نکل گیا میرے دل کا غبار (اوشو کے نام)

نکل گیا میرے دل کا غبار ، ہا ہا ہا
ہنسا ہوں رو کے میں زارو قطار ، ہا ہا ہا

ہر اک طرف سے مجھے گھورتی محبت سن!
نکال لوں گا میں راہ فرار ، ہا ہا ہا

علاج ہجر کا دیوانگی سے ممکن ہے
ان آنسوؤں پہ فقط ایک بار ، ہا ہا ہا

ذرا سی بات پہ یوں دل بُرا نہیں کرتے
میں ٹھیک ٹھاک ہوں چل چھوڑ یار ، ہا ہا ہا

پہنچ گیا ہوں بالآخر میں پانچویں جانب
خبر ملی تھی کہ سمتیں ہیں چار ، ہا ہا ہا

نہ جذب و کیف پہ ہے مجھ کو دسترس ، یا ہُو!
نہ قہقہوں پہ مرا اختیار ، ہا ہا ہا

مجھے قبول ہے جو بھی کہے ، کہے دنیا!
ذلیل ، مسخرا ، جاہل ، گنوار ، ہا ہا ہا

میں جب سے ذات کے عشرت کدے میں آیا ہوں
نہار و لیل ہیں ، لیل و نہار ، ہا ہا ہا

شاّعر: افضل خان
​