بیت بازی

یہاں رہوں گا تو پھر تیرے تذکرے ہوں گے
اگر کہو تو تِرا شہر چھوڑ جاؤں‌میں​

 

یا صبح ہے یا آینہ یا ہے ید بیضا
یا صفحہ رخسار کسی شوخ جبیں کا
یا مشتری و زہرہ ہے یا مہر درخشاں
یا جلوہ پرنور ہے یہ ماہ مبیں کا

 

لا پلا دے ساقیا پیمانہ پیمانے کے بعد
بات مطلب کی کروں گا ہوش میں آنے کے بعد

 

دل میں دلبر کی ذات کو رکھنا
ذرّے میں کائنات کو رکھنا
عشق کی ہر گھڑی عبادت ہے
سامنے اُن کی ذات کو رکھنا​

 

اب نزع کا عالم ہے مجھ پر، تم اپنی محبت واپس لو
جب کشتی ڈوبنے لگتی ہے تو بوجھ اتارا کرتے ہیں

 

نہیں آتی تو یاد اُن کی مہینوں تک نہیں آتی
مگر جب یاد آتے ہیں ، تو اکثر یاد آتے ہیں​

 

نہ کلیم کا تصور، نہ خیال طور سینا
میری آرزو محمد میری جستجو مدینہ

 

ہم سے کیا ہو سکا محبت میں
تو نے تو خیر بے وفائی کی​

 

یہی مزاج ہے اپنا کسی کا دل نہ دکھے
جدائیوں کو بھی چاہا ہے قُربتوں کی طرح​

 

حیف اس چار گرہ کپڑے کی قسمت غالب
جس کی قسمت میں ہو عاشق کا گریباں ہونا

 

اے ابرِ محبت! تُو کہیں اور برس جا
میں ریت کا ٹیلا ہوں مِری پیاس بہت ہے​

 

یہ آسماں‌غلام ہے کس مہ جمال کا
پہنے پھرے ہے کان میں بالا ہلال کا

 

اُس کے رخِ حسیں سے سَرکتی ہے جب نقاب
اِک چودھویں کا چاند نکلتا دکھائی دے​

 

یہ کن نظروں سے تو نے آج دیکھا
کہ تیرا دیکھنا دیکھا نہ جائے

 

یہ رکھ رکھاؤ محبت سِکھا گئی اُس کو
وہ روٹھ کر بھی مجھے مُسکرا کے مِلتا ہے​

 

یہ دل کا روگ یہ چاہت خدا کسی کو نہ دے
بری بلا ہے محبت خدا کسی کو نہ دے

 

یہی کافی ہے ہم دشمن نہیں ہیں
وفا داری کا دعوٰی کیوں کریں ہم​

 

محبت میں نہیں‌ہے فرق جینے اور مرنے کا
اسی کو دیکھ کر جیتے ہیں جس کافر پہ دم نکلے

 

یہ اور بات منزلِ جاناں نہ مِل سکی
لیکن ہمارے ذوقِ طلب میں کمی نہ تھی​

 

یہ منزل اور گرد کارواں ساغر کہاں اپنے
سمٹ کر رہگزار وقت پر نقش قدم ہو جا

 

اُسے کہو کہ بہت نامُراد شے ہے جنوں
اُسے کہو کہ مجھے ہو بہت جنوں اُس کا​

 

تمنا درد دل کی ہو تو کر خدمت فقیروں کی
نہیں ملتا یہ گوہر بادشاہوں کے خزینوں میں

 

اور کچھ بھی مجھے درکار نہیں‌ہے تجھ سے
میری چادر میرے پیروں کے برابر کر دے