یہ مُجھ پہ کرم اُنﷺ کا ہے، یہ اُنﷺ کی عطا ہے ۔۔ شیخ صدیق ظفرؔ

یہ مُجھ پہ کرم اُنﷺ کا ہے، یہ اُنﷺ کی عطا ہے
بن مانگے ہی خیرات سے کشکول بھرا ہے

بُت خانے بہت، جھوٹے خُداؤں کی تھی بھرمار
محبوبِ خُداؐ نے یہ کہا ’ایک خُدا ہے ‘

سرکارﷺ کے صدیق ہیں، صدیقؓ و عمرؓ بھی
عثمانِ غنیؓ اور علیؓ شیرِ خُدا ہے

برسائیے پھر ابرِ کرم، اے شہِ بطحاؐ!
مسموم ہوئی پھر سے زمانوں کی فضا ہے

فرعونِ زماں پھر سے گرہیں ڈال رہے ہیں
قرآن کی تعلیم ہی بس عُقدہ کشا ہے

یاد آئی بہت پھر سے نواسۂ نبیﷺ کی
نمناک ہے پھر آنکھ تو پھر زخم ہرا ہے

ہر آن ظفرؔ بھرتی ہیں یاں جھولیاں سب کی
سرکارﷺ کا در ہے، یہ درِ جُود و سخا ہے
٭٭٭
خزینۂ حمد و نعت ﷺ ۔۔۔ شیخ صدیق ظفرؔ
​

 

اللہ تعالیٰ آپ کو بھی جزائے خیر عطا کرے آمین