ہو وقتِ نزع بولے زباں صلِ وسلم

اے حُسنِ ازل، نورِابد، رحمتِ عالم
گلشن کے نظاروں میں بسا تیرا ترنم

اے مظہرِحق، اُمّی لقب، ختمِ رسالت
ان چاند ستاروں میں چمک تیرا تبسم

تو اوّل و آخر ہے تو ہی مرکز و محور
ہر دور، نبوت ہے تیری دائم و پیہم

تو نورِ مبیں، سرورِ دیں، عرش نشیں ہے
محشر میں‌لقب ہوگا تیرا شافعِ اعظم

پنہاں تیری تقلید میں‌عالَم کی بھلائی
یوں ہادئ برحق ہے تری ذاتِ معظم

ہے تاج تیرے سر پہ شہِ کون ومکاں کا
اقصیٰ کی امامت سے عیاں تیرا تقدم

راضی ہیں امامت پہ تیری سارے پیمبر
وہ عیسیٰ ہوں موسیٰ ہوں براہیم یا آدم

خیرات تیرے در سے ملے شاہ و گدا کو
اللہ نے خزانوں کا بنایا تجھے قاسم

اے والیء امت ! ذرا امت کی خبر لے
رستہ ترا بھولے ہیں بڑے خوار ہوئے ہم

اتنا تو کرم شاہِ امم ! ادنیٰ رضا پہ
ہو وقتِ نزع، بولے زباں صلِّ وسلّم

(محمد نعیم رضا)​

 

آمین ثم آمین

 

بہت خوبصورت نعت شریف ہے۔

نعیم بھائی اللہ تعالی آپ کی نیک تمنائیں پوری کرے۔ آمین

 

جواب: ہو وقتِ نزع بولے زباں صلِ وسلم

السلام علیکم۔ ہارون بھائی ۔ نوربہن اور برادر بھائی ۔
نعت کی پسندیدگی کے لیے بہت شکریہ ۔ دعاؤں میں ہمیشہ یاد رکھنے کی التماس ہے۔