ہو گئے مبعوث جب سرکارﷺ زیرِ آسماں

چل رہی تھی ظُلم کی تلوار زیرِ آسماں
مرحلہ تھا زِیست کا دُشوار زیر آسماں
ہر کوئی تھا درپئے آزار زیرِ آسماں
جا بجا تھا ایک ہاہا کار زیر آسماں
لمحہءِ رحمت تھا پھر درکار زیر آسماں
ہوگئے مبعوث تب سرکارﷺ زیرِ آسماں

جَبر کی جب آندھیاں تھیں تیز تب کی بات ہے
تھا سِتَم گویا نِشاط انگیز تب کی بات ہے
تھا بدی کا کھیت جب زرخیز تب کی بات ہے
جب مناظر تھے قیامت خیز تب کی بات ہے
کچھ بھی باقی تھا نا جب معیار زیرِ آسماں
ہوگئے مبعوث تب سرکار زیرِﷺ آسماں

ہر طرف پُھوٹی ہوئی تھی پھوٹ ایسا وقت تھا
چھا رہا تھا چہار جانب جُھوٹ ایسا وقت تھا
قید سچ تھا کِذب کو تھی چھوٹ ایسا وقت تھا
مچ رہی ہر جگہ اِک لوٹ ایسا وقت تھا
کج روی تھی طرہءِ دستار زیر آسماں
ہوگئے مبعوث تب سرکارﷺ زیرِ آسماں

آپ ﷺ آئے تو جہاں میں روشنی ہونے لگی
پھر مشِیّت کِشتِ دل میں تُخمِ خُوش بونے لگی
خوف سے آزاد ہو کر رات بھی سونے لگی
اعتباراپنا بُرائی ہر جگہ کھونے لگی
کُفر کے ایواں ہوئے مسمار ہوئے زیر آسماں
ہوگئے مبعُوث جب سرکارﷺ زیرِ آسماں
‌
شاخسارِ اتقاء پر پُھول پھل آنے لگے
ظلم کے مارے ہوئے پھر معدلت پانے لگے
طائِرانِ خوشنوا بھی زم زمے گانے لگے
پھر سے جبرئیلِ اَمیں آنے لگے جانے لگے
پُھول مہکے کھل گئے گل زار زیر آسماں
ہوگئے مبعُوث جب سرکارﷺ زیر آسماں

پالنے والے کی آخِر ذات پہچانی گئی
لب پہ تسبیحات تھیں سجدے میں‌ پیشانی گئی
دُکھ مٹا تکلیف بھاگی سب پریشانی گئی
چاندنی چَٹکی اندھیروں کی فراوانی گئی
صُبح کے پیدا ہوئے آثار زیرِ آسماں
ہو گئے مبعوث جب سرکارﷺ زیرِ آسماں

حنیف نازش

 

جواب: ہو گئے مبعوث جب سرکارﷺ زیرِ آسماں

جزاک اللہ
بہت ہی خوبصورت الفاظ اور احساسات ہیں ۔

 

جواب: ہو گئے مبعوث جب سرکارﷺ زیرِ آسماں

ماشااللہ
اللہ آپ کو جزائے خیر دے