ناگزیر

آج جب ہم اسلامی دنیا پر نظر ڈالتے ہیں تو ہمیں ہر طرف مسلمان مسائل میں گھرے ہوئے نظر آتے ہیں اور ہر سمت فتنے سر اٹھائے مسلمانوں کو برباد کرتے نظر آتے ہیں۔کہیں صیہونی طاقتیں ظاہری طور پر مسلمانوں کا قتل عام کر رہی ہیں اور کہیں خفیہ طور پر۔ہر طرف مسلمانوں پر ظلم و بربریت کی پہاڑ گرائے جا رہے ہیں اور ہم ایک دوسرے کی مدد کے بجائے ظالموں کا ساتھ دے رہے ہیں یا خاموشی اختیار کیے ہوئے ہیں۔

اس خاموشی کو مذید پختہ کرنے کے لیےہمیں قند میں لپٹی کڑوی تاویلیں دی جا رہی ہیں اور اس ظلم و بربریت سے بھی زیادہ افسوس کا مقام یہ ہے کہ ہم ان تاویلوں کو قبول کر کے اور بھی گہرے خواب میں ڈوب رہے ہیں۔ہمیں احادیث مبارکہ کے ذریعے سوئے رہنے کی ترغیب دی جا رہی ہے اور ہم اصل کو بھول کر ان احادیث کو اس تناظر میں لے رہے ہیں کہ اس دور میں ہمارا بہترین لائحہ عمل خاموشی اور تن بہ تقدیر رہنا ہے۔حضرت علامہ اقبال نے فرمایا ہے:

اسی قرآں میں ہے اب ترک جہاں کی تعلیم
جس نے مومن کو بنایا مہ و پرویں کا امیر
’تن بہ تقدیر‘ ہے آج ان کے عمل کا انداز
تھی نہاں جن کے ارادوں میں خدا کی تقدیر
تھا جو ’ناخوب، بتدریج وہی ’خوب‘ ہوا
کہ غلامی میں بدل جاتا ہے قوموں کا ضمیر​

عام بات چیت میں عموماً اور سوشل میڈیا پر باالخصوص تواتر سے احادیث بیان کی جا رہی ہیں جس میں مسلمانوں کے زوال، صیہونیوں کے مسلمانوں پر مظالم ، فتنہ دجال اور امام مہدی کے ظہور کا بیان ہے ۔ تشریع میں یہ بات بیان کی جاتی ہے کہ یہ تو ہونا ہی ہے اور اس کا توڑ نہ تو ہمارے پاس ہے اور نہ ہمارے کچھ کرنے سے اس پر کچھ فرق پڑے گا۔ یعنی یہ سب کچھ ناگزیر ہے اور ہمارا کام فقظ یہ ہے کہ مجرمانہ خاموشی برقرار رکھیں اور اپنی باری کا انتظار کریں۔

میں آپ کے سامنے صرف ایک صورت حال رکھتا ہوں اور فیصلہ آپ پر چھوڑتا ہوں ۔ فرض کریں کہ آپ کو کسی بھی طریقے سےمعلوم ہو گیا ہے کہ آپ کے گھر کو آگ لگنی ہے اور سب کچھ تباہ ہو جا نا ہے۔ آپ کے گھر کے باہر کچھ لوگ آتش زدگی کا سامان لے کر پہنچے ہیں اور آگ لگانے لگے ہیں۔آپ کا طرز عمل کیا ہو گا؟ کیا آپ ان کے ساتھ مل کر خود اپنا گھر جلوائیں گے؟ کیا آپ خود کو گھر میں بند کر لیں کہ گھر جلنا اور تباہی تو نا گزیر ہے اب جل ہی جانا چاہیے؟

اس صورت حال میں کم از کم میں تو اس وقت تک مزاحمت کروں گا جب تک میرے تن میں جان ہے۔ اگر گھر کو آگ لگنا ناگزیر بھی ہے تو میرے جیتے جی نہیں لگے گی۔

مسلمان بھی تو بھائی بھائی قرار دیے گئے ہیں۔ اگرچہ مسلمانوں کی تباہی ناگزیر ہے اور نبی آخرزماں کا قول بر حق ہے مگر میرا کام تو فقط اتنا ہے کہ اپنے بھائی کا اس وقت تک ساتھ دوں جب تک میرے تن میں جان ہے۔آج اگر میں مجرمانہ خاموشی اختیار کرتا ہوں تو کل اپنے رسول کو کیا منہ دکھاوں گا؟

تحریر کنندہ : واصف حسین

 

دین کے نام پر۔۔۔دین کی وہ تشریح کی جاتی رہی ہے۔۔۔۔اور کی جارہی ہے۔۔کہ الامان۔۔۔۔۔۔تاریخ گواہ ہےکہ چنگیز کو کچھ لوگوں نےعذاب الہی قرار دے کر۔۔مسلمانوں کو۔۔سر جھکانے کے مشورے دیے۔۔۔کہ اللہ کے عذاب سے کیونکر جنگ کی جائے؟۔۔۔۔یعنی دعوے توحید کے مگر۔۔۔توہم پرستی میں سب کو مات۔۔۔۔اس وقت بطو ر خاص۔۔جب جہدوجہد کا وقت آجاتا ہے۔

 

واصف بھائی آپ کے خیال میں اس کے کیا اسباب ہیں؟

 

@ملک بلال بھائی۔۔۔۔۔اسباب میں۔۔۔۔۔قسمت کا لکھا۔۔۔۔روز روشن کی طرح عیاں۔۔۔۔اورخودساختہ مذہبی تشریحات کی ذریعے لوگوں کو ۔۔۔عملی جدوجہد سے روکنا سرفہرست ہیں۔

 

اس سوال کا جواب دینے سے پہلے میں ایک بات کی وضاحت کر دوں کی یہ میری رائے ہے اور اس سے کسی کو بھی اختلاف کا پورا حق ہے۔

اسباب دو چیزوں کے ہیں اول یہ کہ صیہوینی مسلمانوں کو برباد کرنے کے درپے کیوں ہیں۔ یہودی اللہ تعالیٰ کی پسندیدہ قوم تھی اور وہ ابھی تک اس زعم میں مبتلا ہیں کہ وہ اللہ کی پسندیدہ قوم ہے اور اس دنیا میں حکمرانی صرف یہودیوں کا حق ہے۔ قران میں ارشاد باری تعالیٰ ہے کہ "اہل کتاب محمدٖ کو اس طرح پہچانتے ہیں جیسے کہ اپنے بیٹوں کو پہچانتے ہیں"(مفہوم)۔ اللہ کے نبی کو پہچاننے کے باوجود انکار کی وجہ صرف یہ ہے کہ آخری نبی آل اسماعیل سے کیوں ہے۔قرآن میں اللہ تعالیٰ نے متعدد مقامات پر یہودیوں کے متعلق کہا ہے کہ" اے یہودیو تم سمجھتے ہو کہ تم اللہ کی پسندیدہ قوم ہو تو پھر موت کی تمنا کرو" اور پھر مذید کہا کہ وہ ایسا کبھی نہیں کریں کہ اس بنا پر کہ وہ جو اعمال کرتے ہیں اور اللہ ظالموں سے خوب واقف ہے۔ یہ بنیادی اختلاف ہے اور رسول پاک نے ارشاد فرمایا کہ یہود و نصاریٰ کبھی بھی تمھارے دوست نہیں ہو سکتے۔ سو ان کی اسلام اور مسلمانوں سے دشمنی مسلمہ ہے اور وہ اس کو زیر کرنے کے لیے ہر حربہ استعمال کر رہے ہیں اور کرتے رہیں گے۔عظیم اسرائیل اور یہودی سرزمین کا نظریہ بھی اسی دشمنی کی کڑی ہے۔ سو یہودیوں کا مسلمانوں میں فتنہ انگیزی برپا کرنے کے اسباب واضع ہیں۔
اسباب میں دوسری چیز یہ ہے کہ ہم من حیث الامت نفاق کا شکار اور غیر متحد ہیں۔ ایک درخت نے کلہاڑے سے کہا کہ تیری اتنی اوقات نہیں تھی کہ مجھے چیر سکتا مگر کیا کروں کہ دستے کی صورت میں میرے اپنے تیرا ساتھ دے رہے ہیں۔ بالکل اسی طرح ہمارے اپنے مسلمان ان کا ساتھ دے رہے ہیں۔ کہیں ان کو اپنی علاقے فراہم کر کے اور کہیں خاموشی اختیار کر کے۔مسلمانوں کو ایک سوچے سمجھے منصوبے کے تحت سرحدں میں مقید کر دیا گیا ہے۔عرب، افریقہ، ھند غرض ہر جگہ نقشے پر پیمانہ رکھ کر مسلمان کی الگ الگ سرحدیں بانٹی گئی۔اسی لیے آج جب غزہ پر حملہ ہوتا ہے تو مسلمان حکمران یہ سوچتے ہیں کہ یہ تو فلسطین میں ہو رہا ہے میری سرحدیں تو محفوظ ہیں۔میں اپنی معاملات نپٹاؤں یا فلسطین کی مدد کروں۔ یہ قومیت اور سرحدیں ہمارے ہاں جتنی پختہ ہو رہی ہیں یہود و نصاریٰ میں اسی قدر کم ہو رہی ہیں۔ اس کی مثال آپ کو یورپی یونین میں ملے گی۔ ایک ویزہ لے کر آپ پورے یورپ میں جا سکتے ہیں۔ ایک کرنسی یورو تمام یورپ میں قابل قبول ہے۔ مگر مسلم ممالک میں ایسی کوئی سہولت نہیں ہے۔اقبال نے اس وطنیت کو ایک بت قرار دیا ہے جوکہ اتحاد بین المسلمین کے لیے ایک بہت بڑی رکاوٹ ہے۔ اقبال کی یہ نظم ملاحضہ کریں:

اس دور میں مے اور ہے، جام اور ہے جم اور
ساقی نے بنا کی روشِ لطف و ستم اور
مسلم نے بھی تعمیر کیا اپنا حرم اور
تہذیب کے آزر نے ترشوائے صنم اور
ان تازہ خداؤں میں بڑا سب سے وطن ہے
جو پیرہن اس کا ہے، وہ مذہب کا کفن ہے

یہ بت کہ تراشیدہ تہذیب نوی ہے
غارت گر کاشانۂ دین نبوی ہے
بازو ترا توحید کی قوت سے قوی ہے
اسلام ترا دیس ہے، تو مصطفوی ہے
نظارۂ دیرینہ زمانے کو دِکھا دے
اے مصطفوی خاک میں اس بت کو ملا دے !

ہو قید مقامی تو نتیجہ ہے تباہی
رہ بحر میں آزادِ وطن صورتِ ماہی
ہے ترکِ وطن سنت محبوب الہٰی
دے تو بھی نبوت کی صداقت پہ گواہی
گفتارِ سیاست میں وطن اور ہی کچھ ہے
ارشادِ نبوت میں وطن اور ہی کچھ ہے

اقوامِ جہاں میں ہے رقابت تو اسی سے
تسخیر ہے مقصودِ تجارت تو اسی سے
خالی ہے صداقت سے سیاست تو اسی سے
کمزور کا گھر ہوتا ہے غارت تو اسی سے
اقوام میں مخلوقِ خدا بٹتی ہے اس سے
قومیت اسلام کی جڑ کٹتی ہے اس سے​

سو ہماری ناکامی اور ہماری زبوں حالی کا زمہ دار کوئی اور نہیں ہم خود ہیں۔