کلام سائیں غُلام حیدر سِہوترہ

پنجانی پڑہن والیاں دے لئی ایس لڑی وِچ میں اپنے اُستاد مُحترم جناب سائیں غُلام حیدر سِہوترہ جی دا کلام پیش کراں گا اوہناں دی تصویر میرے اوتار تے لگّی ہوئی اے ۔سب توں پہلاں اوہناں دی چھپی ہوئی کِتاب سدھراں دا گُستان
تُہاڈی خِدمت وِچ پیش کر رہیاں واں۔ آس اے جے تُہانُوں بہوں پسند آئے گی۔
میری عرض ہے جے کلام نُوں پڑھ کے رائے ضرُور دینا ۔
جے کوئی گل پُچھنی ہووے تے میں حاضر ہاں ​

تؤحید

بے وس ایہہ گل سوچنڑ اُتّےدُنیا دا ہر بندہ
کوئی تے ہے چلاونڑ والا اِس دُنیا دا دھندہ
چار چؤمُکھّی پانڑی اُتّے کِس نے فرش ٹِکایا
سینساں دسّنڑ مِٹّی نُوں چا گوشت وانگ بنایا
تیلا ،مائیں،ککّی کیڑی، ہاتھی ، شیر ، بھِگیاڑ
ہور ہزاراں جُوناں نالے مِٹّی ، ریت ، پہاڑ
رُتّاں ، ویلے ، بدّل ، واواں ، دِن ، دِیہاڑے راتاں
کِہڑی کِہڑی گِنڑ کے دسّاں ون و ون سؤغاتاں
میوے ، بُوٹے ، پھُل ہزاراں رنگ و رنگ کھِڑائے
وکھّو وکھ تاثیر ایہناں دِی وکھّو وکھ بنڑائے
سینساں جِتنا زور لگاونڑ بن نئیں سکدی مکھّی
ہِک قطرے وِچ پیدائشاں دِی قُدرت کِس نے رکھّی
دُنیا دِی ہر شئے دِی مِٹّی کِس بُنیاد بنائی
ہر بندے نُوں مننڑاں پؤسی ہِکّو ذات اِلٰہی
جے ہِکّی توں چوکھے ہوندے بھانویں ہوندے دو
فیر سیاست داناں والے لگّے ریہندے شو
آپو اپنڑی گل تے اڑدے آپو اپنڑی کردے
فیر نہ چن تے سُورج ایتھے ویلے دے سِر چڑہدے
ہر بندے نُوں مننڑاں پیندائے واحِد مالِک اللہ
ایدوں ودھ کے سوچنڑ والے عقلاں دے سِر کھلّا
ہِک ہِکلّے کِتھّے کِتھّے جھوکاں نئیں وسائیاں
گُجھیاں بھیداں اُتّوں پردہ چا نئیں حیدر سائیاں​

 

جواب: کلام سائیں غُلام حیدر سِہوترہ

سین جی پسند کرن دا بُہت شُکریہ ۔ بڑی مہربانی

 

جواب: کلام سائیں غُلام حیدر سِہوترہ

الکرم جی تواڈے سارے ای کم با کمال نیں سائیں ہوراں دے ہور وی کلام دا انتظار رہوے گا تے تُسیں اپنا کلام کدوں لخ رئے او ، چھتی دسیا جے

 

جواب: کلام سائیں غُلام حیدر سِہوترہ

ھارون جی بڑی مہربانی پسند کرن دا شُکریہ
میرا اپنا کلام بُہت تھوڑا اے تے جلدی ہی پیش کراں گا

 

جواب: کلام سائیں غُلام حیدر سِہوترہ

ما شا ء اللہ ، بہت خوبصورت کلام اے ، تے سدا دل وج اتر جاندا اے ، مزید دا انتظار رہے گا ۔

 

جواب: کلام سائیں غُلام حیدر سِہوترہ

آصف احمد بھٹّی جی بُہت بُہت مہربانی میرے اُستاداں دا کلام پسند کرن دابُہت شُکریہ

 

جواب: کلام سائیں غُلام حیدر سِہوترہ

نعتِ رسُولِ مقبُول ﷺ​

ایہہ چؤدہ طبق ، ویرانی ، جہالت ، بے کلی ، ہوندی
جے نہ نُورِ مُحمّد ﷺ دی ایتھے جلوہ گری ہوندی
تے اِنساناں دی حیواناں توں وی حالت بُری ہوندی
مُحمّد ﷺ پاک دی جے کر نہ جگ تے آوری ہوندی
جے احمد ﷺ باجھ کوئی ہوندا سہارا نسلِ آدم دا
تے آدم دِی اوہدے ﷺ صدقے مُصیبت نہ ٹلی ہوندی
اصل ہر چیز دا جے کر نہ نُورِ مُصطُفٰے ﷺ ہوندا
نہ سُورج رؤشنی دیندا ، نہ چن دی چاننڑی ہوندی
خُدا توں کُجھ قدیم ہوندا تے فیر مُلّاں دِی من لیندے
اوہدے نُوروں اِیں دُنیا دِی جے ہر شے نہ ڈھلی ہودی
مُحمّد ﷺ حاضر و ناضر جیویں اسرایٰ دِی شب شاہِد
نہ روحِ کائینات ہوندے نہ کِدھرے زِندگی ہوندی
سبز گُنبد دا ہِک جلوہ ہزاراں جنتاں مینُوں
کِسے صُورت غریباں دِی مدینے حاضری ہوندی
سائیں حیدر ! کدوں دا ایہہ گُناہاں دا خؤف کھا جاندا
جے نہ سوہنڑے مُحمّد ﷺ دِی مینُوں نِسبت مِلی ہوندی​

 

جواب: کلام سائیں غُلام حیدر سِہوترہ

سبحان اللہ ، جزاکم اللہ خیر ۔

 

جواب: کلام سائیں غُلام حیدر سِہوترہ

روہانی بابا جی ایہہ کلام بابا فرید جی کوٹ مِٹھن والی سرکار دا جے
یو ٹیوب تے ۔۔سائیں خاور ۔۔ دے حوالے نال ایہہ کلام سُن سکدے او
ویسے میں یوٹئوب والی لڑی وچ لان دی کوشش وی کرداں واں

 

جواب: کلام سائیں غُلام حیدر سِہوترہ

سبحان اللہ وبحمدہ

جزاک اللہ الخیر

 

جواب: کلام سائیں غُلام حیدر سِہوترہ

رب دا رُوپ​

بندِے ماں نُوں ربّ دا رُوپ آہدن کائنات دا اِیہہ اِیمان اِیں
اِس جنم دِتّا اے نبیاں نُوں ایہدا جگ توں وکھرا شان ایں
پہلے ماں‌دِے پیار دا بھید لبھّے!ہوندِی ربّ دِی تاں پہچان ایں
سائیں حیدرجنّت نئیں جا سکدا جِیہڑاماں‌دا نافرمان ایں​

 

جواب: کلام سائیں غُلام حیدر سِہوترہ

ارشین بی بی وسدے رہوو ۔میرا مان ودھایا جے۔ کدی کدی پنجابی چوپال وِچ
گیڑا ماردے رہیا کرو ۔ میں ہِکلؑا کُجھ نئیں کر سکدا ۔ ہر کلام نُوں غؤر نال پڑھ کے کِسی
غلطی ول اِشارہ وی کریا کرو۔رب سُکھی رکھّے
بُہت بُہت شُکریہ

 

جواب: کلام سائیں غُلام حیدر سِہوترہ

بلکل سچ آکھیا اے سائیں ہوراں نے

 

جواب: کلام سائیں غُلام حیدر سِہوترہ

الکرم جی بہوں سوہنی لڑی شروع کیتی جے۔ مزید کلام دا انتظار اے۔

 

جواب: کلام سائیں غُلام حیدر سِہوترہ

غزل​

انّاالحق دِی اوہ گل پُچھدے، میں پلڑا کھسّاں کیہ دسّاں؟
دسّاں تفسیر مُحبّت دِی؟ میں جانڑ کے پھسّاں کیہ دسّاں؟
ٹُٹنڑاں سہر ے دِیاں لڑیاں دا ،معصُوم اؤلاداں دا گُستان
کربل دے وِچ سیّداں نُوں، پانڑی دِیاں تسّاں کیہ دسّاں؟
ایہہ پیار تے کارو بار نئیں ،لالچ تے یاری جوڑ نئیں
مُلّاں دے وعظ نصِیحت توں ، میں کاہنُوں نسّاں کیہ دسّاں؟
دسّاں بے حالیاں حال دِیاں، گل کراں زمانےبِیتےدِی
جیؤں بدلی وسدِی اے ساونڑ دِی ، میں چھم چھم وسّاں کیہ دسّاں؟
مخمل دِیاں دریاں کمرے وِچ ، زر دار دے کُتّے کاراں تے
مزدُور دے بال دے جُثّے تے ، مِٹیاں تے بھسّاں کیہ دسّاں؟
" مسجد ،مندر ، گِرجے پھِریاں ، چور دِلے دے اندر سِی''
ہِک پانڑے والے پائیاں سن ، کُجھ پُٹھیاں دسّاں کیہ دسّاں؟
ایہہ خؤرے مُکھڑا کاہنُوں ایں ، ہر بندے دا زردیل جیہا
میں ہِک ہِکلّا دسّو جی ، کِس کِس نُوں دسّاں کیہ دسّاں؟
حالات ظفر دِی زِندگی دے ، سرمد دا قِصّہ سائیں حیدر
کیہ دسّاں درد پیاراں دے ، سُولی دِیاں چسّاں کیہ دسّاں؟​

 

جواب: کلام سائیں غُلام حیدر سِہوترہ

کیہ دسّاں درد پیاراں دے ، سُولی دِیاں چسّاں کیہ دسّاں؟

واہ سائیں واہ

 

جواب: کلام سائیں غُلام حیدر سِہوترہ

بہت ودیا جی الکرم جی ،تساں وسدے رہوو تے ہسدے رہوو

 

جواب: کلام سائیں غُلام حیدر سِہوترہ

غزل​

ناداناں دِیاں یاداں اندر، گُم سُم ہو کے رہنڑا اؤکھا
دھوکھے بازاں نُوں بھُل جائیے، جان کے دھوکھا کھانڑا اؤکھا
عِشق اوہدے دِیاں راہواں دِے وِچ، کے کھویا تے کے پایا
ڈوھُنڈھنڑ والے آپ گواچے، آپ گواچ کے پانڑا اؤکھا
جنہاں خواباں دِیاں تحرِیراں ، اِکلاپے دِے دُکھڑے ہوونڑ
اوہناں خواباں دِے بھرواسے،آپنڑا دِل وِلچانڑا اؤکھا
دِل تے رکھ کے بیتیاں باتاں، چُپ کر جانڑا اؤکھا سہی
اندر دُکھ دے بھانبھٹ لے کے ، مِحفل نُوں گرمانڑا اؤکھا
ساڈِی تے پہچان اے اؤکھی ، ظاہِر باطن وکھّو وکھ اے
ساڈِے وانگوں تینُوں سجنڑاں ، بِھیس وٹا کے آنڑا اؤکھا
اوہنُوں تکیاں جِبھ دے اُتّے ، چُپ دے جندرے وجّے نیں
ڈولی اکھراں دِی وِچ پا کے ، حُسن اوہدا سمجھانڑا اؤکھا
جِہڑا آکھے سبھ کُجھ میرا ، میں آکھاں اوہ میرا اے
جھلّے کلّے سائیں حیدرؔ دِی ،اِس گل نُوں ٹھُکرانڑا اؤکھا​

 

جواب: کلام سائیں غُلام حیدر سِہوترہ

بوہت باکمال شاعری اے سدھی دل اچ اتر جانڑ والی

 

جواب: کلام سائیں غُلام حیدر سِہوترہ

غزل​

تندُوں کچیاں پیار پریت دِیاں، اے پر تگدیاں تگدیاں تگ گئیاں
میرے دِل وِچ تیرے نام دِیاں ، شمعاں جگدیاں جگدیاں جگ گئیاں
گل رانجھنڑے دِی قِصّہ قیس والا ، میں تے دسیا نال اِشاریاں دے
ایہہ اکھّاں گل نہ سمجھ سکیاں ، آخر لگدیاں لگدیاں لگ گئیاں
مُکھ سدا بہار ، تلوار اکھّیں ، دند ہار دو لڑیاں موتیاں دے
ایہو صُورتاں صُورتاں سمجھ کے تے ، آساں تگدیاں تگدیاں تگ گئیاں
جداں لگ گئیاں فیر لگنڑ ناہیں ، لگ مگر سوچاں دے وگ گئیاں
وگّی واء وِچھوڑے دِی جِس ویلے ، ہنجُو وگدیاں وگدیاں وگ گئیاں
حیدر سائیں سنبھال کے بہُوں رکھیا ، ٹھل ٹھل کے دِل غیُور اپنڑا
پر اکھیاں اِک ٹھگ باز دِیاں ، سانُوں ٹھگدیاں ٹھگدیاں ٹھگ گئیاں
​

 

جواب: کلام سائیں غُلام حیدر سِہوترہ

بیٹا جی پیر ہوریں
میرے اُستاداں دے اُستاد
تے میرے دادا اُستاد سن
اللہ اوہناں تے لکھاں رحمتاں بھیجے

 

جواب: کلام سائیں غُلام حیدر سِہوترہ

غزل​

مُستقبِل دِی کر کوئی گل
گئے ویلے تے ہتھ نہ مل
مؤت اے راکھی زِندگی دِی
سؤ گلّاں دِی ہِکّو گل
عاشِق دِی میراث اےیارو
جنگل ، بیلے ، جل تے تھل
دِل دِی کھیتی عمل دا جوڑا
نال یقین چلائیے ہل
تیرے وعدے زِندگی میری
تیری مرضی ول نہ ول
پیار دِیاں نیں اؤکھیاں راہواں
چل تے سوچ سمجھ کے چل
درد سجن دے مار مُکایا
اؤکھا گُزرے اک اک پل
عاشِق ڈِٹھّے سُولی چڑہدے
عاشِق لوک لہاندے کھل
سائیں حیدرؔ جی سُتّی سسڑی
تھل وِچ گولے یار پُنل​

 

جواب: کلام سائیں غُلام حیدر سِہوترہ

واہ جی واہ کی گل اے

یار پنھل