وہی جو خالق جہاں کا ہے وہی خدا ہے وہی خدا ہے-

بسم اللہ الرحمن الرحیم
سبحان اللہ وبحمدہ سبحان اللہ العظیم

حمد باری تعالٰی


وہی جو خالق جہاں کا ہے وہی خدا ہے وہی خدا ہے
جو روح جسموں میں ڈالتا ہے وہی خدا ہے وہی خدا ہے

وہ جس کی حکمت کی سرفرازی، وہ جس کی قدرت کی کارسازی
ہر ایک ذرّہ میں رونما ہے وہی خدا ہے وہی خدا ہے

وہ بے حقیقت سا ایک دانہ، جو آب و گِل میں تھا مٹنے والا
جو اُس میں کونپل نکالتا ہے وہی خدا ہے وہی خدا ہے

الگ الگ سب کے رنگ و خصلت، جدا جدا سب کے قدّو قامت
جو سارے چہرے تراشتا ہے وہی خدا ہے وہی خدا ہے

ہے علم میں جس کے ذرّہ ذرّہ، گرفت میں جس کی ہے زمانہ
جو دل کے بھیدوں کو جانتا ہے وہی خدا ہے وہی خدا ہے

وہ جس نے دی مختلف زبانیں، تخیل و عقل کی اُڑانیں
جو کشتیء فن کا ناخدا ہے وہی خدا ہے وہی خدا ہے

کوئی تو ہے جو ہے سب سے اول، کوئی تو ہے جو ہے سب سے آخر
جو ابتدا ہے جو انتہا ہے وہی خدا ہے وہی خدا ہے

مصیبت و درد و رنج و غم میں، حیات کے سارے پیچ و خم میں
تو جس کو راغب، پکارتا ہے وہی خدا ہے وہی خدا ہے

 

جواب: وہی جو خالق جہاں کا ہے وہی خدا ہے وہی خدا ہے-

زینب صاحبہ:اسلام علیکم
آپ کی حمد نظر سے گزری آپ کی عمیق سوچ کا اندازہ ہوا۔ ماشاءاللہ۔
علم و ہنر کا سفر جاری رکھیں کہ یہی انسانیت کی معراج ہے۔
مجھے یہ شعر زیادہ دل کو لگا:

وہ بے حقیقت سا ایک دانہ، جو آب و گِل میں تھا مٹنے والا
جو اُس میں کونپل نکالتا ہے وہی خدا ہے وہی خدا ہے

خوش رہیں

 

جواب: وہی جو خالق جہاں کا ہے وہی خدا ہے وہی خدا ہے-

سبحان اللہ تعالی ۔ بہت خوب حمدیہ کلام ۔ ماشاءاللہ