ہو کرم سرکار اب تو ہو گئے غم بیشمار ۔۔ سید انوار زینؔ

ہو کرم سرکار اب تو ہو گئے غم بیشمار
ہو کرم گر آپ کا تو ہم پہ بھی آئے نکھار
نام لیتا ہوں جو آقا دل کو ملتا ہے سکوں
آپ ہی ہیں آپ ہی ہیں آپ ہی ہیں غمگسار
میں مدینے سے جو لوٹوں پھر ملے اذنِ سفر
میری قسمت میں خدایا یہ سفر ہو بار بار
نام لے کر آپﷺ کا مانگا خدا سے مل گیا
زندگی کے سب مسائل ہوگئے ہیں سازگار
کچھ نہیں ہم عاصیوں کے پاس اب اس کے سوا
ہے ندامت سے جھکا سر آنکھ میں اشکوں کے ہار
آپ کے در کی گدائی سے ہی سارے فیض ہیں
آپ کے در کی گدائی پر مری ہے جاں نثار
بس نظر کعبے پہ ہو اور جاں نکل جائے مری
زینؔ کے مدفن پہ ہو خاکِ مدینہ تاجدار
سید انوار زینؔ​

 

اللہ تعالٰی آپ کو بھی جزائے خیر عطا کرے آمین