عبدالجبار کے ذاتی کلام کی اشاعت

زمانہ دور کرتا جا رہا تھا
کوئی ہم سے بچھڑتا جا رہا تھا

کوئی تو خوش گیا محفل سے تیری
کوئی بس آہیں بھرتا جا رہا تھا

بہت مجبور ہو کر اُس کو چھوڑا
حدوں کو پار کرتا جا رہا تھا

بڑی مشکل سے میں دل سنبھالا
کوئی دل میں اُترتا جا رہا تھا

کوئی کچّے گھڑے پر پار جائے
کوئی ساحل پہ مرتا جا رہا تھا

کہا تھا دل سے کہ جُھک کر نہ ملنا
یہ اُن کے پاؤں پڑتا جا رہا تھا

مجھے معلوم تھا اب ختم سب کچھ
وہ وعدوں سے مُکرتا جا رہا تھا

تُجھے جبّار ہم نے کتنا روکا
تُو چرچا عام کرتا جا رہا تھا

(عبدالجبار)​

 

نعتیہ شاعری

پسندیدگی کا بہت شکریہ!

 

میری پہلی نعتیہ شاعری۔۔ مِرے آقا قبول کر لیں تو سب دکھ دُھل جائیں۔۔

قصیدے اُن کے پڑھنا چاہتا ہوں
کہ اب میں بھی سنورنا چاہتا ہوں

بہت مُدّت سے نہ روئی یہ آنکھیں
اِنہیں اشکوں سے بھرنا چاہتا ہوں

ہاں مِل جائے جو خاکِ پائےِ احمد
اُسے بوسہ میں کرنا چاہتا ہوں

ہے شاہوں سے بھلی اُن کی غلامی
یہی سرکار کرنا چاہتا ہوں

نہیں ہے چاہتِ حُوران و جنّت
بس اِک دیدار کرنا چاہتا ہوں

تڑپ کر کہہ رہا ہے دل یہ میرا
میں اُن کو سجدہ کرنا چاہتا ہوں

بچی ہیں جو مِری دو چار سانسیں
اُنہیں کے نام کرنا چاہتا ہوں

دمِ آخر مجھے لے جانا اُس دَر
اُنہیں کا ہو کے مرنا چاہتا ہوں

سُنا ہے لحد میں ہو گی زیارت
سو میں جبّار مرنا چاہتا ہوں

(عبدالجبار)​

 

ماشاءاللہ جبار بھائی کا پہلا نعتیہ کلام پڑھ کر دل خوش ہوا۔ اللہ انہیں اور پختگئ فکر دے۔ آمین

 

دین کے معاملات میں غلو اور انتہاپسندی


عبداللہ اور عبدالرحمن کے علاوہ اللہ تعالی کے کسی بھی نام سے وابستہ نام کو عبد کے بغیر پکارنا جائز ہے۔ یعنی عبداللہ کو اللہ اور عبدالرحمن کو رحمن کہنا درست نہ ہو گا۔ عبدالجبار کو جبار کہنا اور عبدالسمیع کو سمیع کہنا جائز ہے۔ واضح ہو کہ اس کی بہت سی مثالیں قرآنِ مجید میں بھی موجود ہیں۔

مثال کے طور پر عبدالسمیع اور عبدالبصیر کو ہی لے لیں۔ سورۃ النساء میں اللہ رب العزت نے خود کو سمیع و بصیر بتایا جبکہ سورۃ الدھر میں یہی الفاظ انسان کے لئے استعمال کئے:

اِنَّ اللّہَ كَانَ سَمِيعًا بَصِيرًاO (النِّسَآء ، 4 : 58 )

فَجَعَلْنَاہُ سَمِيعًا بَصِيرًاO (الدَّھْر ، 76 : 2)

یہاں اللہ رب العزت نے سمیع و بصیر کے الفاظ انسانوں کے لئے بطور مجاز استعمال کئے ہیں۔ اس جیسی اور بھی مثالیں تلاش کی صورت میں قرآن و حدیث میں وافر تعداد میں مل سکتی ہیں۔

اب اس کا دوسرا پہلو بھی دیکھتے ہیں۔

ہمارے معاشرے میں غلو پسندی کا رجحان اپنی انتہا کو پہنچا ہوا ہے۔ جس کسی کو ایک چھوٹی سی بات پتہ چل جاتی ہے وہ اسی کو پکڑ کر سب کو اس پر کاربند کرنے کی کوشش کرتا ہے اور بسا اوقات دین کی معتدل تعلیمات کو پسِ پشت بھی ڈال دیتا ہے۔ مستحبات و سنن چھوڑنے کو برا کہنا اور فرائض و واجبات سے صرفِ نظر کرنا ہمارے معاشرے میں عام ہے۔

نمازِ جنازہ میں صفوں کے طاق ہونے پر تو شور مچا مچا کر زور دیا جاتا ہے جبکہ دعائے جنازہ ان شور مچانے والوں میں سے بھی بیشتر کو یاد نہیں ہوتی۔

اس گفتگو سے کسی کی دل آزاری مقصود نہیں ہے۔ مقصد فقط یہ ہے کہ ہر معاملے کو اس کی حیثیت کے برابر اہمیت دی جائے۔

اللہ ہم سب کو اپنے احوال کی اصلاح کی توفیق سے نوازے۔ آمین

 

نعیم بھائی! آپ نے کبھی محسوس کَیا کہ میں نے کسی بات کا غصہ کِیا ہو؟

ایسی کوئی بات نہیں، یہ تو ایک اصلاحی بات تھی، جِس کی وضاحت میں یہ سب کہنا پڑا، واللہ! مجھے کوئی غصہ نہیں، فقط سمجھانا مقصود تھا۔

فیصل بھائی، آپ اور عقرب بھائی نے بہت پیارے انداز میں کہا جو بھی کہا، اگر میرے لکھنے میں آپ کو کوئی تلخی محسوس ہُوئی بھی تو وہ ہرگز ہرگز آپ میں ‌سے کسی کے لئے نہ ‌تھی۔ بلکہ معاشرے میں جو لوگ انتہا پسندی کا شکار ہیں اور مزید لوگوں کو اس دلدل میں دھنسائے جا رہے ہیں، غصہ اُن پر آتا ہے۔

خیر!!!! یہ موضوع شروع کریں گے تو بہت لمبی بحث ہے۔ یہاں فقط یہی کہوں ‌گا، کہ اگر میری بات سے کسی کی دل آزاری ہُوئی ہو تو میں معذرت خواہ ہوں۔ بقول عقرب بھائی کے آپ سب جانتے ہیں ‌کہ

پھر بھی کچھ ایسا لگا ہو تو اُمید کرتا ہوں آپ مجھے معاف فرمائیں گے۔ شکریہ!

 

میری اِک نئی غزل

ہم ایک پَل بھی جن سے انجان نہیں ہوتے
وہ ہمارے دل کے کیونکر مہمان نہیں ہوتے

کہنا بہت ہے آساں، لیکن اے میری جاناں!
یہ رشتے بھول جانا ، آسان نہیں ہوتے

جنہیں آپ دل سے چاہو، جنہیں آپ ہر سُو سوچو
وہ آپ کی وفا سے ، انجان نہیں ہوتے

جو مِلا اُسی کو سمجھو، کہ یہی ہے اپنا سب کچھ
ورنہ تو دل میں‌کیا کیا ، ارمان نہیں ہوتے

کریں لاکھ رکوع سجدے، کریں ہر گھڑی عبادت
جو کچھ بھی ہوں ‌فرشتے، انسان نہیں ہوتے

کئی بار دوستوں نے، جبّار بھیس بدلے
اب ہم سے بھی وہ اکثر پہچان نہیں ہوتے


(عبدالجبّار)​

 

نعیم بھائی! اور لاحاصل جی! داد اور حوصلہ افزائی کا بہت شکریہ!

 

میری 27ویں سالگرہ پر میری ایک نظم


[align=left:1n8qk3kr]2007-03-03[/align:1n8qk3kr]
“میری سالگرہ“

آج پھر ایک سال بیت گیا
آج پھر لوگ مبارک دیں گے
کِس نے سوچا کہ گُزرے سالوں میں
میں نے کیا کچھ گنوا دیا اپنا
اپنی ہستی تباہ کر ڈالی
کیا تھا اور کیا بنا لیا اپنا
وہ جو دن اُلجھنوں میں بیت گئے
سب گناہوں کا اِک پہاڑ بنا
وہ جو راتیں ملیں عبادت کو
سب کی سب غفلتوں کی نظر ہوئیں
حق ادا کر سکا نہ میں کوئی
اپنے خالق کے بندہ ہونے کا
اے مرے دوستو! مرے یارو!
مجھ کو حاجت نہیں مبارک کی
تم اگر خُوش ہو آج کے دن تو
اپنی جھولی ہوا میں‌ لہرا دو
مانگ کر دو مجھے خُدا سے وہ
جس کے طالب سبھی پیغمبر تھے
کچھ تو ایسا کروں کہ جس سے میں
حق ادا کر سکوں غلامی کا
روزِ محشر وہ مجھ کو پہچانیں
کہہ دیں اِک بار اُمتّی ہے مرا
کاش! مجھ کو قبول کر لیں وہ
اپنے قدموں کی دھول کر لیں وہ


(عبدالجبار)

 

عقرب بھائی! لکھنے دیں جیسا بھی لکھتی ہیں، میں‌ نہ تو مھسوس کروں گا اور نہ ہی محسوس

لیکن لاحاصل جی آپ اپنی اصلاح ضرور کریں۔ کوشش رکھیں کہ پیغام ارسال کرنے سے پہلے اسے ایک بار اسے ضرور پڑھ لیا کریں۔ اور ہاں کوشش کروں گا کہ جلد ہی کوئی نیا کلام ارسال کروں۔

 

کبھی مزاحیہ شاعری کی تو نہیں، لیکن کہیں کسی کے کہنے پر ایک ٹوٹی سی کاوش۔۔۔۔

وہ یہاں بھی لکھ رہا ہوں۔

امید ہے آپ پسند کریں گے۔
--------------------------------

اُس کا ہر نقص کیوں چُھپاتے ہو؟
وہ کیوں اتنی تُمہیں پیاری ہے؟
“کچھ تو ہے جس کی پردہ داری ہے“



جان دیتے ہو عائشہ پہ تم
فائزہ سے بھی اتنی یاری ہے
“کچھ تو ہے جس کی پردہ داری ہے“



پہلے سائیکل نہیں تھی اُس کے پاس
اور ، آج اتنی لمبی لاری ہے
“کچھ تو ہے جس کی پردہ داری ہے“



بھینس کی دُم کھڑی نہیں ہوتی
اپنی عزّت اُسے بھی پیاری ہے
“کچھ تو ہے جس کی پردہ داری ہے“



اپوزیشن بھی خاصی تگڑی تھی
اتنے ووٹوں سے پھر کیوں ہاری ہے؟
“کچھ تو ہے جس کی پردہ داری ہے“



کل تو بھابھی بہت ہی میٹھی تھی
آج تھوڑی سی کیوں کراری ہے؟
“کچھ تو ہے جس کی پردہ داری ہے“



( عبدالجبار )​