گوشۂ طاقِ دروں میں تری مدحت کے سوا ۔۔ مسعود علی شاہ

گوشۂ طاقِ دروں میں تری مدحت کے سوا
کچھ نہیں رکھا ہے آقا اسی طلعت کے سوا

غیر ممکن ہے کہ ہو مجھ سے حسابِ محشر
مَیں تو کچھ لایا نہیں تیری شفاعت کے سوا

آپ کا ذِکر نہ ہو اور سخن کی تدبیر
پھُول کب پھُول ہُوا رنگت و نکہت کے سوا

عجز کیا تھامے بھلا تیرے مناقب کا قلم
ہاتھ کچھ آتا نہیں صیغۂ حیرت کے سوا

وسعت و رفعت و عظمت کے معانی ہیں عبث
تری رحمت کے سوا، تیری عنایت کے سوا

کچھ نہیں مانگا ہے خالِق سے، مرے بندہ نواز
خالی دامن کی قسم ! تیری محبت کے سوا

خُوب معلوم ہے کیا تیرا ہے، کیا تیرا نہیں
باقی سب تیرے لیے، ایک عبادت کے سوا

کھینچا ہے مالکِ طاعت نے یہ خطِ تنسیخ
بات بنتی ہی نہیں تیری اطاعت کے سوا

مالکِ کُل ! مری قسمت کا بھرم رکھ لیجو
کچھ نہیں پاس مرے تمغۂ نسبت کے سوا

دل کی تسکیں کا نہیں کوئی بھی امکاں مقصود
جادۂ شوق پہ کھِلتی ہُوئی ہجرت کے سوا
----
Maqsood Ali Shah
مسعود علی شاہ



​

 

کچھ نہیں مانگا ہے خالِق سے، مرے بندہ نواز
خالی دامن کی قسم ! تیری محبت کے سوا​

 

مالکِ کُل ! مری قسمت کا بھرم رکھ لیجو
کچھ نہیں پاس مرے تمغۂ نسبت کے سوا​

 

سبحان اللہ & جزاک اللہ

 

اللہ تعالٰی آپ کو بھی جزائے خیر عطا کرے آمین

​