نبی ﷺ کی ذات ہے کیا مظہرِ صلاح و فلاح - مولانا کفایت علی کافی مراد آبادی (شہید)

نبی ﷺ کی ذات ہے کیا مظہرِ صلاح و فلاح
محیطِ فیضِ اَتم ، مصدرِ صلاح و فلاح

گدا ہوا جو کوئی بابِ مصطفائی کا
ہے اس کے زیرِ نگیں کشورِ صلاح وفلاح

قبولِ حسنِ عمل کےلئے درود شریف
عجیب طرح کا ہے زیورِ صلاح و فلاح

بیانِ نعتِ شریفِ جنابِ شاہِ اممﷺ
زباں کی تیغ کا ہے جوہرِ صلاح وفلاح

بہارِ نعتِ مبارک کا مَیں ہوا غواص
یہی ہے میرے لئے دفترِ صلاح و فلاح

لکھا ہے میں نے یہ دیوان بمدحِ ختمِ رسل ﷺ
لگا ہے ہاتھ عجب گوہرِ صلاح و فلاح

کیا خدا نے جو کافی کو مدح خوانِ نبی ﷺ
عطا کیا بخدا افسرِ صلاح وفلاح
----
(مولانا کفایت علی کافی)
​

 

اللہ تعالیٰ آپ کو بھی جزائے خیر عطا کرے آمین