ہم سے بھاگا نہ کرو دور غزالوں کی طرح

ہم سے بھاگا نہ کرو دور غزالوں کی طرح
ہم نے چاہا ہے تمھیں، چاہنے والوں کی طرح
خودبخود نیند سی آنکھوں میں گھلی جاتی ہے
مہکی مہکی ہے شبِ غم ترے بالوں کی طرح
تیرے بن رات کے ہاتھوں پہ یہ تاروں کے چراغ
خوب صورت ہیں مگر زہر کے پیالوں کی طرح
گنگناتے ہوئے در آ، کبھی ان سینوں میں
تیری خاطر جو مہکتے ہیں، شوالوں کی طرح
تیری زُلفیں، تری آنکھیں، ترے ابرو، ترے لب
اب بھی مشہور ہیں دنیا میں مثالوں کی طرح
ہم سے مایوس نہ ہو، اے شبِ دوراں کہ ابھی
دل میں کچھ درد چمکتے ہیں، اُجالوںکی طرح
مجھ سے نظریں تو ملائو کہ ہزاروں چہرے
میری آنکھوں میں سلگتے ہیں سوالوںکی طرح
زندگی، جس کو ترا پیار ملا وہ جانے
ہم تو ناکام رہے، چاہنے والوں کی طرح
جانثار اختر​