ہم پرستار شہِ دولتِ دارین کے ہیں ۔ محمد عمران شریف

نعت رسول مقبولﷺ
-----
ہم پرستار شہِ دولتِ دارین کے ہیں
جو بھی ہیں جیسے بھی ہیں صاحبِ حرمین کے ہیں

کھلتے کلیوں کے کٹورے بھی ترا ذکر کریں
پھول ہر شاخ کے شیدائ ترے نین کے ہیں

مے نہ میخانے سے ہوتے ہیں سکوں یاب کبھی
جو بھی دیوانے تری چشمِ کریمین کے ہیں

اتنے تارے بھی یقینا سرِ آکاش نہیں
جتنے اعدادِ کرم سرورِ کونین کے ہیں

کوزہِ عمر کی پڑتال سے ادراک ہوا
گزرے جو لمحے مدینے میں وہی چین کے ہیں

یہیں ملتا ہے کہیں اور نہیں جاتے ہم لوگ
ہم غلامان درِ ثروتِ سبطین کے ہیں

ہم پہ آتی نہیں عمران کبھی شامِ ابد
صبح دم سے ہوے ہم سیدِ ثقلین کے ہیں
----
محمد عمران شریف​

 

اللہ تعالیٰ آپ کو بھی جزائے خیر عطا کرے آمین