23 مارچ ۔۔۔آئیں مل کر عہد کریں

23 مارچ ۔۔۔آئیں مل کر عہد کریں

23 مارچ 1940 کو لاہور میں قرار داد پاکستان منظور کی گئی ۔ ایک آزاد مسلم وطن حاصل کرنے کا عزم مصمم کیا گیا اور پھر اس کے حصول کے لئے کوئی دقیقہ فرگزاشت نہیں کیا گیا۔ انگریز کی منافقت اور ہندو کی تمام تر عداوت و خباثت کے باوجود اس عزم کو متشکل کیا اور اس خواب کو شرمندہ تعبیر کیا۔

اسی بلند اور مصمم عزم کا ایک اظہار مینار پاکستان بطور یادگار آج بھی اس جگہ موجود ہے۔

لیکن یہ ہماری احسان فراموشی ہے یا بد عہدی کہ ہم نے ایک طویل مینارہ تعمیر کر کے یہ سمجھ لیا کہ شاید ساری قربانیوں کا صلہ دے دیا، سارے عہد نبھا لیے اور آزادی کی نعمت کا حق ادا کر دیا ۔۔۔۔۔۔۔۔ اب ہم پر کوئی ذمہ داری یا کوئی عہد نہیں ۔۔۔۔۔
اگرچہ ہم زبانی طور پر اس کا اظہار نہیں کرتے لیکن آج ہماری صورتحال، وطن سے محبت اور ہمارا طرز عمل یہی بتاتا ہے کہ ہم تمام عہدو پیماں بھلا چکے ہیں۔ تمام ذمہ داریوں سے مبرا ہیں ۔۔۔۔۔۔

یہی وجہ ہے کہ ہماری حالت بد سے بد ترین ہوتی چلی جا رہی ہے، بجائے ترقی کے تباہی کی طرف سفر تیز ہو رہا ہے اور مینار پاکستان جن بلندیوں کا امین ہے ہم اس سے کہیں زیادہ تنزلی کا شکار ہو رہے ہیں۔

ضرورت ہے ایک بار پھر عزم نو کی، تاریخ کے جھرونکوں سے جھانک کر ماضی سے رشتہ استوار کرنے کی، اپنے اسلاف کے نقش قدم کو مشعل راہ بنانے کی۔ اقبال کے خواب کو اپنا خواب اور قائد کی لگن کو اپنی لگن بنانے کی۔
تا کہ ایک بار پھر وطن عزیز وہ بہاریں دیکھے جس کے دیدار کے لئے اس کی آنکھیں ترس گئی ہیں۔

تو آئیے آج ہم سب عہد کرتے ہیں اپنے وطن کی ترقی کے لئے اپنا مطلوبہ کردار ادا کرنے کا ۔۔۔۔ آئیے ہم ایک بار پھر متحد ہو جائیں، تما نفرتوں کو محبتوں میں تدیل کرنے اور فاصلوں کو قربتوں میں تبدیل کرنے کے اٹھ کھڑے ہوں۔۔

اللہ وطن عزیز کی حفاظت فرمائے ۔۔۔ آمین

​

خدا کرے کہ میری ارض پاک پر اترے
وہ فصل گل کہ جسے اندیشہ زوال نہ ہو​