کلام پیر سید نصیر الدین شاہ

کلام حضرت سید پیر نصیر الدین شاہ گولڑوی

میری زندگی تو فراق ھے وہ ازل سے دل میں مکیں سہی
وہ نگاہ شوق سے دور ہیں رگ جاں سے لاکھ قریب سہی

ہمیں جان دینی ھے ایک دن کسی طرح وہ کہیں سہی
ہمیں آپ کھینچیے دار پر جو نہیں کوئی ،تو ہمیں سہی

سر طور ہو ، سر حشر ہو ، ہمیں انتظار قبول ھے
وہ کبھی ملیں وہ کہیں ملیں وہ کبھی سہی وہ کہیں سہی

نہ ہو ان پہ جو مرا بس نہیں کہ یہ عاشقی ھے ہوس نہیں
میں ان ہی کا تھا میں ان ہی کا ہوں وہ میرے نہیں تو نہیں سہی

جو ہو فیصلہ وہ سنائیے اسے حشر پر نہ اٹھائیے
جو کریں گے آپ ستم وہاں وہ ابھی سہی وہ یہیں سہی

اسے دیکھنے کی جو لو لگی تو نصیر دیکھ ہی لیں گے ہم
وہ ہزار آنکھ سے دور ہو وہ ہزار پردہ نشیں سہی

 

جواب: کلام پیر سید نصیر الدین شاہ

ماشاءاللہ۔
اللہ پیر صاحب کو جنت الفردوس میں اعلیٰ مقام عطا فرمائے۔
آمینِ۔