نعتِ سرورِ کونین صلی اللہ عیلہ و آلہ وسلم

نعتِ رسول صلی اللہ علیہ وسلم

نہ ہے زمین سے نسبت ، نہ آسماں سے مجھے
لگاؤ ہے تو فقط تیرے آستاں سے مجھے

تِرا کرم ہے ، کہانی کے بیچ ہوں ، ورنہ
نکالنے کو تھے یہ لوگ داستاں سے مجھے

کھلے ہُوءے ہیں مرے دل میں گُل مودّت کے
نہیں ہے خوف کوئی موسمِ خزاں سے مجھے

میں مُشتِ خاک تھا ، لیکن تری عنایت نے
اُٹھا زمیں سے ، ملایا ہے آسماں سے مجھے

درود بھیجا نبی کی جو ذات پر اشرف
سلام آئے نہ جانے کہاں کہاں سے مجھے

اشرف نقوی

السلام علیکم احبابِ!
اپنی ایک تازہ نعت پیش کر رہا ہوں۔ آپ کو کیسی لگی؟ اپنی آراء سے نوازیے گا۔ آپ کا بہت بہت شکریہ۔
آپ سب کا اپنا

اشرف نقوی

 

​

سبحان اللہ ۔ نقوی صاحب ۔ بہت خوبصورت نعت شریف ہے۔
خصوصاً یہ شعر مجھے بہت اچھا لگا اور ایک شعر یاد بھی آگیا

یہ تیری نظر کا کمال ہے مجھے پوچھتے ہیں بڑے بڑے
میں تو سنگِ‌راہِ نیاز تھا، تو نے اک نگینہ بنا دیا​

 

جزاک اللہ۔۔بہت خوبصورت

 

سبحان اللہ، بہت خوبصورت نعت لکھی ہے آپ نے۔ جزاک اللہ خیر۔