یوں تو خوش خوش ملیں گے سب سے ہم

یوں تو خوش خوش ملیں گے سب سے ہم
نام تیرا نہ لیں گے اب سے ہم
تیری دنیا سے جو نکل آئے
تیری دنیا میں تھے ہی کب سے ہم
بوجھ دل سے اتارتے ہی ترا
ہلکے پھلکے ہوئے ہیں تب سے ہم
بہت آگے نکل گیا تھا تُو
دیتے آواز کیا عقب سے ہم
تُو نے دروازہ جونہی دکھلایا
نکل آئے بڑے ادب سے ہم
جن دنوں تیرے دل کے پاس رہے
دُور تھے اپنے روز و شب سے ہم
خود ہی گم ہوتے ہوتے رہ گئے ہیں
باز آئے تری طلب سے ہم
تُجھ سے کوئی گلہ نہیں اپنا
اور، راضی ہیں اپنے رب سے ہم
عُمر باقی کوئی اگر ہے، ظفرؔ
وہ بھی جی لیں گے اپنے ڈھنگ سے ہم
​