یوں ضیا بار جہاں میں تیری سیرت دیکھی ۔۔ سیدہ زینب ؔسروری

صلی اللہ علیہ وآلہ وسلم
یوں ضیا بار جہاں میں تیری سیرت دیکھی
چار سو لطف تیرا، بخشش و رحمت دیکھی

شش جہت میں تیری، ہر شے پہ حکومت دیکھی
آپ کے حق میں ہی یزداں کی مشیت دیکھی

رفعتِ عرشِ بریں تک ہے رسائی تیری
شان دیکھی ہے کسی کی، نہ یہ عظمت دیکھی

حسنِ صورت میں نہ سیرت میں کوئی ثانی ہے
ہر ادا میں تیری، اللہ کی قدرت دیکھی

سیدی رشکِ دو عالم تیری عظمت کی قسم
دوسرا میں تیری ہر ایک پہ سبقت دیکھی

آپ نے اپنے لیے کچھ نہیں مانگا رب سے
اپنی امت کے لیے رب سے شفاعت دیکھی

منتظر ہیں سرِ کوثر سرِ میزان و صراط
اُن کی عشاق پہ اس درجہ عنایت دیکھی

مرتبہ یہ انہیں حاصل ہے جہاں میں زینبؔ
ہے محبوں کو جو ان سے نہ یہ چاہت دیکھی
--------
سیدہ زینبؔ سروری​

 

اللہ تعالیٰ آپ کو بھی جزائے خیر عطا کرےآمین