کہانی ایک خلاباز کی

قسط نمبر 1​

ستاروں‌کے بحر بیکراں میں‌زندگی کی تلاش جاری تھی۔خلائی ادارے میں آج عبداللہ اپنی ٹریننگ مکمل کر چکا تھا اور اپنے مشن کی حتمی ہدایات ملنے کے انتظار میں ‌‌بیٹھا تھا۔ وہ سوچ رہا تھا کہ یہ کل ہی کی بات لگتی ہے کہ اسے خلابازی کے شعبے کے لیے منتخب کیا گیا تھا۔ پھر سخت ٹریننگ کا ایک دور شروع ہوگیا۔ آغاز میں تو یوں لگتا تھا کہ اتنی سخت ٹریننگ کا یہ سلسلہ کبھی بھی ختم نہ ہوگا۔ عبداللہ زہین اور محنتی تو تھا ہی اور پھر خلابازی اسکا شوق بھی تھا اس لیے ٹریننگ کے ہر مرحلے میں اس نے نمایاں کارکردگی دکھائی۔ پھر اسے وہ دن بھی یاد آیا جب ان کی ٹریننگ مکمل ہوئی اور ایک بڑے ہال میں انہیں سندوں سے نوازا گیا۔صدر مملکت نے خود اپنے ہاتھوںسے عبداللہ کو سونے کا تمغہ پہنایا جو اس کی قابلیت کا ثبوت تھا۔ اسے یہ بھی یاد آیا کہ کچھ لوگوں نے کس طرح اس سے حسد کیا مگر اس کی قابلیت کے آگے کچھ نہ کر سکے۔ اور آج وہ ادارے کے سب سے اہم مشن کے لیے منتخب ہو کر حتمی ہدایات لینے کے لیے یہاں ‌‌بیٹھا تھا۔اسے یہ بھی یاد آیا کہ ٹریننگ کے اختتام پر ان سب نے یک زبان ہو کر حلف اٹھایا تھا کہ انہیں جو بھی کام سونپا جائے گا وہ اسے پوری دیانتداری اور لگن سے پورا کریں گے۔
کمرے کا دروازہ کھلا اور ایک اردلی نے عندیہ دیا کہ عبداللہ کو بریفنگ روم میں بلایا گیا ہے۔ عبداللہ کی سانسیں تیز ہو گئیں اور وہ کچھ نروس سا ہو کر اٹھا۔ اس کی یہ حالت لمحاتی تھی اگلے ہی لمحے وہ پرسکون ہوگیا۔ یہ اس کی خود اعتمادی تھی یا ٹریننگ کا کمال مگر وہ اعتماد کے ساتھ بریفنگ روم میں داخل ہوا۔ بریفنگ روم کا ماحول بھی پراسرار سا لگ رہا تھا۔ نیم دائرہ شکل میں ایک میز کے گرد 7 افرد بیٹھے تھے۔ ان میں ایک ادارے کا سربراہ تھا جسے عبداللہ نے پہلی نظر میں ہی پہچان لیا۔ سربراہ نے عبداللہ کو خوش آمدید کہا اور سامنے رکھی کرسی کی طرف اشارہ کرتے ہوئے کہا، بیٹھو۔ یہ ایک بہت اہم مشن ہے اور اس پر اربوں روپے خرچ کیے گئے ہیں۔ ہم ایک دور افتادہ سیارے پر زندگی کے اثار کی موجودگی کا پتہ چلانا چاہتے ہیں۔ تمیں ایک خودکار خلائی گاڑی میں بھیجا جائے گا جو خودبخود راستے کا پتہ چلا کر تمہیں سیارے تک پہنچا دے گی اور 60 دن کی مدت پوری ہونے کے بعد خودبخود پرواز کرے گی اور واپس زمین پر لے آئے گی۔ تم نے وہاں کی مٹی اور پتھر کے نمونے حاصل کر کے تجربات کرنےہیں کہ کیا اس سیارے پر زندگی کے ہونے کے کوئی امکانات ہیں‌‌‌‌‌‌۔عبداللہ جو بہت انہماک سے بریفنگ سن رہا تھا بولا بہت بہتر جناب ایسا ہی ہوگا۔خدا کی مدد تمارے ساتھ ہو کل صبح تماری روانگی ہے۔ یہ کہہ کر سربراہ نے سر کو ایک جنبش دی اور عبداللہ اپنی نشست سے اٹھ کر باہر آ گیا۔
(جاری ہے)

 

قسط نمبر 2​

خلائی ادارے میں‌آج صبح سویرے سے بہت گہما گہمی ہے۔ چھوٹی بڑی گاڑیاں ادھر سے ادھر بھاگتی پھر رہی ھیں۔ کوئی خلائی راکٹ میں ایندھن بھر رہی ہے اور کوئی سامان کو ادھر سے ادھر لے جا رہی ہے۔ کچھ انجنیر راکٹ اور خلائی گاڑی کا حتمی معائنہ کر ہیں۔ کچھ اور انجنیر کمپیوٹر کی اسکرین پر بدلتے ہو ئے نمبر دیکھ رہے ہیں۔ عبداللہ اپنی خلائی گاڑی میں‌بیٹھاسوچ رہا ہے کہ آخرکار اس کے خوابوں کی تعبیر کا وقت آ پہنچا ہے ۔ اب وہ خلا کی وسعتوں کا نظارہ کرے گا۔ وقت گزرتا گیا اور عبداللہ کو اپنی اسکرین پرگھٹتے ہو لمحے واضع نظر آنے لگے۔5 4 3 2 1 اور ایک زور دار جھٹکا اور عبداللہ کا آسمان کی طرف سفر شروع ہو گیا۔عبداللہ کی نظر ان دو گھڑیوں‌پر پڑی جو دن اور وقت بتانے کے لیےتھیں۔ یہ دونوں‌گھڑیاں اس وقت ساکت تھیں۔ سیارے پر اترنے کے بعد انہوں نے خود بخود چل پڑنا تھا۔
خدا خدا کر کے وہ وقت آیا جب خلائی گاڑی سیارے پر اتر گئی اور دونوں‌ساکت گھڑیاں چل پڑیں۔یہ گھڑیاں الٹا چل رہی تھیں‌اور گزرے وقت کی جگہ باقی وقت بتا رہی تھیں۔عبداللہ نے طریقہ کار کے مطابق خلائی گاڑی کا دروازہ کھولا اور چند ضروری اوزار لے کر باہر آ گیا۔ ہوا کے سرسری معائنے کے بعد اسے معلوم ہوا کہ سیارے کی فضا میں‌کوئی مہلک اجزا شامل نہیں‌اس لیے وہ خلائی سوٹ کے بغیر بھی اس سیارے پر رہ سکتا ہے۔ اس نے خلائی سوٹ اتارا اور سیارے پر چہل قدمی کرنے لگا۔ چہل قدمی سے تھک کر وہ واپس اپنی خلائی گاڑی میں‌آیا۔ اسکی نظر گھڑی پر پڑی اسے سیارے پر آئے محض دو گھنٹے ہوئے تھے۔ اس نے کچھ دیر سستانے کا فیصلہ کیا۔ وہ اپنی سیٹ پر آیا اور سونے کی کوشش کرنے لگا۔ خلائی گاڑی نہ جانے کتنا عرصہ سفر کر کے آئی تھی اور اس کی سیٹ پر بامشکل نیم دراز ہونے کی گنجائیش تھی۔اس نے سوچا کہ میں‌نے یہاں‌دو ماہ رہنا ہے اور جب تک انسان سکون سے سو نہ سکے وہ کام پر پوری توجہ نہیں‌دے سکتا اس لیے پہلے رہنے کا کوئی مناسب بندوبست کیا جائے۔
عبداللہ پھر باہر نکلا اور گاڑی کے قریب ایک جگہ منتخب کر کے پتھروں سے ایک احاطے کی نشان دھی کر کے اپنے رہنے کی جگہ بنانے لگا۔ اس نے تھوڑی سی کھدائی کی تو اسے کچھ چمکدار مادہ نظر آیا۔ معائنہ کرنے پر معلوم ہوا کہ یہ تو سونا ہے۔ اس نے کچھ اور جگہوں‌پر کھدائی کی تو معلوم ہو کہ سیارے پر جگہ جگہ قیمتی دھاتوں کے انبار ہیں۔ان میں‌سونا، پلاٹنیم اور یورینیم تو بہت ہی بہتات میں‌ہیں۔ چند دن کی کاوش کے بعد عبداللہ اپنے رہنے کے لیے ایک کمرہ تیار کر چکا تھا۔ اب وہ اپنی ضروری اشیاء لینے خلائی گاڑی میں‌گیا۔ اس کی گھڑی پر نظر پڑی جو ابھی تک 55 دن باقی ہونے کا عندیہ دے رہی تھی۔ اسے اپنے تجربات کا خیال آیا جو اس نے یہ سوچ کر موخر کر دیا کہ یہ تجربات تو دو ہفتے میں‌مکمل ہو جائیں‌گے اور پھر جب میرے رہنے کی جگہ آرام دہ ہو گی تو کام اور بھی تیزی سے ہو گا۔۔۔
(جاری ہے)

 

قسط نمبر 3​

عبداللہ کو سیارے پر آئے دس دن ہو چکے ہیں‌اور ایک آرام دہ کمرے کے علاوہ عبداللہ نے اپنے کام کرنے کے لیے بھی ایک کمرہ تیار کر لیا ہے۔ وہ اپنے بستر پر لیٹا سوچ رہا ہے کہ اس سیارے پر قیمتی دھاتوں‌کی کتنی بہتات ہے۔ یورینیم جس کی افزودگی پر لاکھوں روپے خرچ ہوتے ہیں‌یہاں ایسے پڑی ہے جیسی زمین پر سمندری ریت۔سونا اور پلاٹینیم جو زمین پر نایاب اشیاء ہیں‌ یہاں چکنی مٹی سے بھی ارزاں‌ہے ۔مجھے یہ دھاتیں اپنے ساتھ لے جانی چاہییں۔ اگلے دن سے اس نے کھدائی شروع کی اور قیمتی دھاتیں‌جمع کرنا شروع کر دیں۔اب عبداللہ سارا دن دھاتیں جمع کرتا اور شام کو تھک کر سو جاتا اور صبح پھر اپنے کام میں‌مشغول ہو جاتا۔ اسی مصروفیت میں‌روز و شب گزرتے رہے۔ اس دواران جب بھی وہ گھڑی کو دیکھتا تو یہی سوچتا کہ تجربے تو چند دن کی بات ہیں‌جب میں اتنی قمیتی دھاتیں‌لے کر جاوں گا تو ادارہ مجھے خوب انعام دے گا۔
آخر وہ دن بھی آپہنچا جب کھڑی نے پندرہ دن باقی رہ جانے کا عندیہ سنایا۔اب عبداللہ کو پریشانی شروع ہوئی اور اس نے اپنا تجربات کا سامان نکالا۔ جلدی میں‌کوئی بھی کام سیدھا نہیں‌ہوتا اور یہی عبداللہ کے ساتھ بھی ہوتا رہا۔ یہاں‌تک کے آخری دن آ پہنچا۔ گھڑی نے مدت ختم ہونے کا اعلان کیا اور خلائی گاڑی میں‌نصب الارم بجنے لگے۔ عبداللہ فورا گاڑی میں‌بیٹھا اور واپسی کا سفر شروع کرنے لگا۔ جوں ہی گاڑی نے اڑنے کی کوشش کی ایک دم سرخ بتیاں روشن ہو گئیں‌ اور کمپیوٹر نے بتایا کہ گاڑی میں‌وزن اس کی استعداد سے زیادہ ہے ۔ عبداللہ نے پریشانی میں‌تھیلے باہر پھینکنا شروع کیا۔ سرخ بتیاں ہنوز روشن تھیں‌اور الارم کا شور اور کمپیوٹر کا پیغام جاری تھا۔
(جاری ہے)

 

قسط نمبر 4​

خلابازی کے ادارے میں آج خوب رونق ہے ۔ دور دراز کے سیارے پر بھیجی جانے والی خلائی گاڑی نے اپنے شیڈول کے مطابق آج زمین پر پہنچنا ہے۔ ایک بڑے کمرے میں بہت سے لوگ بیٹھے کمپیوٹر کی اسکرینیں دیکھ رہے ہیں۔ انجنیرز میں‌کسی قدر بےچینی ہے۔ ابھی تک خلائی گاڑی رابطے میں‌نہیں‌آئی تھی۔ پھر پورے کمرے میں‌کمپیوٹر کا پیغام نشر ہونا شروع ہوا جو اس بات کی خبر دے رہا تھا کہ خلائی گاڑی سے رابطہ ہو گیا ہے۔اور کمپیوٹر اسکرینوں پر خلائی گاڑی کر مناظر نظر آنے لگے۔ انجنیرز اپنی پیشہ ورانہ مہارت سے خلائی گاڑی کو ہدایات بھیجنے لگے اور اسکرینوں پر خلائی گاڑی کا منظر واضع تر ہوتا گیا۔
عبداللہ جب خلائی گاڑی کا دروازہ کھول کر باہر آیا تو ایک جم غفیر اس کے استقبال کے لیے جمع تھا۔ ہر طرف سیکورٹی والے کھڑے تھے جو عوام کو ایک حدبندی سے آگے نہیں‌آنے دے رہے تھے۔ ادارے کے سربراہ نے عبداللہ کا استقبال کیا۔عبداللہ کے ماں‌اور باپ بھی وہیں موجود تھے۔ ماں نے عبداللہ کو گلے لگا کر ماتھا چوما اور باپ نے کمر پر تھپکی دے کر کہا “بیٹا ہمیں‌تم پر ناز ہے“۔اس کے ساتھ ہی ان گنت مائیک اور کیمرے عبداللہ کی طرف بڑھے جو اس کے تاثرات جاننا چاہتے تھے۔ عبداللہ کی خوشی کی کوئی انتہا نہیں تھی۔ میڈیا والوں‌کو ہٹا کر سیکورٹی عبداللہ کو ایک بند شیشوں‌والی گاڑی میں‌بٹھایا اور لے گئے۔
آرام کرنے کے بعد عبداللہ اپنے مشن کی رپورٹ دینے کے لیے اسی بریفنگ روم میں‌بیٹھا ہے جہاں‌ اسے جاتے ہوئے بریفنگ دی گئی تھی۔ وہی پراسرا ماحول اور اسی طرح نیم دائرہ میں‌بیھٹے ہوئے افراد۔ عبداللہ کی خلائی گاڑی میں‌پڑے ہوئے تھیلے بھی وہیں‌پہنچا دیے گئے تھے۔سربراہ نے سوال کیا۔ عبداللہ یہ بتائیں‌کہ اس سیارے پر زندگی کے کیا امکانات ہیں۔عبداللہ نے کہا جناب اس سیارے کی کیا ہی بات ہے۔ کون سی ایسی قمیتی دھات ہے جو وہاں بکثرت موجود نہیں، سونا، چاندی، پلاٹینیم یورینیم غرض ہر قیمتی دھات وہاں‌ایسے ہے جیسے ہمارے ہاں پانی۔میں‌نے وہاں‌ بڑی مقدار میں یہ دھاتیں جمع کیں۔
سربراہ نے کہا، مجھے وہاں‌موجود دھاتوں‌سے کوئی دلچسپی نہیں مجھے یہ بتاو کہ وہاں پر تم نے جو تجربات کرنے تھے ان کے کیا نتائج ہیں۔ عبداللہ نےاپنے تھیلوں کی طرف رخ کیا اور ایک تھیلے کو کھولا۔ اس میں وہ اوزار تھے جو وہ ساتھ لے کر گیا تھا اور کچھ نہیں۔ عبداللہ نے دوسرا تھیلا کھولا اور اس کی تلاشی لینے لگا۔ اس میں سے کچھ سونے کی ڈلیاں اور پلاٹینیم کے ٹکڑے برامد ہوئے۔ عبداللہ نے وہ ٹکڑے سربراہ کے سامنے رکھتے ہوئے کہا یہ وہ قیمتی دھاتیں ہیں‌جو اس سیارے پر بکثرت موجود ہیں۔ سربراہ نے سخت لہجے میں‌کہا یہ قیمتی دھاتیں‌ ہمارے لیے فضول ہیں تم تجربات کے بارے میں ‌بتاو۔ عبداللہ نے تیسرااور آخری تھیلا کھولا تو اسے کچھ کاغذات ملے۔ اس نے کاغذات سربراہ سامنے رکھ دیے۔ تھوڑی دیر کاغذات الٹ پلٹ کرنے کے بعد سربراہ نے کہا۔ یہ تجربات نہ صرف یہ کہ نامکمل ہیں‌بلکہ عجلت میں کیے جانے کی وجہ سے درست بھی نہیں۔ اور کچھ ہے تمہارے پاس پیش کرنے کے لیے۔ عبداللہ کو سمجھ نہیں‌آ رہی تھی کہ کیا جواب دے۔ اس نے جتنا کچھ جمع کیا تھا وزن زیادہ ہونے کی وجہ سے ساتھ نہیں‌آ سکا تھا۔
آخر میں‌ سربراہ نے فیصلہ سنایا کہ عبداللہ چونکہ اپنا دیا ہوا کام مکمل نہیں‌کر سکا اور اس میں عبداللہ کی اپنی سستی، کاہلی اور لالچ کا دخل تھا۔ عبداللہ کی وجہ سے ملک کو اربوں روپے کا نقصان ہوا اس لیے عبداللہ کو سزادی جائے۔ایک شخص نے کہا پر عبداللہ کو کیا سزا دی جائے۔ سب لوگوں کی اپنی اپنی رائے تھی سزا کے متعلق ۔سربراہ نے کہا چونکہ عبداللہ قوم کا مجرم ہے اس لیے اس کی سزا کا فیصلہ بھی قوم ہی کرے گی۔ عبداللہ کا سر شرم سے جھکا ہوا تھا اور وہ سوچ رہا تھا کہ کاش وہ اپنے دیے ہوئے کام کو یاد رکھتا اور فضولیات میں‌نہ پڑتا۔۔۔۔۔
(ختم شد)‌
آپ کے خیال میں‌عبداللہ کو کیا سزا ملنی چاہیے؟

 

درست کہا آپ نے

 

عبداللہ کی سزا کا مشورہ دینے کا بہت شکریہ۔
میری یہ کہانی ابھی تکمیل کے مراحل میں‌ہے۔ اس کہانی میں‌خلاباز ایک استعارہ کے طور پر بنایا گیا ہے۔ یہ دراصل انسان کی کہانی ہے جو اس زمین پر ایک مقصد دے کر بھیجا گیا ہے اور اس سے وعدہ بھی لیا گیا ہے کہ “الست بربکم قالو بلیٰ “۔ یہ کہانی مکمل شکل میں‌دوبارہ پوسٹ کروں گا۔
اس پلاٹ کو مدنظر رکھتے ہوئے اگر آپ بہتری مشورہ دیں تو میں‌اسے اپنی خوش قسمتی سمجھوں گا۔

 

بجو بہن ۔۔ آپ کی بات بجا ہے کہ عبداللہ کے خلا میں اکیلے ہونے والا معاملہ مجھے بھی محسوس ہوا اور اسی لیے مکمل شدہ کہانی میں عبداللہ اکیلا خلا میں نہیں جاتا بلکہ اسکی زوجہ کو بھی ساتھ بھیجا جاتا ہے۔

دوسرا یہ کوئی ڈراؤنی یا خوفناک کہانی نہیں، یہ تو انسان کی اپنی کہانی ہے۔ انسان کو دنیا میں ایک مقصد دے کر بھیجا گیا ہے اور وہ ہے کہ مقصد کو چھوڑ کر گھر، پیسہ اور عیش و آرام کے پیچھے بھاگ رہا ہے۔

 

السلام علیکم

محترم واصف بھائی کہانی کب مکمل کر رہے ہیں ؟

چھ ماہ سے زیادہ عرصہ ہو گیا ہے ۔۔۔۔۔۔۔۔۔

والسلام

 

میرے عزیز دوست عمر الغزالی کا مرکزی خیال تھا یہ کہانی اور جلد ہی چھپ جائے گی۔ پھر میں اسکو ادھر پوسٹ کروں گا۔

 

واصف جی۔۔ دیکھیں مجیب جی سیٹ پر بیٹھے کب سے انتظار کر رہے ہیں۔۔ اگلی قسط جلدی منگوا لیں۔۔ ورنہ مجیب جی بیٹھے بیٹھے تیلا ہی نہ ہو جائیں۔۔ :143:

 

جواب: کہانی ایک خلاباز کی

السلام علیکم

واصف بھائی آپ تشریف لا چکے ہیں‌تو اس کہانی کے حوالے سے بھی کوئی منصوبہ بنائیں

والسلام

 

جواب: کہانی ایک خلاباز کی

واصف بھائی ایک نظر کرم ادھر بھی

 

جواب: کہانی ایک خلاباز کی

جلد ہی اس کہانی کا نیا ورژن پوسٹ کر دوں گا۔

 

جواب: کہانی ایک خلاباز کی

لیں جی انتظار کی گھڑیاں ختم ہوئیں۔ عمر الغزالی صاحب کی کہانی ان پیج فارمیٹ میں مجھے موصول ہو گئی ہے اور ان کی اجازت سے یہاں پوسٹ کروں گا۔ صرف مجھے چند دنوں کی مہلت مذید عنایت کریں کہ میں اس کو یونی کوڈ میں‌کنورٹ کر لوں۔

مکمل کہانی جوکہ 100 صفحات پر مشتمل ہے یک مشت پوسٹ نہیں‌کروں گا بلکہ پہلے کی طرح قسط وار شائع ہو گی۔

آپ کی آراء اس کو مذید نکھارنے میں‌مددگار ہوں گی اس لیے بے لاگ تجزیہ کیجیے اور اپنے تاثرات سے بھی آگاہ کیجیئے۔

اور ہاں، یاد رہے کہ یہ کہانی ابھی تک کتابی شکل میں شائع نہیں‌ہوئی۔ میں‌عمر الغزالی صاحب کا مشکور ہوں‌کہ انہوں نے میری رائے کو اہم سمجھا اور پرنٹ کے لیے دینے سے پہلے مجھے جائزے کے لیے بھیجا۔

غزالی صاحب ایک مصنف ہیں‌اور ان کی کئی کتابیں پبلش ہو چکی ہیں۔ ان میں‌ کیمیا گری اور بچوں کو اقدار کیسے سکھائیں قابلِ ذکر ہیں۔ اس کے علاوہ روزنامہ پاکستان میں‌باقاعدگی سے کالم لکھتے ہیں۔