مُدَّت سے لئے پِھرتا ہوں عُنوَانِ مدینہ ! ۔سراج تاباؔنى ۔ کلکتہ

مُدَّت سے لئے پِھرتا ہوں عُنوَانِ مدینہ !
ہو پایا نہ اِک لفظ بھی شَایانِ مدینہ

رہتی ہے تِری سمت نظر بَاغِ اِرَم کی
قربان تِرے جاؤں ! خِیابانِ مدینہ

ذَرّوں میں ہے اَنوارِ رسالت کی وہ تَابِش !
جَنَّت کو لُبھَاتا ہے بیابانِ مَدینہ

اُس دَر کا نِوَالہ ، میں پہونچ کر وہیں کھاؤں
قِسمت میں مِری لِکھ دے خُدَا ! نانِ مدینہ

بَس یاد میں اُنکی میں پِھروں چَاک گریباں
ہر دیکھنے والا کہے ,,, مَستانِ مدینہ

جُرموں کی سَزَا مجھ کو مِلے تیری گلی میں
زِندَاں بھی مِلے مجھ کو تو , زِندَانِ مدینہ

تاباؔنى ! جو اُڑتے ہیں مَدینے کی فضا میں
تجھ سے کہیں بہتر ہیں وہ مُرغانِ مدینہ

✍ سراج تاباؔنى ۔ کلکتہ ​

 

اللہ تعالیٰ آپ کو بھی جزائے خیر عطا کرے آمین