اردو نامہ ۔

اردو کے زیر زبر پیش نقط پر نظر رکھیے
زبر سے ہوا زیر تو اپنی قلم کو قابو میں رکھیئے
ادب کی محفل میں آداب ہی چلتا ہے
تہذیب کی ہے بندش ذرا اپنا قابو میں رکھئیے
از قلم #حنّاشیخ

 

چرچا ہر ایک آن ہے اردو زبان کا

گرویدہ کل جہان ہے اردو زبان کا

اس لشکری زبان کی عظمت نہ پوچھیے

عظمت تو خود نشان ہے اردو زبان کا

گمنامیوں کی دھوپ میں جلتا نہیں کبھی

جس سر پہ سائبان ہے اردو زبان کا

مشرق کا گلستاں ہو کہ مغرب کا آشیاں

ویران کب مکان ہے اردو زبان کا

سوداؔ و میرؔ و غالبؔ و اقبالؔ دیکھ لو

ہر ایک پاسبان ہے اردو زبان کا

اردو زبان میں ہے گھلی شہد کی مٹھاس

لہجہ بھی مہربان ہے اردو زبان کا

ترویج دے رہا ہے جو اردو زبان کو

بے شک وہ باغبان ہے اردو زبان کا

مہمان کہہ رہا ہے بڑا خوش نصیب ہے

جو شخص میزبان ہے اردو زبان کا

لوگو کہیں بھی اس میں پس و پیش کچھ نہیں

اک معترف جہان ہے اردو زبان کا

بولی ہے رابطے کی یہی جوڑتی ہے دل

ہر دل میں ایسا مان ہے اردو زبان کا

وسعت پذیر دامن اردو ہے آج بھی

ہر گوشہ اک جہان ہے اردو زبان کا

کرتا ہے آبیاری لہو سے ادیب جو

وہ دل ہے جسم و جان ہے اردو زبان کا

آئیں رکاوٹیں جو ترقی میں اس کی کچھ

سمجھو یہ امتحان ہے اردو زبان کا

پائے گا جلد منزل مقصود بالیقیں

جاری جو کاروان ہے اردو زبان کا

عزت سخنوران ادب کی اسی ہے

شاعرؔ بھی ترجمان ہے اردو زبان کا

 

مرا لہجہ نکھرتا ہے کہ اردو بولتا ہوں میں
ترا چہرہ بھی کھلتا ہے کہ اردو بولتا ہوں میں

ہنر کے ذائقوں میں ہوں زباں کے دائروں میں ہوں
سخنور مجھ پہ مرتا ہے کہ اردو بولتا ہوں میں

مری تاریخ لکھتا ہے مورخ کوئی جب صاحب
قلم سونا بکھرتا ہے کہ اردو بولتا ہوں میں

مرا تو واسطہ غالب سے بیدی سے جگن سے ہے
ہنر کس سے جھگڑتا ہے کہ اردو بولتا ہوں میں

مرا لہجہ فقط خوشبو مرا جذبہ فقط گل بو
زمانہ مجھ پہ مرتا ہے کہ اردو بولتا ہوں میں

کبھی جب یاد کرتا ہوں میں اس کو اپنے لہجے میں
خدا مجھ میں اترتا ہے کہ اردو بولتا ہوں میں

زبانوں کو بھی جو عادل یہاں تقسیم کرتا ہے
فریبی مجھ سے جلتا ہے کہ اردو بولتا ہوں میں

عادل اشرف

 

اک لمحہ بھی گزاروں بھلا کیوں کسی کے ساتھ
گزرے تمام عمر مری آپ ہی کے ساتھ

جب ہاتھ دوستی کا بڑھایا خوشی کے ساتھ
اس نے مجھے قبول کیا خوش دلی کے ساتھ

دل سے کیا ہے یاد اسے میں نے جب کبھی
اظہار ہجر کرتی ہیں آنکھیں نمی کے ساتھ

اک بار میرے یار نے ایسا کیا مذاق
اللہ رے نہ ہو کبھی ایسا کسی کے ساتھ

اس طرح منسلک ہوا اردو زبان سے
ملتا ہوں اب سبھی سے بڑی عاجزی کے ساتھ

باقی رہی ہے دل میں یہ حسرت تمام عمر
مہتابؔ کا دیار ہو اس کی گلی کے ساتھ

بشیر مہتاب

 

کتنا آسان ہے اک دوسرے کا ہو جانا
پیار کا حد سے گزرنا ہے جدا ہو جانا

یہ تو تقدیر نے کھیلا ہے مرے جذبوں سے
ورنہ دشوار نہ تھا اس کا مرا ہو جانا

میں تو مفلس ہوں مرے پاس ہنر کوئی نہیں
زرد پتے کی تمنا ہے ہرا ہو جانا

اس جگہ آ کے یہ معلوم ہوا ہے مجھ کو
کتنا مشکل ہے بلندی پہ کھڑا ہو جانا

لوگ جینے کے لئے کیا نہیں کرتے مہتاب
پر سمجھ آیا نہ تیرا یوں فنا ہو جانا

بشیر مہتاب

 

واہ،،،

​

 

لے کے تنہا یہ محبت کا علَم کیا کرتے
تم نہ ملتے تو رہ ِ زیست میں ہم کیا کرتے

ان کی مرضی بھی ہے شامل مری بربادی میں
پھر مری ذات پہ وہ نظرِِ کرم کیا کرتے

ہم نے اس واسطے آئینہ دکھایا ان کو
جان لینے سے زیادہ وہ ستم کیا کرتے

حشر کے دن کو ابھی وقت بہت ہے باقی
ایسے میں جا کے بھلا ملکِ عدم کیا کرتے

جسکے ہر وصف کو درکار ہیں لاکھوں صفحات
اسکے اوصاف بیاضوں میں رقم کیا کرتے

سینہ ایمان کے پھولوں سے ہو جس کا گلزار
اسکو الحاد کے انگارے بھسم کیا کرتے

ہم کہ اے شاؔد دکھاوے کے نہیں ہیں قائل
دل میں جب رنج نہ تھا آنکھ بھی نم کیا کرتے

شمشاد شاؔد