یٰسین یا مزمل و طٰہ کہوں تجھے ۔ احمد علی برقی اعظمی

یٰسین یا مزمل و طٰہ کہوں تجھے
اے پیکرِ جمال میں کیا کیا کیا کہوں تجھے
معراج کا شرف ہے تجھے اس لئے نہ کیوں
مسند نشینِ عرشِ معلیٰ کہوں تجھے
گلزار دینِ حق کا گُلِ سَرسَبَد ہے تو
’’ باغِ خلیل کا گُلِ زیبا کہوں تجھے ‘‘
وجہہِ وجود عالمِ امکاں ہے تیری ذات
پھر کیوں نہ اس کا انجمن آرا کہوں تجھے
بعد از خدا توہی ہے فقط سب کا چارہ ساز
مسیکن و بیکسوں کا سہارا کہوں تجھے
خیر البشر نہیں ہے کوئی جب ترے سوا
پھر کیوں نہ سب سے ارفع و اعلیٰ کہوں تجھے
برقی کی صرف تجھ پہ شفاعت ہے مُنحَصِر
اپنا نہ کیوں نجات دہندہ کہوں تجھے
----
احمد علی برقی اعظمی​

 

اللہ تعالیٰ آپ کو بھی جزائے خیر عطا کرے آمین