یہ جو مہتاب کا جھومر فلک تیری جبیں پر ہے ۔ منظر چشتی

یہ جو مہتاب کا جھومر فلک تیری جبیں پر ہے
فدا وہ بھی مرے سرکار کے روئے حسیں پر ہے

عمل پر کیا کریں، تکیہ بس اس حسن یقیں پر ہے
گنہ گاروں کی بَخشِش رحمۃ للعالمیں پر ہے

کوئی پوچھے اگر مجھ سے یہاں جنت کہیں پر ہے ؟
تو میں بے ساختہ کہہ دوں عرب کی سرزمیں پر ہے

فلک اترا نہ تو مہتَاب يا خُورشید و انجُم پر
فَروزَاں ہیں یہ جِس کے نُور سے وُہ اِس زَمیں پر ہے

خدا و مصطفٰی کے حکم پر چھوڑا جنہوں نے گھر
تصدق میری جاں أن سب وطن کے تارکیں پر ہے

نگاہ نازنیں ایک ایک عاصی پر ہے محشر میں
نگہ ایک ایک عاصی کی نگاہ نازنیں پر ہے

زنان مصر جس کے حسن پر قربان ہیں منظر
وہ یوسف شیفتہ سرکار کے روئے حسیں پر ہے

منظر چشتی​

 

اللہ تعالیٰ آپ کو بھی جزائے خیر عطا کرے آمین