واللہ کیا زباں ہے اردو زباں ہماری

واللہ کیا زباں ہے اردو زباں ہماری

فطرت کی ترجماں ہے اردو زباں ہماری

آبا کی داستاں ہے اردو زباں ہماری

مظلوم کی فغاں ہے اردو زباں ہماری

ہندو بھی بولتے ہیں مسلم بھی بولتے ہیں

دو جسم ایک جاں ہے اردو زباں ہماری

تعمیر کی ہے اس کی خود کو مٹا مٹا کر

اسلاف کا نشاں ہے اردو زباں ہماری

میٹھا اک ایک جملہ پر کیف ہر مقالہ

الحق شکر فشاں ہے اردو زباں ہماری

الفاظ چاند تارے بن کر چمک رہے ہیں

رفعت میں آسماں ہے اردو زباں ہماری

غالبؔ نسیمؔ کیفیؔ چکبستؔ ذوقؔ سرشارؔ

ہر شخص کی زباں ہے اردو زباں ہماری

اک اک کتاب اس کی پھولا پھلا چمن ہے

گلزار بے خزاں ہے اردو زباں ہماری

منشی پریمؔ اس پر ہوتے نہ کیوں تصدق

مانی ہوئی زباں ہے اردو زباں ہماری

ہر آدمی کے دل میں گھر کر رہی ہے شاطرؔ

محبوب مہرباں ہے اردو زباں ہماری

شاطرحکیمی

 

اردو ہے مرا نام میں خسروؔ کی پہیلی

میں میرؔ کی ہم راز ہوں غالبؔ کی سہیلی

دکن کے ولیؔ نے مجھے گودی میں کھلایا

سوداؔ کے قصیدوں نے مرا حسن بڑھایا

ہے میرؔ کی عظمت کہ مجھے چلنا سکھایا

میں داغ کے آنگن میں کھلی بن کے چنبیلی

اردو ہے مرا نام میں خسروؔ کی پہیلی

غالبؔ نے بلندی کا سفر مجھ کو سکھایا

حالیؔ نے مروت کا سبق یاد دلایا

اقبالؔ نے آئینۂ حق مجھ کو دکھایا

مومنؔ نے سجائی مرے خوابوں کی حویلی

اردو ہے مرا نام میں خسروؔ کی پہیلی

ہے ذوقؔ کی عظمت کہ دیے مجھ کو سہارے

چکبستؔ کی الفت نے مرے خواب سنوارے

فانیؔ نے سجائے مری پلکوں پہ ستارے

اکبرؔ نے رچائی مری بے رنگ ہتھیلی

اردو ہے مرا نام میں خسروؔ کی پہیلی

کیوں مجھ کو بناتے ہو تعصب کا نشانہ

میں نے تو کبھی خود کو مسلماں نہیں مانا

دیکھا تھا کبھی میں نے بھی خوشیوں کا زمانہ

اپنے ہی وطن میں ہوں مگر آج اکیلی

اردو ہے مرا نام میں خسروؔ کی پہیلی


اقبال اشہر

 

تری صورت مجھے بتاتی ہے
یاد میری تجھے بھی آتی ہے
اس کے اک بار دیکھنے کی ادا
دل میں سو حسرتیں جگاتی ہے
میرے دل میں وہ آئے ہیں ایسے
جیسے آنگن میں دھوپ آتی ہے
خواب میں جب بھی دیکھتا ہوں اسے
نیند آنکھوں سے روٹھ جاتی ہے
اپنی مرضی سے ہم نہیں چلتے
کوئی طاقت ہمیں چلاتی ہے
ہم ہیں تہذیب کے علمبردار
ہم کو اردو زبان آتی ہے
میں تو ساحل ہوں موج دریا کی
مجھ کو خود ہی گلے لگاتی ہے

محمد علی ساحل

 

چرچا ہر ایک آن ہے اردو زبان کا

گرویدہ کل جہان ہے اردو زبان کا

اس لشکری زبان کی عظمت نہ پوچھیے

عظمت تو خود نشان ہے اردو زبان کا

گمنامیوں کی دھوپ میں جلتا نہیں کبھی

جس سر پہ سائبان ہے اردو زبان کا

مشرق کا گلستاں ہو کہ مغرب کا آشیاں

ویران کب مکان ہے اردو زبان کا

سوداؔ و میرؔ و غالبؔ و اقبالؔ دیکھ لو

ہر ایک پاسبان ہے اردو زبان کا

اردو زبان میں ہے گھلی شہد کی مٹھاس

لہجہ بھی مہربان ہے اردو زبان کا

ترویج دے رہا ہے جو اردو زبان کو

بے شک وہ باغبان ہے اردو زبان کا

مہمان کہہ رہا ہے بڑا خوش نصیب ہے

جو شخص میزبان ہے اردو زبان کا

لوگو کہیں بھی اس میں پس و پیش کچھ نہیں

اک معترف جہان ہے اردو زبان کا

بولی ہے رابطے کی یہی جوڑتی ہے دل

ہر دل میں ایسا مان ہے اردو زبان کا

وسعت پذیر دامن اردو ہے آج بھی

ہر گوشہ اک جہان ہے اردو زبان کا

کرتا ہے آبیاری لہو سے ادیب جو

وہ دل ہے جسم و جان ہے اردو زبان کا

آئیں رکاوٹیں جو ترقی میں اس کی کچھ

سمجھو یہ امتحان ہے اردو زبان کا

پائے گا جلد منزل مقصود بالیقیں

جاری جو کاروان ہے اردو زبان کا

عزت سخنوران ادب کی اسی ہے

شاعرؔ بھی ترجمان ہے اردو زبان کا


شاعر علی شاعر​