں
تُو مجھے بھول گیا ہو جیسے​

 

یوں نہ مل مجھ سے خفا ہو جیسے
ساتھ چل موجِ صبا ہو جیسے​

 

یوں تو میں ہنس پڑا ہوں تمہارے لئے مگر
کتنے ستارے ٹوٹ پڑے اک ہنسی کے ساتھ​

 

جب خیالوں میں ترے روضے کی جالی چوم لی
یوں لگا ، ہم کو تو گھر بیٹھے مدینہ مل گیا​

 

یوں بھی ہوتا ہے طوفاں کے تھپیڑے آتش
ڈوبنے والے کو ساحل پہ لگا دیتے ہیں​