یہ نوازشیں یہ عنائتیں غمِ دوجہاں سے چھڑا دیا ۔۔خالد محمود خالد نقشبندی مجددی

صلی اللہ علیہ وآلہ وسلم​

یہ نوازشیں یہ عنائتیں غمِ دوجہاں سے چھڑا دیا
غمِ مصطفیٰﷺ ترا شکریہ مجھے مرنا جینا سکھا دیا

وہ خدا ہے جس کا خیال بھی مری ہر پہنچ سے بلند ہے
وہ نبیﷺ کا حُسن و جمال ہے کہ خدا کا جس نے پتہ دیا

مرا سوز لذتِ زندگی مرے اشک میری بہار ہیں
یہ کرم ہے عشقِ رسولﷺ کا مجھے درد نے بھی مزا دیا

کہاں میں کہاں تری آرزو کہاں میں کہاں تری جستجو
تو قریب تھا تو قریب ہے جو حجاب تھا وہ اٹھا دیا

تو کریم کتنا عظیم ہے تو رؤف ہے تو رحیم ہے
کوئی بھیک مانگنے آ گیا تو ضرورتوں سے سوا دیا

جو ملال میرا ملال تھا تمہیں اس کا کتنا خیال تھا
کہ اجڑ گیا تھا دیارِ دل اسے تم نے آ کے بسا دیا

وہ نگاہ کتنی حسین تھی جو تجلیوں کی امین تھی
کہ جہاں پہ حُسنِ بلال کا نیا نقش جس نے جما دیا

میں ہوں اپنے حال میں مطمئن میں کسی کو کیسے بتاؤں گا
یہ معاملات ہیں راز کے مجھے ان کے عشق نے کیا دیا

ترے ذکر و فکر سے زندگی بہر اعتبار ہے بندگی
یہ کرم ہے مری نگاہ میں مرا اعتبار بڑھا دیا

وہ گھڑی بھی آئے کہ خواب میں وہ دکھائیں اپنی تجلیاں
میں کہوں کہ آج حضورﷺ نے مرا بختِ خفتہ جگا دیا

یہ تمہارا خالدِؔ بےنوا ہے سرور و کیف کا واسطہ
اسے ڈھونڈنے لگے میکدے اسے کیسا جام پلا دیا
-------
خالد محمود خالد نقشبندی مجددی
قدم قدم سجدے ۔ مجموعہ نعت
صفحہ نمبر۔ 68 تا 69​

 

اللہ تعالیٰ آپ کوبھی جزائے خیر عطا کرے آمین