جسٹس آصف شاہکار ایہہ گل ہْن کِسے توں لْکی ہوئی نہیں اے کہ پنجاب نوں ونڈن والا انگریز تے اوہدے گماشتے سن ایہہ گل چٹے چانن وانگوں اے جے کوئی پنجابی ایس گل نوں نہیں مندا تے فر یاں تے اوہ انھا اے یاں فر اوہ ایہہ متھ چکیا کہ اوہنے ایس گل نوں کِسے قیمت تے نہیں مننا۔ اجیہا پنجابی اوہ اے جو یاں تے مر چکیا اے یاں فر آپنے گل وچ رسہ پا کے پھا ہ لین نوں تیار بیٹھا اے۔ پنجاب نوں ونڈن دی ایس سازش دے تاریخ وچ ننگے ثبوت موجود نے تے ایہہ ثبوت رولا پا رہے نیں : ” انھے پنجابیو سانوں دیکھو تے منو ۔ اسیں سچ ہاں ”۔ ونڈ توں پہلاں پنجابیاں ( جیہدے وچ ہندو، مسلمان، سکھ تے عیسائی سبھ شامل سن ) نے جِس پارٹی نوں سبھ توں ودھ ووٹ دتے ایس پارٹی دا ناں نہ تے کانگرس سی نہ مسلم لیگ تے نہ ای اکالی پارٹی سی سگوں یونینسٹ پارٹی سی۔ چلو ایس پارٹی وچ وڈی گنتی جاگیرداراں، پونجی واداں تے وچکارلے طبقے دے لوکاں دی سی پر ایہہ پارٹی عام پنجابیاں دے ووٹاں نال جتی تے ایہہ ونڈ دے خلاف سی ۔ ونڈ توں پہلاں انگریزاں نہ پنجابیاں توں ونڈ بارے پچھیا تے نہ ای ونڈ دے مْدعے تے کوئی ریفرنڈم ہویا۔ ونڈ دیاں حامی پارٹیاں مسلم لیگ تے کانگرس دی چوہدر وچ اک دو ناں (گاندھی ، جناح تے کْجھ دانے ہور) چھڈ کے باقی ساری دی ساری لیڈر شپ یوپی دی سی ۔ دوناں پارٹیاں وچ اِک وی اجیہا پنجابی نظر نہیں آؤندا جو ایس پوزیشن وچ سی کہ کِسے وی اہم فیصلے وچ کوئی رول ادا کرسکدا( جے کوئی پنجابی کِسے اجیہے پنجابی نوں جاندا اے تے دسے )۔ مسلم لیگ دی لیڈر شپ یوپی وچ بہہ کے پاکستان دا متا پکایا تے لاہور آگئے تے ایتھے آکے اعلان کردتا۔ کِسے بندے پنجابیو توں نہ پچھیا : ‘ ‘ کملیو پنجابیو دسو تْسیں کی چاہندے او؟”۔ ایس سلسلے وچ پاکستان وچ پڑھائی جان والی تاریخ دے اِک بوہت وڈے جھوٹھ دی گل کرنی ضروری اے۔ ایس تاریخ راہیں ایہہ پڑھایا جاندا اے کہ ایس جلسے وچ بوہت وڈی گنتی وچ لوک شامل ہوئے ایہہ ” بوہت وڈی گنتی کِنی سی؟” ۔ ایس سوال دا جواب کوئی نہیں دیندا۔ ایس سوال دا جواب نا دین دی سدھی سدھی وجہ ایہہ ہے کہ ایہہ ”وڈی گنتی” ہے ای نہیں سی ۔ کیوں؟ پہلی گل تے ایہہ سی کہ ونڈ تے پاکستان دی ساری لہر یوپی وچ چلی دوجی وجہ ایہہ سی کہ لاہوری مسلماناں تے مسلم لیگ نوں ووٹ ای نہیں سن دتے اوہ جلسے وچ کِتھے آؤندے ۔ پنجاب وچ کانگرس دا حال وی مسلم لیگ توں کوئی بوہتا چنگا نہیں سی۔ ونڈ توں پہلاں عام پنجابی ہندو تے اوہناں دی پنجابی لیڈر شپ جیویں سرچھوٹو رام وغیرہ ونڈ دے خلاف سن۔ اس گل داکھلا ثبوت ونڈ توں پہلاں ہو ئیاں چوناں دے نتیجے سن۔ ایہہ نتیجے دیکھ کے صاف پتہ لگدا اے کہ کانگرس پنجابیاں دی پارٹی نہیں سی سگوں اِک اوپری پارٹی سی ۔ ہْن پچھے رہ گئی ماسٹر تارا سنگھ دی پارٹی ۔ ونڈ توں پہلاں عام طور تے پنجابیاں تے خاص طور تے سکھاں ایس پارٹی نوں کنے ووٹ دتے ایہناں دی گنتی دیکھ کے ہاسہ آجاندا اے۔ کتھے راجہ رنجیت سنگھ دا پنجاب تے ایس پنجاب وچ رہندے سکھاں دی گنتی تے کتھے اکالی پارٹی وچ سکھاں دی گنتی ۔ کہن دا مطلب ایہہ ہے کہ ایہہ تنوں پارٹیاں جو آپنے آپ نوں پنجابیاں دا موہری ہون دا دعوا کردیاں سن ایہناں وچوں اِک وی پنجابیاں دی موہری یاں نمائندہ نہیں سی ۔ جے ہے سی تاں کوئی مائی دا لعل ایس گل نوں تاریخی ثبوتاں راہیں ثابت کرے ۔ ونڈ وچ ایہناں پارٹیاں دے رو ل نوں دیکھن لئی تاریخ دا پردہ چْکن نال کئی ہور دلچسپ گلاں سامنے آؤندیاں نے۔ ماسٹر تارا سنگھ دی مشہور کرپان جیہنے لاہور وچ پنجاب نوں ٹوٹے کراؤن لئی تاریخی وار کیتا ۔ ایہہ وار ماسٹر جی کیہدی شہ تے کیتا ؟ کی اوہناں ایہہ وار سکھاں دی مرضی نال کیتا؟ ایس گل دی سچائی بارے جے اج کوئی پنجابی یاں سکھ بھولا بنے تے اوہ بھولا نہیں اے سگوں بے ایمان تے جھوٹھا اے ۔ پنجاب دی ونڈ دے سلسلے وچ ماسٹر تارا سنگھ تے اوہدے ساتھیاں جو رول کھیڈیا ایس سلسلے وچ اِک ہور دلچسپ گل سامنے لیاؤن دی لوڑ اے ۔ ایہہ گل اتنی اہم اے کہ سارے اکالی پورا زور لا کے ایس گل نوں لکاؤن دی کوشش کردے نے۔ گل ایہہ ہے کہ پنجاب دی ونڈ توں پہلاں مسلم لیگ تے پاکستان دی لہر چلاؤن والے لیڈر قائد اعظم محمد علی جناح سکھاں نال رابطہ کیتا تے تھالی وچ رکھ کے سانجھا پنجاب پیش کیتا تے کیہا : ” تسیں پنجاب نوں نا ونڈو جو وی تہاڈیاں منگاں نے ساریاں دیاں ساریاں لکھ کے میرے کول لے آؤ میں بناں کِسے شرط یاں اعتراض دے تہاڈیاں ساریاں منگاں من لواں گا تے جیویں تہاڈی تسلی ہوندی اے کر لؤ میں تہاڈے نال معاہدے تے دستخط کر دیاں گا ” ۔ اکالیاں اوہدی ایس دعوت نوں ٹھڈا ماریا تے اوہنوں مانج کْچ کے جواب دے دتا تے پنجابڑی لے کے بہہ گئے۔ کتھے راجہ رنجیت سنگھ ویلے ہندوستان ای نہیں سگوں ایشیا دی اِک وڈی طاقت تے کتھے یوپی والیاں (نہرو تے پٹیل اینڈ کمپنی ) دے کمی بن گئے ۔ نا صرف کمی بنے سگوں ادھے ہو گئے۔ ننکانہ صاحب تے لاہور بناں نا سکھ دھارمک طور تے پْورا اے تے نہ لاہور بناں اتہاسک طور تے پْورا اے ۔ جے مسلماناں نوں کیہا جاوے کہ تسیں مکہ تے مدینہ چھڈ کے چلے جاؤ تے اوہ مر جان گے پر مکہ مدینہ نہیں چھڈن گے ۔ سکھ مکہ ، مدینہ وی چھڈ گئے تے تخت لاہور وی ۔ سکھ آپنیاں دو وڈیاں ہستیاں گرو نانک تے راجہ رنجیت نوں چھڈ کے تر گئے۔ ایہہ گل کہنا شیت سارے سکھاں نال نا انصافی تے انھائے ہووے گا کیوں جے اوس ویلے (حال گھڑی دے پچھمی پنجاب) وچ رہندے نہ تے سارے سکھ اکالی سن تے نہ ای اوہناں کولوں پچھیا گیا کْجھ بندیاں دے فیصلے دی سزا اوہناں نوں بھگتنی پئی۔ ایس گل نوں انج وی کیہا جاسدا اے کہ پوربی پنجاب توں جو کروڑاں مسلمان اْجڑ کے پچھمی پنجاب آئے نا تے اوہ مسلم لیگی سن تے نا ای اوہناں کولوں صلاح لئی گئی۔ اوہ مسلمان جو پْوربی پنجاب توں اْجڑ کے پاکستان آئے جے اوہناں وچوں پاکستان دے حامیاں تے مسلم لیگ دے چیلیاں نوں لبھیا جاندا تے اوہناں دی گنتی آرام نال اْنگلیاں تے گنی جا سکدی سی ۔ ایس گل دا اِک ثبوت ایہہ وی ہے کہ جو سکھ پچھمی پنجاب توں اْجڑ کے گیا اوہ مردے دم تک پچھمی پنجاب نوں یاد کردا رہیا تے ایس اوڈیک وچ رہیا کہ کدوں اوہنے مڑ کے واپس آپنے گھر جانا اے تے ایہو حال پْوربی پنجاب توں اْجڑ کے آئے مسلماناں دے سی۔ ماسٹر تارا سنگھ دے کرپان کڈھن مگروں پنجاب وچ ہندوآں مسلماناں تے سکھاں دے فساد شروع ہو گئے ایہہ فساد کراؤن والے کون سن؟ ایس لئی پنجابی دا اِک اکھان اے : ” چوراں نوں کہو ڈھکو تے سادھاں نوں کہو آئے جے ”۔ ایہہ انگریز تے اوہناں دے گماشتے سن ۔ ایہناں ای ماسٹر تارا سنگھ کولوں تلوار کڈھوائی تے ایہناں ای فساد کروانے شروع کروا دتے۔ کیوں؟ ایہہ گل میں ثابت کراں گا ۔ پہلی گل تے ایہہ ہے کہ جے دو بندے تہاڈے بوہے اگے لڑن لگن تاں تے تسیں باہر آکے اوہناں نوں دبکا مارو تے اوہ بالکل نہیں لڑن گے پر جے تسیں کن ولیٹ کے اندر ای بیٹھے رہو تے باہر آکے اوہناں نوں روکو ای نہیں تے ایہہ بندے لڑ کے مر جان تے ایہناں دےمرن دے تْسیں ذمہ دار ہو ۔ ایہو حال انگریزاں تے اوہناں دیاں گماشتیاں دا سی۔ ہر تھاں جتھے فساد ہوئے اوتھوں کھڑے ہو کے جے تسیں وٹا سْٹو تے ایہہ کِسے چھاؤنی یاں تھانے جاکے ڈگنا سی پر ایہناں چھاؤنیاں تے تھانیاں وچوں اِک بندہ وی اْٹھ کے فساد بند کراؤن نا آیا ۔ کیوں ؟ اوہدی پنجابی دْشمنی ۔ انگریز تے اوہدے گماشتیاں دی لوائی ہوئی ایہہ اگ جد پھیلدی پھیلدی بھا نبڑ بن گئی تے انگریز آرام نال بہہ کے تماشہ دیکھدا رہیا ۔ ایہناں تماش بیناں وچ کانگرس تے مسلم لیگ دی یوپی دی لیڈر شپ وی شامل سی ۔ ایہناں تماش بیناں لئی پہلی گل تے ایہہ سی کہ پنجابی انسان ای نہیں سی اوہناں بھانے چاہے اک پنجابی مر گیا چاہے اک کْتا مرگیا دوجی گل ایہہ سی کہ ایہہ پنجابی نوں سزا دینا چاہندے سن کہ اوہنے ونڈ دے حق وچ ووٹ نہیں سن دتے ایس نقطے تے انگریز یوپی دی مسلم لیگی تے کانگرسی لیڈر شپ دا ایجنڈا سانجھا سی ایہہ اوہ ای لوک سن جنہاں راجہ رنجیت سنگھ دے پنجاب تے انگریزاں دا قبضہ کرائون وچ مدد کیتی تے اوہدے مگروں پنجابیاں دا بی مکائون لئی ایتھے اردو لاگو کروائی ۔ ایہناں دی سانجھی پنجابی دْشمنی دا اک ثبوت ایہہ وی اے کہ پْوری انسانی تاریخ وچ جد کدے وی بوہت وڈی گنتی وچ انسان مارے گئے تے ساری دْنیا ایس تے رولا پایا تے ایس دی وجہ لبھن دی کوشش کیتی۔ ایہہ کل دی گل اے راونڈا وچ ہوٹو لوکاں ٹٹسی لوکاں دا قتل عام کیتا دْنیا وچ رولا پے گیا ایس قتل عام دی وجہ لبھن لئی منگاں ہوئیاں تے فر ایس دی وجہ لبھن لئی کھوج ہوئی تے مجرماں دے چہرے ننگے ہو گئے ۔ ۔۔۔۔۔۔۔۔۔۔۔۔۔۔۔۔۔۔۔۔۔۔ جاری اے http://www.sanjhapunjab.net/[/SIZE]
جواب: واہگہ پنجاب دی ونڈ صرف ہندوستان ای نہیں سگوں پْوری انسانی تاریخ دا اک بوہت وڈا دْکھانت اے دس لکھ پنجابی قتل ہویا شیت ایس توں وی ودھ پنجابی دھیاں بھیناں دی عزت لْٹی گئی دس کروڑ پنجابی گھروں بے گھر ہویا جو پْوری انسانی تایخ دا سبھ توں وڈا اْجاڑا سی ۔ اج پنجاب دی ونڈ نوں سال 63 ہو گئے نے اج تک نا پاکستان دی کسے حکومت نا ہندوستان دی حکومت تے نا ای اکالیاں ایس گل دی منگ کیتی اے کہ تاریخ دے ایڈے وڈے دوکھانت دی چھان بین کرائی جاوے ۔ کیوں؟ ایس سوال دا سدھا سدھا جواب ایہہ ہے کہ ایس چھان بین راہیں جے انگریز ننگا ہووے گا تے نال ای اوہدے گماشتے وی ننگے ہو جان گے جو پچھلے 63 سالاں توں حکومت دیاں کرسیاں تے بیٹھے نے تے ایہناں وچ وڈی گنتی یوپی والیاں دی اے ۔ ایس چھان بین راہیں اکالی وی چْٹھے ڈْھکے نہیں نکلن گے سگوں اوہناں دے وی آگواں تے ودواناں دے چہرے ننگے ہون گے جو پنجاب دْشمن طاقتاں دیاں انگلیاں تے نچے ۔ ایہناں ایہہ فساد کیوں کرائے ایس بارے میرا اِک دعوا اے۔ اصل وچ ایہہ فساد کراؤن دا مقصد پنجاب د ی پکی ونڈ سی۔ جے ایہہ فساد نا ہوندے تے ہندو، سکھ تے مسلمان آپنے آپنے گھراں وچ بیٹھے رہندے تے بھانویں پاکستان تے ہندوستان بن وی جاندے پر فر وی پنجاب ونڈیا نہیں سی جاسکدا ۔ جے ایہہ ونڈیا وی جاندا تے ایہہ ونڈ عارضی ہونی سی پنجابیاں واہگے والی واڑ چْک کے پرانہہ مارنی سی ۔ ایس گل دے ننگے ثبوت ملدے نیں کہ پچھمی پنجاب توں اْجڑ پجر کے جاندے ہندواں سکھا دیاں گڈیاں مسلمان فوجیاں وڈھیاں ۔ ایہہ فوجی کون سن؟ انگریز دی فوج دے ملازم ۔ مینوں آپنے ایس دعوے دا ثبوت پلس دے اک وڈے افسر توں وی ملیا ۔میں اوہناں دناں وچ لاہور ٹی وی تے پروڈیوسر ساں ۔ اتفاق نال ایتھے میری پلس دے اک اجیہے سابقہ افسر نال ملاقات ہوئی جو ونڈ ویلے پلس دا بوہت وڈا افسر سی ۔ میں اوہنوں ایہہ سوال کیتا: ” ونڈ ویلے ہوئی لْٹ مارتے وڈھ ٹْک نوں تسیں کیوں نہیں سی روکیا؟ ”۔ سانوں اْتوں ایسا کوئی آڈر ای نہیں سی آیا نال اسیں کوئی انھے ساں سانوں دسدا نہیں سی پیاکہ اوس ویلے دی حکومت تے آپ ایہناں فساداں وچ شامل سی ۔ گڈیاں وڈھدے فوجی کِسے توں لْکے ہوئے سن ۔ جےلبھن نکلو تے ایہو جیہے پلس دے کئی ہندو تے سکھ افسر پوربی پنجاب وچوں وی لبھ جان گے جو ایس گل دی تصدیق کرن گے ۔ انگریز دے جان مگروں اوہدے ایجنڈے نوں چالو رکھن والے پاکستانی تے ہندوستانی گماشتیاں دی پنجاب دی ونڈ نوں مستقل تے پکا بناؤن دے منصوبے دےسلسلے وچ اک دلچسپ گل اے۔ ایہہ پْوری دْنیا دا منیا پرمنیا اصول اے نال ایس مقصد لئی اک انٹرنیشنل قانون وی موجود اے۔ ساری دْنیا وچ ایس اصول تے قانون تے عمل وی ہوندا آیا اے تے اج وی ہو رہیا اے پئی حالات نارمل ہون مگروں ہر پناہ گیر نوں آپنے گھر واپس پرتن دا حق اے ۔ جے اک پاسے پناہ دین والا دیس ایہناں پناہ گیراں نوں واپس گھر جان دے سلسلے وچ مدد کردا اے تاں دوجے پاسےایس پناہ گیر دا دیس وی اوہنوں جی آئیاں کیہندا اے۔ دور جان دی لوڑ نہیں اے ایہہ کل دی گل اے افغانستاں توں لکھاں دے حساب نال لوک اْٹھ کے پاکستان آئے تے اوہناں آکے پناہ لئی ۔ جد افغانستان وچ حالات کْجھ ٹھیک ہو گئے تے فرپاکستان تے افغانستاں وچکار ایس مسئلے تے گل بات ہوئی تے اوہ ایس گل تے راضی ہوئے پئی افغانستان توں اْٹھ کے آئے مہاجر افغانستان واپس جان تے لکھاں دے حساب نال ایہہ مہاجر واپس تر وی گئے نے تے حالے تیک واپس جاندے پئے نے پر پنجابی مہاجراں دے واپس آپنے گھراں نوں واپس آؤن دے مسئلے تے نہ تے اج تک کوئی گل بات ہوئی تے نا ای اوہناں نوں ایس گل دی اجازت اے کہ اوہ آپنے گھراں نوں پرت سکن۔ کیوں ؟ ایس طراں پنجاب دی ونڈ نوں خطرہ پیدا ہوندا اے۔ یوپی جتھے مسلماناں دی وڈی گنتی سی تے جو پاکستان بناؤن دی لہر دا گڑھ سی۔ نا تے اوتھے فساد ہوئے تے نا ای اوتھوں دا بندہ پنجابیاں طراں لْٹ پْٹ کے پاکستان آیا ایہہ جھگیاں چوں اْٹھ کے جہازاں وچ بہہ کے پاکستان آئے تے اوہناں دا لال قالیناں تے سواگت ہویا ایہناں وچوں اک بندہ کسے پناہ گیر کیمپ وچ نہیں رلیا ایہہ سدھے آکے ہندواں سکھاں دیاں چھڈیاں کوٹھیاں تے بلڈنگاں دے مالک بن گئے ۔ ایہناں دے سلسلے وچ اِک دلچسپ گل اے ۔ پاکستان بنن مگروں ہر پنجابی نوں کلیم لئی ثبوت دے طور تے پچھے چھڈ ی جائیداد دے کاغذ داخل کرانے پیندے سن ۔ یوپی چوں آئے ایہناں ” مہاجراں” دے سلسلے وچ پاکستان دے اوسے ویلے دے وزیر اعظم لیاقت علی خان (جو اردو بولن والا اک نواب سی) دا خاص حْکم سی کہ یوپی تے بہار توں آئے ایہناں مہاجراں توں کلیم لئی خبردار جے کوئی کاغذ پْچھے ۔ ایہہ جو کہن من لوو۔ اِتنیاں موجاں دے باوجود یوپی چوں کنے کروڑ مسلمان مہاجر اْٹھ کے پاکستان آیا ؟ پنجابیاں دے مقابلے وچ ایہناں دی گنتی آٹے وچ لون برابر اے۔ مسلمان پنجابیاں نال کیڈا وڈا مذاق اے جنہاں (یوپی والیاں) پاکستان دی منگ کیتی اوہ ونڈ مگروں یوپی ای بیٹھے رہے تے جنہاں (پنجابیاں ) ایہہ منگ نہیں سی کیتی اوہناں نوں مار کْٹ کے پاکستان وچ زبردستی واڑ دتا گیا ۔ ہندوستان دے ہور حصے وی ونڈے گئے جیویں بنگال، سندھ، راجستان، گجرات پر ایتھے فساد نہیں ہوئے ایہناں صوبیاں وچ وی تے مسلمان تے ہندو بیٹھے سن صرف پنجاب وچ کی ہنیر آگیا سی جےصدیاں توں اکٹھے بیٹھے ہندو مسلمان تے سکھ اک دوجے دے جانی دْشمن ہو گئے ۔ ایہہ فسادکیوں ہوئے تے فر ایہناں نوں روکیا کیوں نہیں گیا۔ مینوں ایس سلسلے وچ جسٹس اجیت سنگھ بینس جی دی گل یاد آئوندی اے ۔ اوہناں اک وار کیہا سی کہ آزادی مگروں یوپی والے (ہندو تے مسلمان) پورے ہندوستان دی چوہدر چاہندے سن تے اوہناں نوں دو صوبیاں توں ڈر لگدا سی پہلا پنجاب تے دوجا بنگال سی ایہناں دوناں صوبیاں وچ اک تے مسلمان وڈی گنتی وچ سن دوجاں ایہہ دونوں صوبے ہر لحاظ نال یوپی توں تگڑے سن جے ایہناں دوناں صوبیاں دے لوک دھرم نوں پاسے رکھ کے قوم پرستی دے جھنڈے تھلے اکٹھے ہو گئے تے پورے ہندوستان دی لیڈر شپ ایہناں کول آجاوے گی تے ایہہ گل یوپی نوں کسے طراں نہیں سی پجدی۔ ونڈ ہو گئی واہگے تے واڑ لا دتی گئی ایہہ واڑ صرف لوہے دی بنی ہوئی کنڈیالی واڑ نہیں اے سگوں لکھاں پنجابیاں دے خون تے لکھاں پنجابی دھیاں بھیناں دی لْٹی ہوئی عزت نال اْساری نفرت دی کندھ سی۔ گل ایتھے ای نہیں مْک گئی نفرت دی کندھ نوں ہور پکا تے اْچا کرن لئی پنجاب وچ جنگاں کرائیاں گئیاں۔ لاہور توں توپاں چلیاں تے امرتسر وچ ایہدے گولیاں پنجابیاں دے سریر پھیتی پھیتی کر کے کھلاردتے ہسدے وسدے گھر ڈیہہ کے ڈھیری ہو گئے پنجاب دی دھرتی دی ہک وچ پھٹ لگے امرتسر توں جہاذ اْڈے تے لاہور تے بمب سْٹ کے مڑ آئے پچھے موت ، پھٹ ، چیکاں تے اگ کھلار آئے ایہناں جہازاں دے پائیلٹ اوس دھرتی نوں فخر نال اْجاڑ کے آگئے کل جس دھرتی تے ایہہ آپ جمے سن یاں ایہناں دے پیو دادے جمے۔ بندوق پھڑ کے پنجابی فر پنجابی سامنے آگیا۔ اک پاسے دا پنجابی دوجے پاسے دے پنجابیاں نوں رج کے مارن دے کارنامے دے بدلے وچ ہیرو بن گیا اوہدے تے سرکاراں تمغیاں دی بارش کر دتی ۔ لاہور دا ریڈیو پْھنڈ کے خبراں دے رہیا سی کہ دْشمن دے ایہنے فوجی مارے گئے دْوجے پاسیوں آکاش وانی جالندھر توں کوئی خوشی نال نچ کے کہہ رہیا اے کہ ساڈی فوج دْشمن دے ایہنے فوجی ماردتے ۔ دْشمن دی وردی پاکے مرن والا فوجی کون سی ؟ کی ایہہ انسان نہیں سی؟ کی ایہہ پنجابی نہیں سی؟ دوناں پاسیاں دا پنجابی اگ تے موت دی ایس کھیڈ نوں دیکھ کے تاڑیاں ماررہیا سی تے پنجاب دی دھرتی پنجابی دے لہو وچ رنگی جارہی سی کْجھ ای سال لنگھے تے نفرت دی ایس کندھ نوں فر پکا تے اْچا کرن دا ویلا آگیا فر جنگ ہوگئی ۔ اگ تے موت دا ناٹک فر چالو ہوگیا پنجاب دی دھرتی نوں اک وار فر پھٹاں نال چور چور کردتا گیا۔ ڈھاکے وچ اک پنجابی کولوں دْوجے پنجابی سامنے ہتھیارسٹوا کے اک پنجابی دْوجے پنجابی نوں رج کے ذلیل کیتا۔ نفرت دی ایہہ کندھ ہور پکی تے اْچی ہو گئی۔ ایہہ جنگ حالے وی کیہڑی مْک گئی اے جے کدھرے کشمیر وچ کوئی پٹاکا چلدا اے تے جنگ دے بدل پنجاب تے آکے گجن لگ پیندے نے بمبے وچ چار کھاڑکو گولیاں چلاندے نے تے پنجاب وچ توپاں گجن لئی تیار ہو جاندیاں نے ۔ ہور تےہور دوویں دیس آپنے آپنے ایٹم بمباں نال پنجاب تے شست لا کے بیٹھے نے۔ ہْن جے دوناں پاسیاں دا پنجابی ایہناں گلاں نوں جاندیاں بجھدیاں وی انھا بولا تے گنگا بن کے بیٹھا اے تاں فر یاں تے اوہ مر چکیا اے یاں فر اوہنے ہولی ہولی خود کْشی(آتم ہتیا) کرن دا فیصلہ کر لیا ہویا اے ۔ http://www.sanjhapunjab.net/
