کلام از عمار خاں

السلام علیکم ساتھیو!
میں نے شاعری بہت کم عمری سے شروع کردی تھی۔ بہت کچھ لکھا، جس کا کافی حصہ بعد میں ضائع کردیا کیونکہ وقت کے ساتھ ساتھ اندازہ ہوتا رہا کہ کون سی شاعری کس معیار کی ہے۔ یہاں آپ میری شاعری میں سے انتخاب کا مطالعہ کرسکتے ہیں اور اپنی آراء کا اظہار بھی کرسکتے ہیں۔ امید ہے بارِ خاطر نہ ہوگا۔

 

غزل

عجیب رنگ یہ والا حضور، دیکھتا ہوں
جھلک رہا ہے جو رخ سے غرور، دیکھتا ہوں

دبائے دانت میں انگلی، کھڑا ہوں میں حیراں
سماگیا ہے جو تجھ میں فتور، دیکھتا ہوں

تمام شہر تجھے آنکھ بھر کے دیکھتا ہے
تمام شہر کو میں گھور گھور دیکھتا ہوں

بھرے جہان میں عزت مِری اچھالی ہے
ملا ہے آپ کو کتنا سرور دیکھتا ہوں

وہ مجھ سے لاکھ بھی چُھپتا رہے مگر عمار!
اسے میں ایک جھلک تو ضرور دیکھتا ہوں

24 اپریل 2006ء​

 

غزل

مٹے جب نقش، باقی رہ گئی ہلکی سی پرچھائی
چلو آئی تمہیں آخر ہماری یاد تو آئی

تمہیں یہ زعم تھا دنیا سے کٹ کر رہ سکو گے تم
محل سپنوں کا جب ٹوٹا، نئی دنیا نظر آئی

اگر ظاہر نہ ہوں باتیں دلوں کی، ہے یہی بہتر
کسی کے شوقِ شہرت سے کسی کو خوفِ رسوائی

مجھے ایسا لگا کہ دل کی دھڑکن رکنے والی ہے
پری وش نے گھڑی بھر چہرے سے چادر جو سرکائی

جسے ڈھونڈا ملا وہ سب، مگر عمار اک حسرت
محبت ہے کہ دنیا میں کہیں ہم نے نہیں پائی

21 جون 2006ء​

 

عجیب کچھ بھی نہ تھا

غزل​

عجیب کچھ بھی نہ تھا، پھر بھی کچھ عجیب ہی تھا
وہ مجھ سے دور تھا لیکن مِرے قریب ہی تھا

خبر انوکھی نہیں یہ کہ میں مرا لیکن
انوکھا یہ ہے کہ قاتل مِرا طبیب ہی تھا

مجھے قبول کہ غلطی نہ تھی امیر کی کچھ
کچل دیا جسے گاڑی نے وہ غریب ہی تھا

جسے میں اپنا سمجھتا تھا غم دیا اس نے
سکون جس سے ملا وہ مرا رقیب ہی تھا

نہیں ہے غم کہ اسے پاکے کھودیا عمار!
کہ اس سے مل کے بچھڑنا مِرا نصیب ہی تھا​

27 مارچ 2006ء

 

زبردست اور شاندار !
بہت ہی اچھے اللہ آپ کے زور قلم اور اضافہ فرمائے

 

عمار صاحب آپ اچھی شاعری کرتے ہیں ہماری طرف سے داد قبول کریں

 

غزل

اس کا چہرہ گلاب جیسا ہے
وہ حقیقت میں خواب جیسا ہے

گو کہ مٹی کا ہے بدن لیکن
دیکھنے میں وہ آب جیسا ہے

وہ جو ہے، ویسا دیکھنے میں نہیں
ہاں وہ ایسا، سراب جیسا ہے

اس نے نظروں سے کیا پلایا ہے
رنگ جس کا شراب جیسا ہے

مجھ پہ کیوں برہمی ہے یہ عمار؟
میرا لہجہ جناب جیسا ہے​

[align=left:2xlh1t6b]15 اپریل 2006ء[/align:2xlh1t6b]

 

خوب روتے ہوئے مچل جانا

غزل​

خوب روتے ہوئے مچل جانا
ہم نے سیکھا ہے یوں بہل جانا

مشکلوں سے بہت ملی منزل
ساتھیوں نے اسے سہل جانا

بے وفا! تجھ کو یہ اجازت ہے
اب کے موسم میں تُو بدل جانا

کوئی پروا نہیں، وہ حاسد ہے
اس نے سیکھا ہے صرف جل جانا

جو مجھے چھوڑ کر نہیں لوٹا
اس کو اپنا گزشتہ کل جانا

مجھ کو آتا ہے یہ ہنر عمار
جو ہو ماحول اس میں ڈھل جانا​

[align=left:32hr60mr]17 اپریل 2006ء[/align:32hr60mr]

 

بہت خوب عمار صاحب

 

اظہارِ پسندیدگی کا بہت بہت شکریہ۔

 

ارے عمار بھائی۔۔ بہت خوب۔ چھپے رستم صاحب۔
مقطع پر غور ہو۔۔۔ جناب شاعری میں بھی اپنا شرارتی پن نہیں بھولے

 

بہت عمدہ الفاظ اور ترتیب۔ ماشاء اللہ
بہت خوب عمار بھائی !

 

Re: عجیب کچھ بھی نہ تھا

بہت خوب ! بہت اچھا شعر ہے عمار بھائی !!

 

کچھ نہ بولوں تو ہے یہی بہتر
اس سے زیادہ تو کچھ نہیں بہتر

ہم نے جو کچھ کہا، غلط وہ سب
تم نے ہر بات ہی کہی بہتر

ہم پہ جو گزری، کیا بتائیں ہم؟
ہم نے تنہا وہ سب سہی بہتر

زندگی جو بھی ہے، مناسب ہے
اس سے بڑھ کر بھی کب رہی بہتر

تم نے عمار کو نہیں سمجھا
اس سے یوں دل لگی نہی بہتر

 

عمار بھائی ۔ اچھا کلام ہے۔
کوشش جاری رکھیے انشاءاللہ مزید بہتری آئے گی۔

 

اظہار پسندیدگی کا شکریہ!

 

غزل

خود ہی الزام دھرا، خود ہی سزا دی تم نے
جو تمہاری تھی خطا، کیوں وہ بھلادی تم نے؟

میری غلطی کہ کیا تم پہ بھروسہ میں نے
میری ہر بات زمانے کو بتادی تم نے

بس تمہارا یہی احسان بہت ہے مجھ پر
ایک پل بھر کو مجھے دل میں جگہ دی تم نے

داد دیتا ہوں، کیا تم نے بہت خوب کمال
مجھ سے وابستہ ہر اک یاد بھلادی تم نے

جاتے جاتے بھی پلٹ کر، مجھے ہنس کر دیکھا
اک وفا کی تھی، مگر وہ بھی جتادی تم نے

آج کہہ کر یہ غزل خوب کیا اے عمار!
محفل دل میں بہت دھوم مچادی تم نے

5 جنوری 2006ء

 

عمار صاحب بہت ہی خوب
آپ کی شاعری تو کمال ہے

 

میری غلطی کہ کیا تم پہ بھروسہ میں نے
میری ہر بات زمانے کو بتادی تم نے​

بہت خوب!

 

بہت خوب عمار بھائی ۔ بہت ہی پیاری غزل ہے

 

قافلہ گم صم کھڑا ہے، کھوگئی منزل کہیں
اس سے بڑھ کر بھی بھلا ہوگی کوئی مشکل کہیں؟

آسرے ہیں ٹوٹنے کو، ناؤ ہے طوفان میں
دیکھئے! ہاں دیکھئے! شاید ملے ساحل کہیں!

آج کا ہر کام کل پر ٹال کر بیٹھے رہے
آپ کے جیسا نہ پایا کوئی بھی کاہل کہیں

غلطیاں ماضی کی بھولے، حال پر تکیہ کرے
یوں بھی روشن ہوسکا ہے کوئی مستقبل کہیں؟

پوچھتے ہیں اہلِ محفل حالِ دل، کیا کیجئے؟
حال کوئی کیا کہے؟ جب کھوگیا ہو دل کہیں

جس کے باعث زندگی خوش رنگ تھی، پُرکیف تھی
ڈھونڈتا پھرتا ہوں، شاید پاؤں وہ محفل کہیں

دے کے تجھ کو دھوکا اے عمار! وہ بھی خوش نہیں
اس کی آنکھوں میں چھپی ہے درد کی جھلمل کہیں

 

عمار بھائی بہت پیاری غزل ہے لیکن مقطع تو بہت ہی عمدہ ہے۔ واہ بھئی واہ

 

بہت خوب عمار صاحب