کوئی رغبت نہیں دل کو

کوئی رغبت نہیں دل کو
بہت سے چاند چہرے یاد آتے ہیں
جو میرے مطلع خواہش پہ چمکے تھے
اور اک اک کرکے گہناتے گئے تھے
کہ یہ گردش کی وہ مولائی سنت ہے
کہ جس میں کوئی تبدیلی نہیں ہوتی
بس اک دھندلا سا چہرہ ہے
کہ جس کی ٹمٹماتی ضو
ابھی تک دوستی کی
تیرہ روزی میں بہت پرعزم ہوکر آتی جاتی ہے
مگر کب تک؟
کہ یہ چہرہ تو پھر بھی چاند جیسا ہے
اگر سورج بھی ہوتا، تو بالآخر ڈوب ہی جاتا
اور اب ان ڈوب جانے والی چیزوں سے
کوئی رغبت نہیں دل کو
٭...٭...٭
معین نظامی​