نُطق، بر دوشِ صبا جب ترے در تک پہنچا ۔۔مقصود علی شاہ

نُطق، بر دوشِ صبا جب ترے در تک پہنچا
میرا ہر حرفِ دُعا بابِ اثر تک پہنچا

ویسے تو صیغۂ متروک ہی تھا حرفِ طلب
معتبر ہو گیا جب تیری نظر تک پہنچا

قافلے والے سُبک رو تھے، مجھے چھوڑ گئے
مَیں اکیلا ہی تری راہگُزر تک پہنچا

خامشی قریۂ انعام میں تھی مُہر بہ لب
ایک اظہار مگر دیدۂ تر تک پہنچا

نقشِ نعلین نے دی دید کے ما بعد نمود
حرفِ تمثیل فقط شمس و قمر تک پہنچا

آنکھ کے کھُلتے ہی وہ سامنے تھا شہرِ کرم
عرض کا سارا سفر، اذنِ سفر تک پہنچا

شامِ تسکین میں ڈھل آیا زمانوں کا فراق
طائرِ شوق کہ جب تیرے شجر تک پہنچا

آپ نے خود ہی بُلاوے کا رکھا اذن مدام
حوصلہ اپنا تو بس بارِ دگر تک پہنچا

شہرِ آسودہ میں آ لپٹی کرم کی خوشبو
اِک مسافر رہِ بے سمت سے گھر تک پہنچا

مطمئن ہیں کہ مدینے میں ہیں آئے عاصی
نامۂ زیست شفاعت کے نگر تک پہنچا

بعد میں آیا وہ مقصود تسلی بن کر
دُکھ مرا پہلے تو آقا کی خبر تک پہنچا
----
Maqsood Ali Shah
مقصود علی شاہ



​

 

خامشی قریۂ انعام میں تھی مُہر بہ لب
ایک اظہار مگر دیدۂ تر تک پہنچا
​

 

آپ نے خود ہی بُلاوے کا رکھا اذن مدام
حوصلہ اپنا تو بس بارِ دگر تک پہنچا
​

 

مطمئن ہیں کہ مدینے میں ہیں آئے عاصی
نامۂ زیست شفاعت کے نگر تک پہنچا
​

 

بعد میں آیا وہ مقصود تسلی بن کر
دُکھ مرا پہلے تو آقا کی خبر تک پہنچا
​

 

سبحان اللہ - جزاک اللہ

 

اللہ تعالٰی آپ کو بھی جزائے خیر عطا کرے آمین

​