سوالیہ بیت بازی

روٹھ کر ملنے جو جاتا ہوں تو کہتا ہے وہ شوخ​

کل خفا تم تھے مزاج آج ہے ناساز اپنا​

-----------​

کتنے لمحے گھات لگائے بیٹھے ہیں
کتنے چہرے بیت چکے آئینے پر​

 

وقت معلوم کی دہشت سے لرزتا ہوا دل
ڈوبا جاتا ہے کہ مہلت نہیں ملنے والی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ رات کا بے نوا مسافر، وہ تیرا شاعر وہ تیرا ناصر
تیری گلی تک تو ہم نے دیکھا، پھر نہ جانے کدھر گیا وہ

 

میری چھت سے رات کی سیج تک کوئی آنسوؤں کی لکیر ہے
ذرا بڑھ کے چاند سے پوچھنا وہ اسی طرف سے گیا نہ ہو
-----------

میں اسوقت سے ڈرتا ہوں کہ پوچھ نہ لے
یہ اگر ضبط کا آ نسو ہے تو ٹپکا کیسے ؟​

 

مجھے اپنے ضبط پے ناز تھا سرے بزم رات میں کیا ہوا
میری آنکھ کیسے چھلک گئی مجھے رنج ہے یہ برا ہوا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اِک موجِ خونِ خَلق تھی، کس کی جبیں پہ تھی؟
اِک طو قِ فردِ جرم تھا ،کس کے گلے میں تھا؟

 

لہو گرا ہے مگر ایک بھی سراغ نہیں
تمام شہر کے ہاتھوں پہ کوئی داغ نہیں
------------
کب تک رہیں خاموش ہم مقتل کو سجتے دیکھ کر
ہونے لگا ہو شہر میں جب کشت و خوں تو کیا کریں

 

گھبرا نہ میری جاں!کہ کٹ جائے گی یہ بھی
بے صبح تو دنیا میں کوئی رات نہیں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غم نہیں کچھ حاسدوں کی حرف گیری کا نصیر
رات کے تارے کہیں ٹھہرے سحر کے سامنے؟

 

سحر کے ساتھ ہی سورج کا ہمرکاب ہوا​

جو اپنے آپ سے نکلا وہ کامیاب ہوا​

----------​

موسم کا کوئی محرم ہو تو اس سے پوچھو
کتنے پت جھڑ ابھی باقی ہیں بہار آنے میں

 

پت جھڑ میں بچھڑتے،کوئی امید تو رہتی
پھر موسمِ گل کا کوئی امکاں تو رہتا
پھر ملنے کا وعدہ ہی بڑی بات ہے خاور
پھر کون ملا ہے ؟،مگر احسان تو رہتا
۔۔۔۔۔۔۔۔۔۔۔۔۔۔۔۔۔۔۔۔
کس کی آواز سے لرزاں ہے یہ خاموشی ِدل
کون اس قریۂ حیرت میں قدم رکھتا ہے؟

 

صرف دھندلائے ستاروں کی چمک دیکھی ہے
کب ہوا کون ہوا مجھ سے خفا یاد نہیں
----------
جو تھے شناور بحر کی تہ سے موتی چن کر لے بھی گئے
ہم ساحل پر سوچ رہے ہیں پانی کتنا گہرا ہے

 

نہ یہ عالی جناب اٹھے، نہ وہ عالی مقام آئے
جب آئی آنچ صحرا پر تو دیوانے ہی کام آئے
۔۔۔۔۔۔۔۔۔۔۔۔۔۔۔۔۔۔۔۔۔۔
کیا ڈھونڈتے ہو فصلِ خزاں میں بہار کو
اب وہ چمن کہاں ہے وہ رنگِ چمن کہاں؟

 

رہیں گے چل کے کہیں اوراگر یہاں نہ رہے​

بَلا سے اپنی جو آباد گُلِستاں نہ رہے​

----------​

ہونا تو چاہیے کہ یہ میرا ہی عکس ہو!
لیکن یہ آئینے میں مرے روبرو ہے کون!​

 

دیکھو یہ کسی اور کی آنکھیں ہیں کہ میری
دیکھوں یہ کسی اور کا چہرہ ہے کہ تم ہو
۔۔۔۔۔۔۔۔۔۔۔۔۔۔۔۔۔۔۔۔
دیکھئے ،پھر خطا ہوئی سرزد
آپ نے کیوں مجھے معاف کیا؟

 

خیالِ خاطرِ احباب اور کیا کرتے
جگر پہ زخم بھی کھائے شمار بھی نہ کیا
-----------

بول اے مرے دیار کی سوئی ہوئی زمیں​

میں جن کو ڈھونڈتا ہوں کہاں ہیں وہ آدمی​

 

تھا زمانہ کہ عظمت کا مینار تھے
ہے زمانہ زمیں پر فقط بار ہیں
تھا زمانہ کہ گلہائے رنگیں تھے ہم
ہے زمانہ کہ بکھرے ہوئے خار ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہم کو فریاد کرنی آتی ہے
آپ سنتے نہیں تو کیا کیجے؟

 

چھیڑیے قصۂ اغیار ہی ، ہم سُن لیں گے
کچھ تو کہئے کہ خموشی سے گھٹن ہوتی ہے
-------
وہ جواں رُتوں کی شامیں کہاں کھو گئی ہیں محسن
میں تو بجھ کے رہ گیا ہوں، وہ بچھڑ گیا ہے جب سے

 

بتا رہی ہے یہ آنکھوں کی منجمد لالی
کڑے دنوں میں کٹھن رتجگوں سے گزرے ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بجھا بجھا سا ہے چہرہ، دھواں دھواں آنکھیں
خوشی کی کھوج میں کتنے غموں سے گزرے ہو؟

 

کرب کا رازداں، کوئی بھی نہیں
ضبط سا امتحاں، کوئی بھی نہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جبینِ شوق لائی ہے وہاں سے داغِ ناکامی
یہ کیا کرتی رہی کم بخت، ننگِ آستاں برسوں

 

یہ تتلی فاحشہ ہے، پھول کے بستر پہ سوتی ہے
یہ جگنو شب کے پردے میں نہیں رہتا، یہ کافر ہے

 

عدم بھی ہے تیرا حکایت کدہ
کہاں تک گئے ہیں فسانے ترے
---------------
یہاں تو سر سے پہلے دل کا سودا شرط ہے یارو
کوئ آسان ہے کیا سرمد و منصور ہو جانا

 

جو سر بھی کشیدہ ہو اسے دارکرے ہے
اغیار تو کرتے تھے سو اب یار کرے ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ کون ستمگر تھے کہ یاد آنے لگے ہیں
تو کیسا مسیحا ہے کہ بیمار کرے ہے؟

 

تم ناحق ٹکڑے چن چن کر دامن میں چھپائے بیٹھے ہو
شیشوں کا مسیحا کوئی نہیں کیا آس لگائے بیٹھے ہو
---------

گھر سے چلا تو دل کے سوا پاس کچھ نہ تھا​

کیا مجھ سے کھو گیا ہے مجھے کیا ملال ہے​

 

اب کسے ساحلِ امید سے تکتا ہے فراز
وہ جوایک کشتی دل تھی اسے غرقاب سمجھ
۔۔۔۔۔۔۔۔۔۔۔۔۔۔
سب اس سے میرا ذکر نہ کر کے تھے مطمئن
اب اس کو کیا کروں کہ اسے یاد میں ہی تھا

 

کسی نے بھُول کے دیکھا نہ آنکھ اٹھا کے مجھے​

سجا گئے وہ کہاں آئینہ بنا کے مجھے​

---------------​

میں اُس کو بھول گیا ہوں، وہ مجھ کو بھول گیا ​

تو پھر یہ دل پہ کیوں دستک سی ناگہانی ہوئی​

 

ترک تعلقات پہ رویا نہ تو نہ میں
لیکن یہ کیا کہ چین سے سویا نہ تو نہ میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نہ وہ آوارگی مجھ میں، نہ وہ آشفتگی مجھ میں
میں کس معیار پہ اپنی وفا کو تول کر دیکھوں

 

کسی جُوڑے میں سجایا نہ گیاجو مجھ سے​

میں قتیل آج بھی اُس پُھول سے شرمندہ ہوں​

------------​

حوصلہ کس میں ہے یوسف کی خریداری کا
اب تو مہنگائی کے چرچے ہیں زلیخاؤں میں​

 

جاں بیچنے کو آے تو بے دام بیچ دی
اے اهل مصر ! وضع تکلف تو دیکھیے
انصاف ہے کہ حکم عقوبت سے پیشتر
اک بار سوےدامن یوسف تو دیکھیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تو کہاں مرغِ چمن، فکرِ نشیمن میں پڑ ا
کہ ترا کام تو تھا نالۂ و زاری کرنا

 

اے کہ تیرا مرغ جاں تار نفس میں ہے اسیر
اے کہ تیری روح کا طائر قفس میں ہے اسیر
اس چمن کے نغمہ پیراؤں کی آزادی تو دیکھ
شہر جو اجڑا ہوا تھا اس کی آبادی تو دیکھ ​

----------​

یہ نوید اوروں کو جا سنا، ہم اسیرِ دام ہیں اے صبا
ہمیں کیا چمن ہے جو رنگ پر، ہمیں کیا جو فصلِ بہار ہے​

​

 

اڑ جاوں گا قفس کو پروں پر لیے ہوئے
ترتیب دے رہا ہوں ابھی بال و پر کو میں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دوستو، عشق ہے خطا لیکن
کیا خطا درگزر نہیں ہوتی؟

 

عشق اگر اختیار کرنا تھا
ضبط کا حوصلہ بھی رکھنا تھا
---------
غم الفت میرے چہرے سے عیاں کیوں نہ ہوا
آگ جب دل میں سلگتی تھی ، دھواں کیوں نہ ہوا