ڈاکٹر فرمان فتح پوری وفات پاگئے

ڈاکٹر فرمان فتح پوری وفات پاگئے


3 اگست 2013 ، اردو کے ممتاز نقاد، محقق، ادیب اور شاعر ڈاکٹر فرمان فتح پوری کراچی میں وفات پاگئے۔ ڈاکٹر فرمان فتح پوری کا اصل نام سید دلدار علی تھا اور وہ 26 جنوری 1926 ء کو اتر پردیش کے شہر فتح پور میں پیدا ہوئے تھے ۔1950 ء میں ٓاگرہ یونیورسٹی سے گریجویشن کرنے کے بعد ڈاکٹر فرمان فتح پوری کراچی ٓگئے جہاں انھوں نے ایم اے، ایل ایل بی، بی ٹی اور پی ایچ ڈی کی اسناد حاصل کیں ۔1974ء میں انھیں ان کے مقالے “اردو شعراءکے تذکرے اور تذکرہ نگاری” پرڈی لٹ کی سندعطا کی گئی ، وہ یہ سند حاصل کرنے والے پہلی پاکستانی شخصیت تھے ۔

وہ تقریبا تیس برس تک جامعہ کراچی سے وابستہ رہے جہاں ان کی زیر نگرانی متعدد اسکالرز نے پی ایچ ڈی کی اسناد حاصل کیں ۔ جامعہ کراچی سے ریٹائرمنٹ کے بعد ڈاکٹر فرمان فتح پوری اردو ڈکشنری بورڈ سے وابستہ ہوگئے ، اس ادارے سے ان کی یہ وابستگی ایک دہائی سے زیادہ جاری رہی۔ ۔ڈاکٹر فرمان فتح پوری ، نیاز فتح پوری سے گہری وابستگی رکھتے تھے اور نیاز صاحب کی وفات کے بعد ان کے مشہور جریدے نگار کو جاری رکھنا فرمان صاحب کا ایک بڑا کارنامہ تھا۔​

ڈاکٹر فرمان فتح پوری کی تصانیف کی تعداد ساٹھ سے زیادہ ہے جن میںاردو رباعی،تدریس اردو،اردو کی منظوم داستانیں:تحقیق و تنقید،نیا اور پرانا ادب،نواب مرزا شوق کی مثنویاں،قمر زمانی بیگم،زبان اور اردو زبان،اردو املا اور رسم الخط،اردو کی نعتیہ شاعری،تاویل و تدبیر،اقبال سب کے لیے،فن تاریخ گوئی،غالب شاعرامروزو فردا،میر انیس حیات اور شاعری،اردو افسانہ اور افسانہ نگاری،ہندی اردو تنازع،عورت اور فنون لطیفہ اور غزلیات غالب شرح اور متن کے نام سر فہرست ہیں۔ حکومت پاکستان نے ڈاکٹر فرمان فتح پوری کو ستارہ امتیاز کا اعزاز عطا کیا تھا۔​