مناصبِ اولیاء اللہ

مناصبِ اولیاء اللہ​

تصّوف و سلوک ، اصلاحِ نفس ، تزکیہ باطن یا بالفاظِ دیگر تعمیرِ سیرت کا نام ہے۔ اور تعمیرِ سیرت کی عمارت کا اساسی پتھر ہستیِ باری تعالی پر ایمان و ایقان ہے۔۔۔۔ ہاں وہ ذاتِ باری تعالی کہ ایک مخفی خزانہ تھی۔ اس نے چاہا کہ پہچانا جائے ، اس ارادے کی تکمیل میں کائنات وجود پذیر ہوئی اور بے کراں و لا انتہا کائنات کے اس کرہِ زمین کو گوناگوں مخلوقات سے آباد اور حضرتِ انسان کو اشرف المخلوقات کا درجہ دے کر ان سب کو اس کی خدمت کے لئے اس کے زیرِ نگیں کر دیا گیا اور غایتِ تخلیقِ انسانی محض عبادتِ الٰہی قرار دی گئی۔

"اور ہم نے جن اور انسان کو پیدا ہی عبادت کے لیے کیا ہے۔"
سورۃ الزاریات
​

۔۔۔۔۔۔اسی حقیقت کا اعلان ہے۔ اور طریقہ عبادت سکھانے اور ضابطہ حیات پر چلانے کے لیے ہر دور میں انبیاء کرام علیہم السلام کو مبعوث کیا جاتا رہا۔ ان میں سے چند کو اولوالعزم رسول کے منصب سے نوازا اور ہمارے آقا حضور صلی اللہ علیہ و آلہ وسلم کو سب کا سردار و امام بنایا گیا۔ گویا تاجدارِ کونین کا وجودِ مسعود خلاصہِ کائنات ٹھہرایا گیا۔ چنانچہ ارشاد باری تعالٰی ہے۔۔۔۔۔

"حقیقت میں اللہ تعالٰی نے مسلمانوں پر بڑا احسان کیا ہے کہ انہی میں سے ایک رسول بھیجا جو ان کو اس کی آیتیں پڑھ کر سناتا اور انہیں پاک صاف کرتا ہے۔ اور انہیں کتاب و حکمت کی تعلیم دیتا ہے۔"
سورۃ آل عمران​

گویا آنحضور صلی اللہ علیہ و آلہ وسلم نے مسلمانوں کی تعلیم و تربیت کے لیے دو انداز اختیار فرمائے۔ ایک علمی و ذہنی اور دوسرا روحانی و قلبی۔ پہلے طریقے سے آپ صلی اللہ علیہ و آلہ وسلم نے قرآنِ کریم کی آیات و احکام اور دیگر اصولِ حیات و حکمت سکھائے۔۔۔۔۔۔۔ اور دوسرے طریقے سے اپنی نگاہِ کیمیا اثر کے فیض سے ایمان لانے والوں کے شیشہ ہائے قلوب سے قبل از اسلام کے گناہوں اور غیر اللہ کی محبت کی تمام تر کثافت اور زنگ اتار کر اللہ کریم کے لیے شدید محبت کا رنگ اجاگر فرما دیا۔ پہلا طریقہ زبان و بیان سے متعلق اور دوسرا طریقہ القائی و انعکاسی اثرات کا حامل تھا۔ یہی وجہ تھی کہ جونہی کوئی شخص ایمان لانے کی غرض سے آپ صلی اللہ علیہ و آلہ وسلم کی خدمتِ اقدس میں حاضر ہوا ، اس کے قلب پر ایک نگاہِ معجز اثر پڑی اور وہ نفس کی تمام تر آلائشوں اور وساوسِ شیطانی سے پاک صاف ہو گیا ۔۔۔۔۔ صحابی بن گیا۔ اسی روحانی تربیت کا یہ اعجاز تھا کہ صحبتِ رسالت مآب صلی اللہ علیہ و آلہ وسلم میں پہنچ کر ہر کوئی اپنی اپنی استعداد کے مطابق عالم ، فقیہہ ، مفسر ، حاکم ، سفیر اور جرنیل بن کر ایمان و ایقان کی قوتِ لازوال سے مالا مال ہو جاتا۔

جس طرف چشمِ محمد کے اشارے ہو گئے
جتنے ذرے سامنے آئے ، ستارے ہو گئے​

روحانی تربیت کا یہی نسخہِ کیمیا ہے جو رسول اکرم صلی اللہ علیہ و آلہ وسلم اور صحابہ کرام رضی اللہ کے واسطہ سے سینہ بہ سینہ امتِ مسلمہ میں جاری رہ کر تاقیامت ظلمت گزین قلوب کو نور نور کرتا رہے گا ۔۔۔۔ دینِ متین کا یہی وہ روحانی رخ ہے جو علماءِ ظاہر کے ہاں قطعاً مفقود رہا ہے۔ حتٰی کہ حضرت امام غزالی رحمۃ اللہ علیہ ، حضرت امام رازی رحمۃ اللہ علیہ اور حضرت مولانا رومی رحمۃ اللہ علیہ جیسے یکتائے روزگار علماء و فضلاء اپنے تمام تر ظاہری کمالاتِ علمی کے باوصف روحانی کسبِ فیوض کے لیے درویشانِ خدا مست حضرت شیخ بو علی فارمدی رحمۃاللہ علیہ ، حضرت نجم الدین کبریٰ رحمۃ اللہ علیہ اور حضرت شمس تبریزی رحمۃ اللہ علیہ کی خدمت میں حاضر ہو کر زانوءِ ادب تہہ کرنے پر مجبور ہوئے ۔۔۔۔۔ اس لیے کہ یہ وہ دولتِ عظمیٰ ہے جو کتابوں کے سفینوں کی بجائے مردانِ کامل کے سینوں کے گنجینوں میں مستور ہوتی ہے اور اسے الفاظ و عبارت کی بجائے عملِ انعکاس و القاء کے ذریعہ سینہِ شیخ سے اخذ کیا جاتا ہے ۔۔۔۔۔ اور اسی روحانی "توجہ" کے زیر اثر روحِ سالک ان ورالوراء روحانی مانزل کی طرف گرم پرواز اور عرش پیما ہوتی ہے جہاں ستارے گردِ راہ کی صورت میں دور کہیں پیچھے رہ جاتے ہیں۔ یہی رسول اکرم صلی اللہ علیہ و آلہ وسلم کی وہ روحانی میراث ہے جو ہر دور میں اولیاء کرام کو ودیعت رہی اور تاقیامت منتقل ہوتی رہے گی ۔۔۔۔۔ انہی اولیاء کرام رحمۃاللہ علیہ میں سے بعض کو خصوصی روحانی مناصب سے نوازا جاتا ہے ، انہی کے وجود کی ظاہری و باطنی برکات سے رحمتِ الہیٰ اہلِ عالم کے شاملِ حال ہو جاتی ہے۔
ان مناصب کی تفصیل حسبِ ذیل ہے

​

اللہ تعالیٰ نے قرآن کریم میں اپنے انبیاء و رسل کو کہیں عبد اور کہیں صدیق سے بھی خطاب فرمایا ہے۔۔۔۔۔

"اور جو شخص اللہ اور رسول کا کہنا مان لے گا تو ایسے اشخاص بھی ان لوگوں کے ساتھ ہوں گے جن پر اللہ تعالیٰ نے انعام فرمایا یعنی انبیاء اور صدیقین"
سورۃ النساء​

"اور اس کتاب میں ابراہیم کا ذکر کیجیے وہ صدیق اور نبی تھے"
سورۃ مریم
​

"اور ہمارے عبد ایوب کو یاد کیجیے۔"
سورۃ ص​

اور حضور صلی اللہ علیہ و آلہ وسلم کے متعلق "عبدہ و رسولہ" اسی کی طرف اشارہ ہے۔ ارشادِ نبوی صلی اللہ علیہ و آلہ وسلم ہے۔

"حضرت انس بن مالک رضی اللہ عنہ بیان کرتے ہیں کہ نبی صلی اللہ علیہ و آلہ وسلم ایک روز احد پہاڑ پر چڑھے اور آپ صلی اللہ علیہ و آلہ وسلم کے ساتھ ابوبکر رضی اللہ عنہ ، عمر رضی اللہ عنہ اور عثمان رضی اللہ عنہ تھے۔ ان کے باعث پہاڑ ہلنے لگا تو آپ صلی اللہ علیہ و آلہ وسلم نے اپنے پاوں سے اس کو اشارہ کیا کہ " اے احد ٹھہر جا کیونکہ تیرے اوپر ایک نبی ، ایک صدیق اور دو شہید ہیں۔""
​

گویا صدیق ، عبد اور نبی میں اتنا قریبی اتصال ہے کہ جہاں صدیقیت کی حد ختم ہوتی ہے وہاں سے حدِ نبوت کا آغاز ہوتا ہے۔
منصبِ عبد کے متعلق حضرت شیخ احمد سرہندی مجدد الف ثانی رحمۃاللہ علیہ دفترِ اول کے مکتوب نمبر تیس میں یوں نشان دہی فرماتے ہیں ۔۔۔۔۔۔۔۔

"لہٰذا مراتب ولایت کی انتہا مقامِ عبدیت ہے۔ ولایت کے درجات میں مقامِ عبدیت سے اوپر کوئی مقام نہیں۔۔۔۔۔۔۔"​

منصبِ صدیق کے بارے میں شاہ ولی اللہ محدث دہلوی رحمۃاللہ علیہ "ازالۃ الخفاء" صفحہ نمبر بارہ پر یوں رقمطراز ہیں۔

"صدیق کے معنی بڑا سچا اور شریعت میں ایک خاص مرتبہ ہے جس کی سرحد نبوت کی سرحد سے ملی ہوئی ہے۔"​

حضرت موصوف نے اپنے والد ماجد حضرت شاہ عبدالرحیم رحمۃاللہ علیہ کے ایک خواب کا تذکرہ اپنی کتاب "انفاس العارفین" کے صفحہ نمبر تہتر پر بایں الفاظ کیا ہے۔

"پس آنحضرت صلی اللہ علیہ و آلہ وسلم نے میری روح کو اپنی روح میں‌لے لیا اور مقامِ صدیقیت جو ولایت کی انتہا ہے سے گزار دیا۔"
​

قیوم کے متعلق حضرت امام ربانی رحمۃ اللہ علیہ دفتر دوئم کے مکتوب نمبر چوہتر میں فرماتے ہیں۔

"وہ عارف جو قیوم کے منصب پر فائز ہو، وزیر کا حکم رکھتا ہے کہ مخلوق کے اہم امور کا تعلق اسی سے ہے۔ گو انعام تو بادشاہ کی طرف سے ہوتے ہیں مگر وہ وزیر کی وساطت سے ملتے ہیں۔"​

عبد ، صدیق ، اور قطبِ وحدت کے مناصب صحابہ کرام رضی اللہ عنہ اور خیر القرون کے دور سے مختص تھے۔ تاہم زمانہ ما بعد میں بھی بعض خصوصی حالات میں قلیل حضرات کو ان میں سے بعض ان میں سے بعض مناصب سے نوازا جاتا رہا۔ جب بھی اسلام پر کوئی افتاد پڑی اور محسوس کیا گیا کہ ظلمت کا مقابلہ غوث کی قوت سے نہیں‌کیا جا سکتا تو عمومی ڈگر سے ہٹ کر کسی اللہ کے بندے کو غوث کی بجائے کسی اونچے منصب پر فائز کیا گیا۔ تاکہ وہ اپنی روحانی توجہ کی قوت سے لادینیت کی ظلمت کو دین کے اجالے میں بدل سکے۔ مثلا حضرت شیخ عبدالقادر جیلانی رحمۃاللہ علیہ "عبد" حضرت امام غزالی رحمۃاللہ علیہ "صدیق" اور حضرت مجدد الف ثانی رحمۃاللہ علیہ "قطبِ وحدت" تھے۔ یاد رہے کہ اشتراکِ منصب و منازل کے باوصف انبیاء کرام ، صحابہ کرام اور اولیاء کرام کے درجہ ، شان اور شرف میں بڑا فرق ہوتا ہے۔ غوث اور نچلے مناصب ہر زمانہ میں ہوتے ہیں۔ لیکن بڑے مناصب خاص حالات میں ہیں۔ غوث تمام دنیا کی روحانی حکومت کا صدر ہوتا ہے اور چاروں اقطاب اس کے وزراء کا درجہ رکھتے ہیں۔ ان میں قطب الاقطاب بطور سیکرٹری فرائض سرانجام دیتا ہے۔ سنیارٹی کے لحاظ سے پہلے قطب الاقطاب، پھر قطبِ مدار اور پھر قطبِ ابدال آتا ہے۔ قطب مدار کو بقاء عالم کا سبب بنایا جاتا ہے۔ قطبِ ابدال کا وجود بقاء سے متعلق امور میں وصولِ فیض کا ذریعہ ہے۔ اس لیے پیدائش ، رزق ، مصائب ، صحت و آرام کے حاصل ہونے کا تعلق قطبِ ابدال کے فیض سے مخصوص ہے ۔۔۔۔۔۔ اور ایمان ، ہدایت ، توبہ اور امورِ خیر کی توفیق قطبِ ارشاد کے فیض کا نتیجہ ہے۔ پھر ابدال ، اوتاد ، نجباء ، نقباء ، اخیار اور ابرار ہوتے ہیں۔ یہ سب اپنی اپنی الگ الگ شاخوں کے باوجود منصب میں تقریبا مساوی ہوتے ہیں ۔۔۔۔۔ اگر دنیا کو چالیس برابر ملکوں میں تقسیم کیا جائے تو ہر ملک کا سربراہ ابدال ہو گا۔ پھر نیچے گاوں تک اولیاء کا نظام پھیلا ہوا ہے۔ اللہ تعالیٰ اپنی حکمت عالیہ سے حضرت خضر علیہ السلام اور حضرت الیاس علیہ السلام کو تکوینی امور میں ہر دور کے لیے قطبِ مدار اور قطبِ ابدال کا معاون ٹھہرایا ہے۔ اور اوتاد و ابدال جیسے اپنے اقطاب کے ماتحت ہوتے ہیں ویسے ہی مذکورہ بالا ہستیوں کے بھی تابع ہو کر تکوینی امور انجام دیتے ہیں۔ یہ دونوں بزرگ ولایت کی قلندری شاخ کے سربراہ کا درجہ رکھتے ہیں۔ ایک منصب رجسٹرار کا بھی ہوتا ہے۔ حضور صلی اللہ علیہ وآلہ وسلم کے وسیع سیکرٹریٹ کے سربراہ حضرت علی رضی اللہ عنہ ہیں۔ اس سیکرٹریٹ اور اولیاءِ زمانہ کے درمیان ایک ضروری کڑی حضرت شیخ عبدالقادر جیلانی رحمۃاللہ علیہ ہیں ۔۔۔۔۔۔ مگر بعض اوقات غیر معمولی حالات میں ضابطوں کی کارروائی مختصر کرنے کے لیے کسی منصب دار کو براہِ راست مرکزی سیکرٹریٹ سے منسلک کر دیا جاتا ہے اسے رجسٹرار سے موسوم کیا جاتا ہے۔ ان اصحاب کی روحانی توجہ کی قوت ان کے منصب کے اعتبار سے ایک دوسرے سے سو گنا فزوں تر ہوتی ہے۔ یعنی قطب الاقطاب کی سو بار توجہ غوث کی ایک بار توجہ کے مساوی ہے۔ اس حساب سے عبد کی توجہ کی قوت قطبِ ابدال کی قوت سے دس سنکھ گنا زیادہ ہوتی ہے ۔۔۔۔۔۔ یہی وجہ ہے کہ غوث کے اوپر والے اولیاء کرام اپنی قوت کی شدت کے باعث سالوں کا روحانی سفر دنوں میں طے کرانے کے اہل ہوتے ہیں۔ اور اپنی غیبی توجہ سے بھی منازلِ سلوک طے کرا سکتے ہیں۔



یہ مضمون نوید بھائی کے مناصبِ اولیاء اللہ کے بارے میں پوچھے گئے سوال کے جواب میں سلسلہ اویسیہ کے بزرگ "فقیر پروفیسر باغ حسین کمال رحمۃاللہ علیہ" کی کتاب "حالِ سفر ۔ از عرش تا فرش" سے تیار کیا گیا ہے۔ کوشش کروں گا ان کا مزید تعارف یا ان کی کتاب سے مزید کچھ یہاں شیئر کر سکوں۔ ویسے ان کا کچھ کلام شاعری کے سیکشن میں موجود ہے۔ اگر یہ مضمون اچھا لگے تو مجھ گناہ گار کے لیے دعا ضرور کر دیجیے گا۔

والسلام
احقر

 

جواب: مناصبِ اولیاء اللہ

السلام و علیکم

بہت شکریہ بلال بھائی جزاک اللہ خیرا

 

جواب: مناصبِ اولیاء اللہ

السلام علیکم
بلال بھائی بہت بہترین اور معلوماتی مضمون ہے ایک جسارت میں بھی کرونگا ، میں بھی جناب عاصم مٹھو صاحب کی طرح اس بات کو نہیں سمجھا کہ یہ جو آپ نے فرمایا ہے کہ !

صدیق کے معنی بڑا سچا اور شریعت میں ایک خاص مرتبہ ہے جس کی سرحد نبوت کی سرحد سے ملی ہوئی ہے۔"


حضرت موصوف نے اپنے والد ماجد حضرت شاہ عبدالرحیم رحمۃاللہ علیہ کے ایک خواب کا تذکرہ اپنی کتاب "انفاس العارفین" کے صفحہ نمبر تہتر پر بایں الفاظ کیا ہے۔


"پس آنحضرت صلی اللہ علیہ و آلہ وسلم نے میری روح کو اپنی روح میں‌لے لیا اور مقامِ صدیقیت جو ولایت کی انتہا ہے سے گزار دیا۔"

اگر ممکن ہو اور وقت بھی ہو تو اس بات کی وضاحت فرما دیں‌ ، ممکن ہے آپ کی اس مہربانی سے میں اپنی کم علمی کے سبب مزید گمراہی سب بچ جاؤ ۔

 

جواب: مناصبِ اولیاء اللہ

اس اقتباس میں کیا یہ سمجھا جائے کہ شاہ عبدالرحیم صاحب کہ ان کو صدیقیت سے گزار کر نبوت میں داخل کیا گیا تھا؟؟؟؟
کیونکہ اوپر آپ نے ساتھ یہ بھی لکھا ہے کہ

یعنی صدیقیت سے گزر کر نبوت میں داخل ہوا جاتا ہے۔
آپ کو ایک بات بتادوں کہ میں نے یہ سوال بحث برائے بحث کے لیے نہیں کیا ہے بلکہ جو سمجھا ہے وہی پیش کیا ہے اب مجھے اس کی وضاحت چاہیے صاحبِ تحریر بھائی سے، شکریہ

عزیزم عاصم مٹھو جی !
اول تو یہ ایک خواب کا معاملہ ہے ۔۔ دوسرے یہ کہ اس کو زبان و بیان کے اعتبار سے بھی جانچنا چاہیئے شاہ صاحب نے جو خواب دیکھا وہ کچھ بھی ہو لیکن اس انہوں نے جس اسلوب سے بیان کیا ہے اس کو مدر نظر رکھنا چاہیئے مقام صدیقیت سے گزار دیا" کا مفہوم ہر گز یہ نہیں ہے کہ وہ مقام صدیقیت سے گزرتے ہوئے اس کی سرحدوں سے ملحق مقام نبوت کی حدود میں داخل ہو گئے بلکہ اس سے مراد یہ ہے کہ مقام صدیقیت کے تمام کے تمام مرحلے سر کرا دیے اور کوئی مرحلہ باقی نہ رہا یہ بالکل اس طرح ہے جیسے کوئی شخص یہ کہے کہ میں ان مراحل سے کئی مرتبہ گزرا ہوں۔ کوئی شخص کسی کتاب کا مطالعہ اس انداز سے کر لیے کہ اس کا کوئی بھی باطنی یا ظاہر پہلو اس سے پوشیدہ نہ رہا ہو تو وہ بھی یہ دعوی کر سکتا ہے کہ میں اس کتاب کے تمام راستوں ابواب معانی اور مطالعہ سے گزر چکا ہوں۔
بالکل اسی طرح اگر کوئی شخص کسی خاص واقعہ یا کیفیت کی جانب اشارہ کرتے ہوئے کہے کہ میں اس تجربہ سے گزر چکا ہوں بعینہ اسی طرح شاہ صاحب مقام صدیقیت کے تمام مراحل سے بحسن و خوبی گزرے۔ لیکن اس کے باوجود انکے اسلوب بیان سے یہ احتمال پیدا ہوتا ہے جس دوستوں نے اپنے مراسلہ میں ذکر کیا ہے مگر چونکہ ہم سب مسلمان ہیں ، اور یہ بات ہمارے بنیادی اعتقادات میں شامل ہے کہ نبوت ایک ایسا مقام و مرتبہ ہے جو اکتسابی نہیں اور نبی اکرم صلی اللہ علیہ وآلہ وسلم آخری نبی ہیں انکے بعد نبوت کے دروازے بند ہو چکے ہیں اس لیے اگر کوئی مقام صدیقیت کو عبور بھی کرلے تو اسکا مطلب ہرگز یہ نہیں لیا جا سکتا کہ وہ مقام نبوت میں داخل ہو گیا ہے۔
اہل تصوف کے نزدیک مقام نبوت اور حقیقت محمدیت تو ایک ایسا مقام ہے کہ کوئی ولی اللہ چاہے کتنا ہی کامل کیوں نہ ہوجائے وہ انکے خیمہ کی طناب تک بھی نہیں پہنچ سکتا لہذا شاہ عبدالرحیم کے اس بیان سے ہر گز کسی شک و شبہ میں مبتلا نہیں ہونا چاہیئے
والسلام

 

جواب: مناصبِ اولیاء اللہ

بہت بہت شکریہ محمد فاروق جی
جزاک اللہ