چاندنی رہتی ہے شب بھر زیر پا بالائے سر ۔۔منشی امیر اللہ تسلیم لکھنوی

چاندنی رہتی ہے شب بھر زیر پا بالائے سر
ہائے میں اور ایک چادر زیر پا بالائے سر

خار ہائے دشت غربت داغ سوداے جنوں
کچھ نہ کچھ رکھتا ہوں اکثر زیر پا بالائے سر

بھاگ کر جاؤں کہاں پست و بلند دہر سے
ہیں زمین و چرخ گھر گھر زیر پا بالائے سر

کون ہے بالین تربت آج سر گرم خرام
وجد میں ہے شور محشر زیر پا بالائے سر

بے تکلف کیابسر ہوتی ہے کنج گور میں
خاک بستر خاک چادر زیر پا بالائے سر

اوڑھ کر آب رواں کا گر ڈوپٹا تم چلو
موج زن ہو اک سمند زیر پا بالائے سر

کچھ اڑا کر شوخیوں سے وہ ستارے بزم میں
کہتے ہیں دیکھ لو اختر زیر پا بالائے سر

جادہ و موج ہوا بے تیرے دونوں دشت میں
کر رہے ہیں کار خنجر زیر پا بالائے سر

جز خراش خار یا خاک مذلت قیس کو
اور کیا دیتا مقدر زیر پا بالائے سر

جیتے جی سب شان تھی مر کر بجائے تخت و تاج
خاک رکھتا ہے سکندر زیر پا بالائے سر

سایہ ہوں کیا اوج میرا کیا مری افتادگی
ایک عالم ہے برابر زیر پا بالائے سر

مردے ہیں پامال مشتاق نظارہ ہیں مسیح
دیکھتا چل او ستم گر زیر پا بالائے سر

جسم و جاں دونوں زمین و آسماں کے ہیں مکیں
ایک میں رکھتا ہوں دو گھر زیر پا بالائے سر

ہو نہیں سکتا کبھی خاصان حق کو کچھ حجاب
ایک تھا پیش پیمبر زیر پا بالائے سر

دعوی تشنہ سے اے تسلیم لکھی یہ غزل
ورنہ مہمل ہے سراسرزیر پا بالائے سر​

 

اس غزل کی خاص بات اس کی منفرد زمین ہے
کہتے ہیں کوئی ایک شاہکار خالق کو امر کر دیتا ہے اور یہ غزل شاعر کو امر کرنے کے لئے کافی ہے

 

ارشین بخاری شمس الرحمٰن فاروقی بہت بڑے نقاد ہیں
وہ اس غزل کے بارے میں کہتے ہیں
ذرا دیکھئے، ایک بھی شعر ایسا نہیں جس میں ردیف پوری طرح ثابت نہ ہو۔ ہر شعر میں کوئی تازہ بات ہے۔ گھر کا قافیہ دو بار لکھا اور دونوں بار الگ طرح سے، اور پوری طرح ثابت بھی کر دیا۔ ستم گر کے کڈھب قافیے کے ساتھ حضرت مسیح پیغمبر کو باندھ لانا کمال نہیں اور کیا ہے۔ سمندر بالائے سر بھی بہت خوب ہے۔ بظاہر یہ غزل کسی شاعر تشنہ کی چنوتی پر، یا ان کی دی ہوئی زمین میں کہی گئی تھی۔ تشنہ صاحب کے حالات معلوم کرنے کی ضرورت فی الحال نہیں ہے۔ یہ غزل بعض الفاظ کے تغیر اور بعض شعروں کی کمی کے ساتھ داستان “ہرمز نامہ” میں بھی ملتی ہے۔ داستان گو (شیخ تصدق حسین) نے بھی داستان گوئی کے قاعدے سے انحراف کر کے کہہ ہی دیا:

شاہ طلسم نے اس نازنین سے مخاطب ہو کر کہا، کیا خوب یہ غزل تم نے گائی ہے۔ اس کی زمین سخت ہے، ردیف مشکل ہے۔ زیر پا بالائے سر کا ثبوت مشکل ہے۔ تسلیم، جن کی یہ غزل ہے، انھوں نے بڑی فکر سے یہ غزل کہی ہو گی

 

جزاک اللہ
سلامت رہیں

 

زبردست انتخاب اور معلوماتی مراسلہ
شکریہ شاہ جی

 

حوصلہ افزائی کا شکریہ
شاد و آباد رہیں