ہر عبادت کا سزاوار ہے رب العزت ۔ بلال رشید

ہر عبادت کا سزاوار ہے رب العزت
اپنے بندوں کا مدد گار ہے رب العزت
سورہ حمد سے ملتا ہے یہ پیغام ہمیں
تو ہی تعریف کا حقدار ہے رب العزت
جس سے جاتا نہیں خالی کبھی کوئی سائل
تیرا دربار وہ دربار ہے رب العزت
چاند تاروں میں اجالا جو نظر آتا ہے
یہ ترے حسن کا اظہار ہے رب العزت
روز و شب اہل محبت کی زبانوں پہ فقط
تیری وحدت کا ہی اقرار ہے رب العزت
جس کی محتاج ہے دارین کی ہر شے یکساں
تیری سرکار وہ سرکار ہے رب العزت
جس سے کرتے ہیں خریداری مناجات سے ہم
وہ ترے فضل کا بازار ہے رب العزت
دم بھروں کیوں میں بھلا غیر کی عظمت کا بلال
جب مرا مالک و مختار ہے رب العزت
---
بلال رشید​

 

اللہ تعالیٰ آپ کو بھی جزائے خیر عطا کرے آمین

 

سبحان اللہ- جزاک اللہ

 

اللہ تعالیٰ آپ کو بھی جزائے خیر عطا کرے آمین