کیا یہ سچ ہے

میں تو اس لفظ " عشق " کو نفرت کی حد تک ناپسند کرتا ہوں ، ہاں " محبت " قابل قدر شے ہے ۔ ۔ ۔

 

لفظ "عشق" نا پسند ہے ؟ یا وہ عشق جو آج کل رائج ہے؟یا وہ جذبہ جس کو عشق کا نام دیا گیا ہے؟

 

لفظ " عشق " ۔ ۔ ۔
عموما لوگ عشق کو محبت کے متارادف یا اس سے بھی بڑھ کر لیتے ہیں ، حالانکہ عشق کوئی اچھی شے نہیں ، اصل شے محبت ہے ۔ ۔ ۔

 

لوگ کیا مراد لیتے ہیں اس بنیاد پر آپ ایسا نہیں کہہ سکتے کہ عشق اچھی شے نہیں۔ آپ یہ کہہ سکتے ہیں کہ عشق سے مراد لی جاتی ہے وہ عشق کا اصل نہیں ہے۔

 

عشق قدیم عربی میں ایک ایسی بیل کو کہتے ہیں جو کم و بیش اردو کی آکاس بیل کے ہم معنی ہے اور فارسی میں بھی عشق سفلی اور حیوانی جذبات کو کہتے ہیں ، یہ ہماری شعراء اکرام نے اس لفظ کو بہت اہمیت دی ہے اور چونکہ اکثر شعراء غلو کی انتہا کر دیتے ہیں اس لیے عام عوام میں اس لفظ کو محبت سے بھی عظیم شے بنا دیا گیا ، اور پھر سلوک کے اصل راہی جانتے ہیں کہ عشق لازم نہیں محبت لازم ہے ، بلکہ محبت ہی مطلوب ہے ۔ ۔ ۔ قرآن و حدیث میں کسی ایک جگہ بھی آپ کو یہ لفظ نہیں ملے گا ہر جگہ آپ کو محبت کا لفظ ملے گا ۔ ۔ ۔

 

اس بارے میں سید شہزاد ناصر جی سے درخواست کروں گا اپنا نکتہ نظر بیان کریں۔ پھر میں بھی کچھ لکھتا ہوں۔

 

اپنے اپنے مفروضے بیان کرنے کے بجائے یہ دیکھیں کہ لفظ عشق کو متقدمین شعراء نے کس طرح برتا ہے
بہت سی مثالیں مل جائیں گی علامہ اقبال کو ہی لیں

٭صدیق خلیل بھی ہے عشق صبر حسین بھی ہے عشق
معرکہ وجود میں بدر و حنین بھی ہے عشق
٭پختہ تر ہوتی ہے مصلحت اندیش ہو اگر عقل
عشق ہو مصلحت اندیش تو ہے خام ابھی
بے خطر کود پڑا آتش نمرود میں عشق
عقل تھی محو تماشا لب و بام ابھی
٭عقل و دل و نگاہ کا مرشدِ اوّلین ہے عشق
عشق نہ ہو تو شرع و دین بت کدہ تصورات
٭شيوۂ عشق ہے آزادی و دہر آشوبی
تو ہے زناری بت خانۂ ايام ابھی

نہ صرف اردو بلکہ فارسی کلام میں بھی بہت سی مثالیں مل جائیں گی

٭عشق دانی چیست؟ کشتن نفس خویش
روز و شب سوزش بود دِل را ریش
ترجمہ: تو جانتا ہے کہ عشق کیا چیز ہے؟ اپنے نفس کو مار دینے کا نام عشق ہے۔ عشق وہ چیز ہے کہ جس کی کاٹ سے دِل ہر وقت سوزش میں مبتلا رہتا ہے

٭عشق معراج است سوئے بام سلطان ازل
از رخ عاشق فرد خواں قصہ معراج را
ترجمہ: عشقِ حقیقی ہی بارگاہِ ایزدی میں بار یابی دلاتا ہے۔ اگر معراج کی داستانِ حقیقی پڑھنا ہے تو کسی عاشق صادق (مرشد کامل) کے چہرہ پر نظر جماؤ

٭غنیمت داں اگر عشق مجا ز یست
کہ از بہر حقیقت کار ساز یست
ترجمہ: اگر تجھے ذاتِ مرشد کا عشق نصیب ہوجائے تو اسے اپنی خوش نصیبی جان کیونکہ یہ ذاتِ حق کے عشق تک پہنچنے کا وسیلہ ہے۔

عِشق آمد عقل خود آوارہ شُد
شمس آمد شمعِ خود بیچارہ شُد
ترجمہ: عشق آگیا تو بے چاری عقل بے کار ہوگئی جیسے سورج نکلا تو شمع کی ضرورت نہ رہی

عشق آں شعلہ است کہ جوں بر فروخت
ہر کہ جز معشوق باشد جملہ سوخت
ترجمہ: عشق ایسا شعلہ ہے جب بھڑک اُٹھتا ہے تو معشوق (حقیقی) کے سوا تمام چیزوں کو جلادیتا ہے

عاشقی؟ توحید را بر دل زدن
وانگہے خود را بہر مشکل زدن
ترجمہ: عاشقی کیا ہے؟ عاشقی توحیدِ ایزدی (اللہ تعالیٰ) کو دِل میں بسانا ہے اور پھر ہر مشکل سے ٹکرانا ہے یا ہر مشکل کا سامنا کرنا ہے تاکہ توحید صحیح معنوں میں پختہ ہو جائے

عشق و جذبے کا اصول وجود کی ایک حقیقی بنیاد ہے جو تمام وابستگیوں، تعلّقات، خام احساسات اور ہر قسم کے محدود اور متغیّر پہلوؤں سے ماورا مصروفِ عمل ہوتی ہے۔ جس چیز کو انسان 'عشق' کے نام سے جانتا ہے وہ مجازی اور محدود عشق ہے جو عشقِ حقیقی کی ایک محدود جھلک ہے۔ حقیقی عشق ایک وجودی اصل ہے جو بنیادی اور مستحکم تکیہ گاہ کی حامل ہے اور تبدیلیوں اور تغیّرات پر مشتمل نہیں۔ محبّت کی عام سطح روزمرّہ زندگی، جنسیت، دوستی اور دوسری کششوں میں اپنا اظہار کرتی ہے۔ لوگ اکثر غلطی سے جنسی جذبے اور حسّیاتی جنسیّت کو محبّت کی اعلٰی ترین شکل سمجھ لیتے ہیں، جب کہ یہ حقیقت میں کم ترین شکل ہوتی ہے

لسانیات میں اس لفظ کو اہمیت دی جاتی ہے جو عام فہم اور اظہار میں دلکشی رکھتا ہو مطالب اور مفاہیم مختلف ہو سکتے ہیں ہم کوئی اور مطلب اخذ کرتے ہیں لیکن بین السطور مطلب کچھ اور ہوتا ہے جو کہ زبان و بیان پر دسترس اور وسیع مطالعہ سے ہی سمجھ میں آتا ہے

 

مزید یہ کہ عشقِ مجازی، جو عشقِ حقیقی کی ایک شکل ہے، اپنے اِس محدود مرتبے میں بھی کچھ مثبت جھلکیوں کی حامل ہے۔ عاشق انسان کی زندگی کو معنی و مفہوم ملتا ہے۔ وہ شوق و جذبہ رکھتا ہے، توانائی رکھتا ہے، تنہا نہیں اور پُرامید ہے۔ وہ ایثار کا جذبہ رکھتا ہے، حُسن کو بہتر سمجھتا ہے، مشکلات کو کم تر گردانتا اور احساس رکھتا ہے، لیکن چوں کہ اِس مقام میں عشق متغیّر ہے اور یہ تمام حالات اُس عشقِ مجازی کے تقاضوں کے تحت بدلتے رہتے ہیں، ہو سکتا ہے کہ وہ مکمّل بر عکس اور منفی شکل اختیار کرلے۔عشقِ مجازی میں تغیّرات شامل ہیں، جب کہ عشقِ حقیقی ایک جوہر ہے جو قائم ہے۔ وہ "میں" کی مرکزیت میں پوشیدہ ہے اور اُس کی جھلکیاں بھی غیر متغیّر اور ابدی ہیں۔

 

اقبالؒ ، علم اور عشق کا مختصر موازنہ کرتے ہیں۔ کہتے ہیں کہ علم کا مقام ذہن یا سوچ بچار ہے لیکن عشق کا مقام قلب ہے ، جو ہمیشہ بیدار رہتا ہے۔
''قلب لانیام'' وہ قلب جو کبھی نہ سوئے اس لئے اقبالؒ دل کی بیداری کی طرف اشارہ کرتے ہیں کیونکہ جب عاشق '' واذکرواللہ کثیراً'' پر عمل کرتا ہے تو ذکرِ الٰہی کی برکت بلکہ تاثیر سے اس کا دل جاری ہو جاتا ہے یعنی خواہ وہ کسی حال میں ہو، اس کا دل ذکرِ الٰہی میں مشغول رہتا ہے۔ اس کو صوفیاء اپنی اصطلاح میں ''دل کا جاری ہو جانا'' کہتے ہیں اور اقبالؒ اس کو دل کے زندہ ہوجانے سے تعبیر کرتے ہیں۔ چنانچہ کہتے ہیں:
دلِ مردہ دل نہیں ہے اسے زندہ کر دوبارہ
کہ یہی ہے امتوں کے مرضِ کہن کا چارہ

 

خلاصہ کلام حضرت علامہ اقبالؒ نے ملت اسلامیہ کو تین جدید تصورات دیئے ہیں۔ خودی، فقر اور عشق۔ یا یوں کہیے کہ ان تین الفاظ کے لئے نئے مفاہیم دیئے ہیں۔ احساس خودی سے مراد عظمت انسانی اور اس کی خوبیوں ذمہ داریوں اور بلندیوں کا احساس ہے۔ اس کا پہلا مرحلہ اطاعت ہے، دوسرا ضبط نفس اور تیسرا نیابت الٰہی ہے۔ خودی حضرت علامہ اقبالؒ کے فلسفہ حیات کی اساس ہے۔ حضرت علامہ اقبالؒ کے فلسفہ شعر میں اس کے معنی غرور، انخوت یا تکبر ہرگز نہیں بلکہ خودی کا مفہوم محض احساس نفس یا تعین ذات ہے۔ خودی وحدت وجدانی باشعور کا وہ روشن نقطہ ہے جس سے انسانی تخیلات و جذبات اجاگر ہوتے ہیں۔ خودی ایسی مخلوق ہے جو عمل سے لازوال ہو سکتی ہے۔ انسانی خودی کی یہ نجات نہیں کہ وہ ذات باری میں فنا ہو جائے، بلکہ یہ ہے کہ وہ ارادے کو خالق کائنات کے تابع کر دے۔

 

سید شہزاد ناصر صاحب نے اپنا نکتہ نظر بیان کر دیا ہے اوراب آپ کے اظہار رائے کا انتظار ہے ۔ ۔ ۔