یہ بڑے ظرف کے مرحلے ہیں

یہ بڑے ظرف کے مرحلے ہیں ، معترض کیوں مرا نکتہ چیں ہے
عشق شاہ مدینہ کا دعویٰ ہر بشر کو مناسب نہیں ہے

رنگ اور نسل کے توڑ کر بت یہ بتایا ہمیں مصطفٰی نے
جس کا کردار ہے خوبصورت وہ خدا کی نظر میں حسیں ہے

اس کے ذروں میں سورج چھپے ہیں عرش سے جس کے رشتے ملے ہیں
آسماں جس کی وسعت میں گم ہے ، وہ در مصطفٰی کی زمیں ہے

سرور انبیا کی محبت حاصل دین و دنیا ہے یارو
یہ تعلق ہے ایسا تعلق ، جو کبھی ٹوٹتا ہی نہیں ہے

مجھ گناہگار کی ایسی قسمت ، رہنما بن گئی رب کی رحمت
میں مسافر ہوں کوئے نبی کا ، ہمسفر میرا روح الامیں ہے

خود سے اعجاز میں آشنا ہوں ، خادم سید الانبیا ہوں
بعد حمد خدا میرے لب پر مدحت خاتم المرسلیں ہے

یہ بڑے ظرف کے مرحلے ہیں ، معترض کیوں مرا نکتہ چیں ہے
عشق شاہ مدینہ کا دعوٰی ہر بشر کو مناسب نہیں ہے

​