نظر میں لے کے زیارت کی آرزو اب تک ۔۔ نوؔر محمد ابن بشیر

نظر میں لے کے زیارت کی آرزو اب تک
بھٹک رہا ہوں مدینے میں کو بہ کو اب تک

سنہری جالی کے پیچھے جو جلوہ فرما ہیں
کھڑا ہوں اُن کی زیارت کو باوضوء اب تک

خدا نے میرے نبی کو وہ رفعتیں بخشیں
ازل کی صبح سے ہے اُن کی گفتگو اب تک

کسی نظر نے نہیں دیکھا ہے حسیں تجھ سا
جنا نہ تجھ سا کسی ماں نے خوبرو اب تک

چلن پہ تیرے فدا ہیں ترے حلیف سبھی
ترے ہی گن میں مگن ہیں ترے عدو اب تک

جنھوں نے خود کو کیا ہے سُپرد آقا ﷺ کے
وہی ہوئے ہیں زمانے میں سرخرو اب تک

حبیب رب کی دعاؤں کے صدقہ ہی اے نورؔ
بچی ہوئی ہے غلاموں کی آبرو اب تک
-------
نوؔر محمد ابن بشیر
کوسہ، ممبرا، تھانہ، الہند ٢٢ ذی الحجہ ١٤٣٦ھ ٧ اکتوبر ٢٠١٥ء

​

 

اللہ تعالیٰ آپ کو بھی جزائے خیر عطا کرے آمین