کوئٹہ وچ دہشت گردی دے واقعات دی مذمت

اسلام و علیکم،​

امریکی دفترے خارجہ دی ڈيجيٹل آؤٹ ريچ ٹيم امریکی حکومت تے امریکی عوام ولوں دل دی ڈونگائیاں (گہرائیاں) تو حالیہ تشدد تے قتل وغارت دے واقعات دی مذمت کردے نے جیناں وچ بولان میڈیکل کمپلیکس کوئیٹہ جیدے وچ 14 معصوم طالبعات سمیت کئی بے گناہ لوکی زندگی توں ہتھہ گنواں بیٹھے۔ اے ویکھہ کے بڑا ہی دکھہ ہوندا وے کے انتہا پسند زندگی دے کسے وی شعبے نال تعلق رکھنڑ آلے لوکاں نوں ظلم دا نشانہ بناونڑ توں باز نہی آ رہے: طالبعات تو لے کے پولیو ورکر، سرکاری ملازم، تےامن امان قائم رکھنڑآلے محافظ کوئی وی ایناں دہشت گرداں توں محفوظ نہی۔ طالبات تے بانئ پاکستان، قائداعظم محمد علی جناح، دی زیارت آلی رہائیش گاہ نوں نشانہ بنا کے انتہا پسنداں اے ثابت کیتا وے کے او اپنڑیں سیاسی مقاصد حاصل کرنڑ لئی انسانی جان یا عمارات دے تقدس نوں پامال کرنڑ توں گریز نہی کردے۔ اے حرکتاں ایناں دہشت گرداں دے کالے تے مکروہ چہرے نوں عیاں کردیاں نے۔​

اے نام نہاد مذہب دے ٹھیکیداراں دے شر توں زنانیاں، طبی، تعلیمی، تے قومی فخر آلے مقامات محفوظ نہی۔ زیارت وچ بانئ پاکستان، قائداعظم محمد علی جناح، دی زیارت وچ رہائیش گاہ تے حملہ پاکستان دے قومی ورثے تے اک حملہ وے۔ اسی پاکستان دی ایس یادگار تے دھماکے دی دل کھول کے مذمت کردے آں۔​

اے تشدد دے واقعات ساڈے انتہا پسندی تے دہشت گردی خلاف لڑائی دے آرادے نوں کمزور نہی کرسکدے۔ اسی ایس گل دا پاکستان تے پاکستانی عوام نوں یقین دواناں چوہندے آں کے اسی پاکستان دی ایناں سفاک انتہا پسنداں خلاف لڑائی وچ پورا ساتھہ دینڑ لئی تیار کھلوتے آں۔ سانوں ایس گل تے پورا یقین وے کے اسی پاکستان نال رل کے انتہا پسندی نوں مکاونڑ تے خطے وچ مکمل امن قائم کرنڑ وچ کامیاب ہوجاواں گے۔ ​

لقمان – ڈيجيٹل آؤٹ ريچ ٹيم – يو ايس اسٹيٹ ڈيپارٹمينٹ​

digitaloutreach@state.gov​

www.state.gov​

https://twitter.com/usdotpunjabi