یہ جُود و کرم آپؐ کا ہے، فیض و عطا ہے ۔۔ شیخ صدیق ظفرؔ

یہ جُود و کرم آپؐ کا ہے، فیض و عطا ہے
سُوکھا ہوا اک پیڑ ہرا پھر سے کیا ہے

الطاف و عنایاتِ خُدا، عشقِ محمدﷺ
سب کچھ ہے مرے پاس، یہ سب اُنؐ کا دیا ہے

محبوبؐ کی خاطر ہی بنایا گیا سب کچھ
محبوبؐ خُدائی کا، وہ محبوبِ خُدا ہے

تاریک جہاں سارے ہوئے جس سے مُنوّر
سرکارﷺ کے انوار کا روشن وہ دیا ہے

سرکارﷺ نے بھٹکے ہوئے لوگوں کو بتایا
معبود ہے اللہ ہی، وہی سب سے بڑا ہے

اک بندۂ مسکین کو دربان بنا کر
سرکارﷺ نے کتنا بڑا احسان کیا ہے

سرکارﷺ کی چوکھٹ سے ظفرؔ سر نہ اُٹھانا
یوں تیرا بھلا ہو گا، یہی اُنؐ کی رضا ہے
٭٭٭
خزینۂ حمد و نعت ﷺ ۔۔۔ شیخ صدیق ظفرؔ​

 

اللہ تعالیٰ آپ کو بھی جزائے خیر عطا کرے آمین