ہمیں کیا کیا ملا اس آستاں سے

ہمیں کیا کیا ملا اس آستاں سے
دیارِ درد سے کوئے فغاں سے

مرا سایہ بھی مجھ سے ہے گریزاں
شکایت کیا غبارِ کارواں سے

تلاش و آرزو میں عمر گذری
”تجھے اے زندگی لاؤں کہاں سے“

محبت ہی تھی انعامِ محبت
میں جب نکلا غمِ سود و زیاں سے

بہاروں نے فقط دیوانگی دی
کوئی امید ہے تو ہے خزاں سے

”تکلف برطرف میں صاف کہہ دوں“
تمہارا نام ہے اِس بے نشاں سے

حریمِ ناز میں ہے ذکر میرا
کہاں تک بات پہنچی ہے کہاں سے

مقدر ہی ترا ایسا ہے سرور
گلہ کیسا زمین و آسماں سے
سرور عالم راز سرور​